కొత్త ఎత్తిపోతల పథకం నిర్మించాలన్న ఎపి సర్కార్‌ నిర్ణయం ఏకపక్షం
ఈ ప్రాజెక్టును అడ్డుకునేందుకు న్యాయ పోరాటం చేస్తాం
కృష్ణ జలాల బోర్డులో ఫిర్యాదు చేయాలని అధికారులకు సిఎం కెసిఆర్‌ ఆదేశం : పోత్తిరెడ్డిపాడుపై సుదీర్ఘ సమీక్ష
ప్రజాపక్షం / హైదరాబాద్‌ : శ్రీశైలం ప్రాజెక్టు నుంచి కృష్ణా నీటిని లిఫ్టు చేస్తూ కొత్త ఎత్తిపోతల పథకం నిర్మించాలని ఆంధ్రప్రదేశ్‌ ప్రభుత్వం ఏకపక్షంగా నిర్ణయించడం తీవ్ర అభ్యంతరకరమని ముఖ్యమంత్రి కె.చంద్రశేఖర్‌ రావు అన్నారు. ఎపి ప్రభుత్వం తీసుకున్న నిర్ణయం ఆంధ్రప్రదేశ్‌ రాష్ట్ర విభజన చట్టానికి విరుద్ధమని అన్నారు. తెలంగాణ రాష్ట్ర ప్రయోజనాలకు తీవ్ర భంగకరమైన ఈ ప్రాజెక్టును అడ్డుకోవడానికి న్యాయ పోరాటం చేస్తామని కెసిఆర్‌ ప్రకటించారు. ఎపి ప్రభుత్వ నిర్ణయంపై వెంటనే కృష్ణా వాటర్‌ మేనేజ్‌మెంట్‌ బోర్డులో తెలంగాణ రాష్ట్ర ప్రభుత్వం తరఫున ఫిర్యాదు చేయాలని అధికారులను సిఎం ఆదేశించారు. తెలంగాణ రాష్ట్రాన్ని సంప్రదించకుండానే ఉమ్మడి ప్రాజెక్టు అయిన శ్రీశైలం నీటి విషయంలో నిర్ణయం తీసుకోవడం, అపెక్స్‌ కమిటీ ఆమోదం లేకుండా కొత్త ప్రాజెక్టు నిర్మాణం తలపెట్టడం ఆంధ్రప్రదేశ్‌ రాష్ట్రం చేసిన తప్పిదాలుగా సిఎం పేర్కొన్నారు. ఈ ప్రాజెక్టును అడ్డుకోవడానికి రాజీలేని ధోరణి అవలంబిస్తామని స్పష్టం చేశారు. శ్రీశైలం ప్రాజెక్టు నుంచి మూడు టిఎంసిల నీటిని లిఫ్టు చేసే విధంగా కొత్త ఎత్తిపోతల పథకం చేపట్టడానికి నిర్ణయించిన ఆంధ్రప్రదేశ్‌ ప్రభుత్వం, దీనికి సంబంధించి జిఒ కూడా విడుదల చేసింది. ఈ అంశంపై ముఖ్యమంత్రి కెసిఆర్‌ ప్రగతి భవన్‌లో సోమవారం ఉన్నత స్థాయి సమావేశం నిర్వహించారు. మంత్రులు ఈటల రాజెందర్‌, మహమూద్‌ అలీ, శ్రీనివాస గౌడ్‌, నిరంజన్‌ రెడ్డి, జగదీశ్‌రెడ్డి, పువ్వాడ అజయ్‌, రైతుబంధు సమితి రాష్ట్ర అధ్యక్షుడు పల్లా రాజేశ్వర్‌రెడ్డి, రాష్ట్ర ప్రభుత్వ ముఖ్య సలహాదారు రాజీవ్‌ శర్మ, నీటి పారుదల సలహాదారు ఎస్‌.కె.జోషి, ప్రభుత్వ ప్రధాన కార్యదర్శి సోమేశ్‌ కుమార్‌, నీటి పారుదల శాఖ ముఖ్య కార్యదర్శి రజత్‌ కుమార్‌, ఇఎన్‌సి మురళీధర్‌, ఎజి బి.ఎస్‌. ప్రసాద్‌, అడిషనల్‌ ఎజి రాంచందర్‌ రావు, లీగల్‌ కన్సల్టెంట్‌ రవీందర్‌ రావు, రిటైర్డ్‌ ఇంజనీర్లు శ్యాం ప్రసాద్‌ రెడ్డి, చంద్రమౌళి, సిఎంఒ కార్యదర్శి స్మితా సభర్వాల్‌, ఓఎస్డి శ్రీధర్‌ దేశ్‌ పాండే, నీటి పారుదల శాఖ సీనియర్‌ ఇంజనీర్లు పాల్గొన్నారు. ఆంధ్రప్రదేశ్‌ ప్రభుత్వం తలపెట్టిన కొత్త ప్రాజెక్టుపై విస్తృతంగా చర్చించారు. ఈ సందర్భంగా ముఖ్యమంత్రి కెసిఆర్‌ మాట్లాడుతూ, ఆంధ్రప్రదేశ్‌ ప్రభుత్వం చేపట్ట తలచిన ప్రాజెక్టు తెలంగాణ రాష్ట్ర ప్రయోజనాలకు భంగకరం కాబట్టి, దీనిపై అభ్యంతరం వ్యక్తం చేస్తూ న్యాయపోరాటం చేస్తామని ప్రకటించారు. “తెలంగాణలో కానీ, ఆంధ్రప్రదేశ్‌ లో కానీ కొత్త నీటి పారుదల ప్రాజెక్టు నిర్మాణం చేపడితే అపెక్స్‌ కమిటీ అనుమతి తీసుకోవాలని ఆంధ్రప్రదేశ్‌ పునర్వ్యవస్థీకరణ చట్టం స్పష్టంగా పేర్కొన్నది.
