బ్రిటన్ ప్రధానికి కరోనా పాజిటివ్

లండన్ : బ‌్రిట‌న్‌లో క‌రోనా వైర‌స్ పెద్ద పెద్ద త‌ల‌కాయ‌ల‌ను సైతం ప‌ట్టి పీడిస్తున్న‌ది. నిన్న కాక మొన్న బ్రిట‌న్ యువ‌రాజు ఛార్లెస్‌ను సోకిన క‌రోనా వైర‌స్ తాజాగా ప్ర‌ధానికి తాకింది. బ్రిటన్ ప్రధానమంత్రి బోరిస్ జాన్సన్ కు కొవిడ్ -19 సోకింది. తనకు కరోనా పాజిటివ్ వచ్చిందని ఆయన ట్విటర్ లో వీడియో ద్వారా వెల్లడించారు. గురువారం నుంచి తనలో ఈ వ్యాధి లక్షణాలు స్వల్పంగా కనిపించాయని తెలిపారు. ప్రస్తుతం తాను స్వీయ నిర్బంధంలోకి వెళ్తున్నానని పేర్కొన్నారు. వీడియో కాన్ఫరెన్స్, సాంకేతిక పరిజ్ఞానం ఉపయోగించి ప్రభుత్వాన్ని నడిపిస్తానని వెల్లడించారు. వైరస్ పై సమష్టిగా పోరాడదామని ప్రజలకు పిలుపునిచ్చారు.