భజ్జీ బౌలింగ్‌ ఎదుర్కొనేందుకు భయపడేవాడిని

మెల్‌బోర్న్‌: టీమిండియా వెటరన్‌ స్పిన్నర్‌ హర్భజన్‌సింగ్‌ తనను ’కర్మ’లా వెంటాడాడని ఆస్ట్రేలియా మాజీ వికెట్‌కీపర్‌ ఆడమ్‌ గిల్‌క్రిస్ట్‌ అన్నాడు. భజ్జీ, ముత్తయ్య మురళీధరన్‌ తన అంతర్జాతీయ కెరీర్‌లో ఎదుర్కొన్న అత్యంత కఠినమైన బౌలర్లని వెల్లడించాడు. భజ్జీ 32 వికెట్లు తీసిన 2001 భారత పర్యటన ఎప్పటికీ గుర్తుండిపోతుందని గిల్లీ అన్నాడు. ”కెరీర్‌ మొత్తం అతడు (హర్భజన్‌) నాకో తప్పించుకోలని ’కర్మ’గా మారాడు. అతడిని, మురళీని ఎదుర్కోవడం అత్యంత కష్టంగా అనిపించేది” అని గిల్‌క్రిస్ట్‌ వెల్లడించాడు. ఆస్ట్రేలియా 16 టెస్టు విజయాల రికార్డును 2001లో టీమిండియా అడ్డుకున్న సంగతి తెలిసిందే. ఆ సిరీస్‌లో తొలి మ్యాచ్‌లో ఆసీస్‌ 10 వికెట్ల తేడాతో గెలిచింది. ఆ తర్వాత హర్భజన్‌ బంతితో చెలరేగడంతో గంగూలీ సేన 2 సిరీస్‌ గెలిచింది. ’మేం 99/5తో ఉన్నాం. నేనప్పుడు క్రీజులోకి వెళ్లాను. 80 బంతుల్లో 100 చేశాను. మూడు రోజుల్లోనే మ్యాచ్‌ గెలిచాం. ఇంత సులభంగా ఉన్నప్పుడు గత 30 ఏళ్లుగా మా వాళ్లు ఏం చేస్తున్నారని అనుకున్నా’ అని గిల్లీ అన్నాడు. ’నేనెంత తప్పుగా అర్థం చేసుకున్నానో తర్వాత తెలిసింది. రెండో టెస్టులో యథార్థం తెలిసింది. మలుపు తిరగడంతో సిరీస్‌ ముగిసిన తర్వాత ప్రతిసారీ దాడి చేయడం కాకుండా మా ఆటతీరు మార్చుకోవాల్సిన అవసరం ఉందని తెలిసింది. ఎందుకంటే అది పని చేయలేదు. హర్భజన్‌ మమ్మల్ని కకావికలం చేశాడు’ అని గిల్లీ వెల్లడించాడు. 2004లో చెన్నై టెస్టు రెండో ఇన్నింగ్స్‌లో భారత్‌పై చేసిన 49 పరుగుల ఇన్నింగ్స్‌ తనకెంతో సంతృప్తినిచ్చిందని గిల్‌క్రిస్ట్‌ అన్నాడు. తనకు ఇష్టమైన ఇన్నింగ్సుల్లో అదొకటని పేర్కొన్నాడు. ’బహుశా అది చాలా కీలకమైన ఇన్నింగ్స్‌. అయితే అందులో మరీ సొగసేమీ లేదు. నా స్థానం ముందుకు జరిపాను. మూడో స్థానంలో వచ్చి తొలి ఇన్నింగ్స్‌ లోటును భర్తీ చేశాను’ అని చెపపాడు. ఈ సిరీస్‌ను టీమిండియా 1 తేడాతో చేజార్చుకుంది. 35 ఏళ్ల తర్వాత ఆసీస్‌కు భారత్‌లో అతిగొప్ప ఘనత ఇదే.