దారుణ హత్య

రంగారెడ్డి జిల్లాలో వెటర్నరీ డాక్టర్‌ ప్రియాంకరెడ్డిని హత్యచేసిన దుండగులు
అత్యాచారం, హత్య చేసి సజీవదహనం చేసినట్లు అనుమానం
పోలీసుల ముమ్మర గాలింపు చర్యలు
రంగారెడ్డి/ఫరూఖ్‌నగర్‌ : రంగారెడ్డి జిల్లాలో దారుణం చోటు చేసుకుంది. చటాన్‌పల్లి వంతెన వద్ద ప్రియాంకరెడ్డి(22) అనే యువతిని గుర్తుతెలియని దుండగులు హత్య చేశారు. అనంతరం పెట్రోల్‌ పోసి నిప్పంటించారు. వంతెన కింద మృతదేహం ఉందన్న సమాచారంతో పోలీసులు సంఘటనస్థలికి వెళ్లి పరిశీలించారు. మహబూబ్‌నగర్‌ జిల్లా నవాబుపేట్‌ మండలం కొల్లూర్‌ గ్రామంలో ప్రియాంక వెటర్నరీ డాక్టర్‌గా విధులు నిర్వర్తిస్తున్నారు. మహబూబ్‌నగర్‌ జిల్లా కొల్లాపూర్‌ నియోజకవర్గ పరిధిలోని నర్సాయిపల్లి గ్రామం ప్రియాంకరెడ్డి స్వస్థలం. కాగా ప్రస్తుతం శంషాబాద్‌లో వీరి కుటుంబం నివసిస్తున్నారు. బుధవారం మాదాపూర్‌లోని హాస్పిటల్‌కు ప్రియాంకరెడ్డి స్కూటీపై వెళ్లింది. రాత్రి 9.30 ప్రాంతంలో శంషాబాద్‌కు తిరిగొచ్చింది. అప్పటి నుంచి ప్రియాంకరెడ్డి ఫోన్‌ స్విచ్ఛాఫ్‌ అయినట్టు పోలీసులు గుర్తించారు. గురువారం ఉదయం 4.30 గంటల సమయంలో దగ్ధమ వుతున్న ప్రియాంకరెడ్డి మృతదేహాన్ని షాద్‌నగర్‌ మండలం చటాన్‌ పల్లి చెందిన కొందరు వ్యక్తులు గుర్తించి పోలీసులకు సమాచారం అందించారు. విషయం తెలిసిన వెంటనే షాద్‌నగర్‌ పోలీసులు ఘటన స్థలానికి చేరుకుని ఉన్నతాధికారులకు సమాచారం అందించారు. విషయం తెలిసిన వెంటనే శంషాబాద్‌ డిసిపి ప్రకాశ్‌రెడ్డి, షాద్‌నగర్‌ ఎసిపి సురేందర్‌రెడ్డి, ఇన్‌స్పెక్టర్‌ శ్రీధర్‌ కుమార్‌లు ప్రత్యేక టీంలను ఏర్పాటు చేసి గాలింపు చర్యలను ముమ్మరం చేశారు.యువతిపై పెట్రోల్‌ పోసి తగలబెట్టిన ఘటనలో శంషాబాద్‌ చెందిన డాక్టర్‌ ప్రియాంకరెడ్డిగా గుర్తించారు. పదిహేను బృందాలతో గాలింపు చర్యలు చేపట్టారు. త్వరలో ఈ ఘాతుకానికి పాల్పడిన దుండగులను పట్టుకుంటామని తెలిపారు.
ప్రియాంక స్వస్థలం నాగర్‌కర్నూల్‌ జిల్లా కొల్లాపూర్‌ మండలం నర్సాయిపల్లి. కాగా శంషాబాద్‌ లో స్థిరపడ్డారు.ప్రియాంక బుధవారం రాత్రి స్కూటీ పాడైందని కుటుంబ సభ్యులకు ఆమె ఫోన్‌లో చెప్పిందని, అనంతరం ఆమె ఫోన్‌ స్విచ్ఛాఫ్‌ అయినట్టు కుటుంబ సభ్యుల ద్వారా తెలుస్తోంది. ఈ నేపథ్యంలో సీసీ కెమెరా ఫుటేజ్‌లను పోలీసులు పరిశీలించారు. ప్రియాంకను కిడ్నాప్‌ చేసి హత్య చేసినట్లు ప్రాథమిక నిర్ధారణకు వచ్చారు. తన స్కూటీ పంక్చర్‌ అయితే చటాన్‌పల్ల్లి వద్ద ఆగిందని తెలుస్తోంది. దీంతో భయపడుతూ ప్రియాంక ఆమె సోదరికి ఫోన్‌ చేసిందని, అక్కడి స్థానికులు స్కూటీని రిపేర్‌ చేయిస్తామని తీసుకెళ్లి.. దుకాణాలు మూసి ఉన్నాయని మళ్లీ తీసుకొచ్చారని తనకు చెప్పిందని, అక్కడ లారీ డ్రైవర్లు తిరుగుతూ ఉండటంతో భయంగా ఉందని చెప్పిందని ప్రియాంక సోదరి మీడియాకు తెలిపారు. అక్కడే ఉండవద్దని సమీపంలోని టోల్‌గేట్‌ వద్దకు వెళ్లమని తాను చెప్పినట్లు , ఈ నేపథ్యంలో తన చెల్లెలు తిరిగిరాకపోవడం, ఇంతలోనే ఈ ఘోరం జరగడం తమను కలిచివేస్తోందని ఆమె కుటుంబ సభ్యులు కన్నీరుమున్నీరవుతున్నారు. గుర్తుతెలియని దుండగులు ప్రియాంకపై అత్యాచారం చేసి హత్య చేసినట్లుగా పోలీసులు అనుమానిస్తున్నారు. లారీ డ్రైవర్లు ఎక్కువగా సంచరించే ప్రాంతం కావడంతో వారే ఈ ఘాతుకానికి పాల్పడి ఉంటారని భావిస్తున్నారు. ప్రస్తుతం పోలీసులు సంఘటనాస్థలానికి చేరుకొని ఆధారాలు సేకరిస్తున్నారు. రాత్రి తన సోదరికి ఫోన్‌ చేసి భయమేస్తుందని చెప్పింది.తన బైక్‌ పంక్చర్‌ అయ్యిందని, తన చుట్టూ కొందరు లారీ డ్రైవర్లు ఉన్నారంటూ చెప్పి ఫోన్‌ పెట్టేసిందని. ఆమె సోదరి అందించిన వివరాల ప్రకారం.. పోలీసులు గాలింపు చర్యలు చేపట్టారు. సంఘటన సంబంధించి పూర్తి వివరాలు తెలియాల్సి ఉంది..