హైదరాబాద్‌లో సి4ఐఆర్‌

‘బయో ఏషియా-2024 సదస్సు’లో భాగంగా ఫిబ్రవరి 28న ఈ సెంటర్‌ ప్రారంభం
వరల్డ్‌ ఎకనమిక్‌ ఫోరం ప్రెసిడెంట్‌ బోర్గే బ్రెండే ప్రతినిధి బృందంతో ముఖ్యమంత్రి రేవంత్‌రెడ్డి చర్చలు
సెంటర్‌ ఫర్‌ ఫోర్త్‌ ఇండస్ట్రియల్‌ రెవల్యూషన్‌ ప్రారంభంపై సంయుక్త ప్రకటన
ప్రజాపక్షం/హైదరాబాద్‌ వరల్డ్‌ ఎకనమిక్‌ ఫోరం సదస్సులో తెలంగాణ రాష్ట్రానికి అరుదైన అవకాశం దక్కింది. వరల్డ్‌ ఎకనమిక్‌ ఫోరం అధ్వర్యంలో సెంటర్‌ ఫర్‌ ఫోర్త్‌ ఇండస్ట్రియల్‌ రెవల్యూషన్‌ (సి4ఐఆర్‌) హైదరాబాద్‌లో ప్రారంభించేందుకు ఒప్పందం కుదిరింది. ‘బయో ఏషియా-2024 సదస్సు’లో భాగంగా ఫిబ్రవరి 28న ఈ సెంటర్‌ ప్రారంభం కానుంది. ముఖ్యమంత్రి ఎ.రేవంత్‌ రెడ్డి నేతృత్వంలో రాష్ట్ర ఆరోగ్య సంరక్షణను మెరుగుపరిచే (స్టేట్‌ హెల్త్‌ టెక్‌ ల్యాండ్‌ స్కేప్‌) సాంకేతిక ఆధారిత కార్యక్రమం రూపుదిద్దుకుంటుంది. స్విట్జర్లాండ్‌ లోని దావోస్‌లో వరల్డ్‌ ఎకనమిక్‌ ఫోరం వార్షిక సదస్సులో వరల్డ్‌ ఎకనమిక్‌ ఫోరం ప్రెసిడెంట్‌ బోర్గే బ్రెండే ప్రతినిధి బృందంతో ముఖ్యమంత్రి రేవంత్‌ రెడ్డి చర్చలు జరిపారు. అనంతరం ఈ మేరకు సంయుక్తంగా ప్రకటన చేశారు. లైఫ్‌ సైన్సెస్‌ రంగంలో టెక్నాలజీ కలయికతో అత్యాధునిక సాంకేతికతను అభివృద్ధి చేయాలనే లక్ష్యంతో వరల్డ్‌ ఎకనామిక్‌ ఫోరం తెలంగాణకు విశిష్ట సహకారం అందించింది. ‘వరల్డ్‌ ఎకనమిక్‌ ఫోరం’ విశాల దృక్పథం, నిర్దేశించుకున్న లక్ష్యాలన్నీ తెలంగాణ ప్రభుత్వం ఆలోచనలకు అనుగుణంగా ఉన్నాయని, అందుకే రెండింటి మధ్య అద్భుతమైన సమన్వయం కుదిరిందని ముఖ్యమంత్రి ఎ.రేవంత్‌ రెడ్డి అన్నారు. జీవన విధానాలు, జీవన నాణ్యత ప్రమాణాలు మెరుగుపరిస్తే ప్రజల జీవితాలు బాగుపడుతాయనే ఆలోచనల సారూప్యతకు కట్టుబడి ఉన్నామని, వరల్డ్‌ ఎకనమిక్‌ ఫోరం ప్రపంచ స్థాయిలో పని చేస్తుంటే, తెలంగాణ ప్రభుత్వం రాష్ట్రంలోని నాలుగు కోట్ల మంది ప్రజలపై దృష్టి కేంద్రీకరిస్తోందని, ఇరువురి భాగస్వామ్యంతో ప్రజల ఆరోగ్యం, సాంకేతికత, మంచి జీవితం అందించాలనే లక్ష్యాలను వేగంగా అందుకోవచ్చని సిఎం తెలిపారు. ‘ప్రపంచ స్థాయిలో ఆరోగ్య సంరక్షణ విధానాలను సరికొత్తగా పునర్నిర్వించే ఆలోచనలు ఉన్నాయని, చిన్న పట్టణాలు, గ్రామాలకు ఈ సేవలను అందించేందుకు ప్రభుత్వం సిద్ధంగా ఉన్నదన్నారు. అనంతరం ఐటి,పరిశ్రమల శాఖ మంత్రి దుద్దిళ్ల శ్రీధర్‌బాబు మాట్లాడుతూ ‘హెల్త్‌ టెక్‌ హబ్‌గా తెలంగాణను ప్రపంచ గమ్యస్థానంగా మార్చటంపై ప్రభుత్వం ప్రత్యేకంగా దృష్టి పెట్టిందని, గ్రామీణ ప్రాంతాలకు కూడా ఈ సేవలను అందించే సంకల్పంతో పని చేస్తుందని తెలిపారు.
ముందజలో ఉన్న తెలంగాణ : డాక్టర్‌ శ్యామ్‌ బిషెన్‌
‘హెల్త్‌ టెక్‌, లైఫ్‌ సైన్సెస్‌ భవిష్యత్తుకు నాయకత్వం వహించేందుకు సరిపడేవన్ని అవకాశాలెన్నో భారతదేశానికి ఉన్నాయని, ఇందులో తెలంగాణ రాష్ట్రం ముందంజలో ఉన్నదని వరల్డ్‌ ఎకనమిక్‌ ఫోరం సెంటర్‌ ఫర్‌ హెల్త్‌ అండ్‌ హెల్త్‌ కేర్‌ హెడ్‌, ఎగ్జిక్యూటీవ్‌ కమిటీ మెంబర్‌ డాక్టర్‌ శ్యామ్‌ బిషెన్‌ అన్నారు . ప్రపంచంలోనే మొదటి ఆరోగ్య సంరక్షణ కేంద్రంగా సి4ఐఆర్‌ ఏర్పాటుతో తెలంగాణ మరింత కీలకంగా మారనుందని, ప్రభుత్వ రంగంతో పాటు స్మాల్‌ అండ్‌ మీడియం ఎంటర్‌ప్రైజెస్‌ మధ్య సమన్వయ సహకారం కుదరడంతో పాటు ఆరోగ్య సంరక్షణ (హెల్త్‌ కేర్‌) విభాగంలో ఉద్యోగాల కల్పనకు మద్దతుగా నిలుస్తుందని వివరించారు. ఫోరం అత్యంత ప్రాధాన్యంగా ఎంచుకున్న డిజిటల్‌ హెల్త్‌ కేర్‌ ట్రాన్స్‌ఫర్‌మేషన్‌ లక్ష్యం నెరవేరుతుందనే విశ్వాసం ఉన్నదన్నారు. దీంతో రోగులకు మెరుగైన సేవలు అందించడం, అందరికీ అందుబాటులో ఉండేలా ఆరోగ్య సంరక్షణలో సాంకేతిక విధానాలకు చొరవ చూపుతుందనే నమ్మకం తమకు ఉన్నదన్నారు. వచ్చే ఏడాది ఫిబ్రవరిలో హైదరాబాద్‌లో ఈ కేంద్రం ప్రారంభమవుతుందని, ప్రపంచ వ్యాప్తంగా వరల్డ్‌ ఎకనమిక్‌ ఫోరం ప్రభావాన్ని మరింత పెంచేందుకు తెలంగాణ ప్రభుత్వం అన్ని రకాల సహాయ సహకారాలను అందజేస్తుందన్నారు.
ఆసియాలోనే ప్రముఖ ‘లైఫ్‌ సైన్సెస్‌ హాట్‌ స్పాట్‌’గా తెలంగాణ
వరల్డ్‌ ఎకనామిక్‌ ఫోరం ఫోర్త్‌ ఇండస్ట్రియల్‌ రెవల్యూషన్‌ నెట్‌వర్క్‌ అయిదు ఖండాలలో విస్తరించింది. సి4ఐఆర్‌ తెలంగాణ సెంటర్‌ ప్రపంచంలో 19వది. హెల్త్‌కేర్‌ ,లైఫ్‌ సైన్సెస్‌ నేపథ్యంతో ఉన్న మొదటి కేంద్రం హైదరాబాద్‌లోనే ప్రారంభం కానుంది. ఆసియాలోనే తెలంగాణ ప్రముఖ లైఫ్‌ సైన్సెస్‌ హాట్‌స్పాట్‌గా పరిగణిస్తారు. దీనికి స్వయం ప్రతిపత్తి ఉంటుంది. ఇది లాభాపేక్ష లేని సంస్థ. ఆరోగ్య సంరక్షణ,లైఫ్‌ సైన్సెస్‌ కోసం పాలసీ,పాలనపై నాయకత్వం వహిస్తుంది. తెలంగాణ ప్రభుత్వం రాష్ట్రంలోని ఇంక్యుబేటర్ల ద్వారా రాబోయే ఐదు సంవత్సరాలలో 20,000 స్టార్టప్లలపై ప్రభావం చూపాలని లక్ష్యంగా పెట్టుకుంది. రాష్ట్రంలో దాదాపు సగం మంది ఉద్యోగులు ఫార్మా, బయో టెక్నాలజీ రంగాలలో పని చేస్తున్నారు. హైదరాబాద్‌లో వరల్డ్‌ ఎకనమిక్‌ ఫోరం ప్రారంభంతో మరిన్ని ఉపాధి అవకాశాలు మెరుగుపడుతాయి. ఆరోగ్య సంరక్షణలో కొత్త సాంకేతిక విధానాలు అందుబాటులోకి వస్తాయి. కొత్త ఆవిష్కరణలకు స్నేహపూర్వక వాతావరణం ఏర్పడుతుంది.
ఇన్వేస్ట్‌ ఇన్‌ తెలంగాణ క్యాంపెయిన్‌
వరల్డ్‌ ఎకనమిక్‌ ఫోరం వేదిగా తెలంగాణ ప్రభుత్వం ఇన్వెస్ట్‌ ఇన్‌ తెలంగాణ క్యాంపెయిన్‌ విజయవంతంగా ప్రారంభించింది. ముఖ్యమంత్రి ఎ.రేవంత్‌ రెడ్డి, ఐటి, పరిశ్రమల శాఖ మంత్రి దుద్దిళ్ల శ్రీధర్‌బాబు ప్రపంచ దిగ్గజ కంపెనీల ప్రతినిధులతో సిఎం రేవంత్‌ కీలక సమావేశాల్లో పాల్గొంటున్నారు. ఐటీ, జీవ వైద్య శాస్త్ర రంగానికి ముఖ్య కేంద్రంగా అభివృద్ధి చెందిన తెలంగాణ బలాలను ప్రపంచానికి చాటి చెప్పేందుకు, భారీ పెట్టుబడులను ఆకర్షించాలని లక్ష్యంతో తెలంగాణ ప్రతినిధి బృందం తొలి రోజునే పలువురు ప్రముఖులతో కీలక చర్చలు జరిపింది. దావోస్‌ పర్యటనలో ఉన్న తెలంగాణ సీఎం రేవంత్‌ రెడ్డి సోమవారం వరల్డ్‌ ఎకనామిక్‌ ఫోరం ప్రెసిడెంట్‌ బోర్గ్‌ బ్రెండెతో సమావేశమయ్యారు. తెలంగాణలో పెట్టుబడులకు ఉన్న అవకాశాలపై చర్చించారు. అనంతరం ఇథియోఫియా డిప్యూటీ ప్రధాన మంత్రి డెమెక్‌ హసెంటోతో ముఖ్యమంత్రి రేవంత్‌ రెడ్డి సమావేశమయ్యారు. పారిశ్రామిక అభివృద్ధికి తెలంగాణ ప్రభుత్వం ఎంచుకున్న రూట్‌ మ్యాప్‌పైన వారు చర్చించారు. సిఎం రేవంత్‌ రెడ్డి, మంత్రి శ్రీధర్‌ బాబుతో పాటు తెలంగాణ ప్రతినిధి బృందం నేషనల్‌ అసోషియేషన్‌ ఆఫ్‌ సాఫ్ట్‌ వేర్‌ అండ్‌ సర్వీసెస్‌ కంపెనీస్‌ ప్రెసిడెంట్‌ దేబ్జానీ ఘోష్‌తో సమావేశమయ్యారు. రాష్ట్రంలో స్కిల్‌ డెవెలప్మెంట్‌ పై ప్రత్యేక దృష్టి సారించడం, అందుకు అనుసరించే భవిష్యత్తు మార్గాలపై చర్చించారు. ఇంజినీరింగ్‌, డిగ్రీ కోర్సులు చదువుతున్నయువతకు స్కిల్‌ డెవెలప్‌మెంట్‌,ప్లేస్‌మెంట్‌ కమిట్‌మెంట్‌, విలువైన ఉద్యోగాల కల్పనకు సాయం అందించేలా తదితర అంశాలపై సంప్రదింపులు జరిగాయి.
“తెలంగాణ పెవిలియన్‌ ’
వరల్డ్‌ ఎకనమిక్‌ ఫోరంలో తెలంగాణ ప్రభుత్వం “తెలంగాణ పెవిలియన్‌ ’ను ఏర్పాటు చేసింది. మన తెలంగాణ సంస్కృతీ సంప్రదాయాలను చాటేలా ప్రత్యేక వేదికను ఏర్పాటు చేశారు. బతుకమ్మ, బోనాల పండుగలు, మన చారిత్రక వారసత్వ సంపదకు చిహ్నంగా నిలిచిన చార్మినార్‌, కళాకారుల ఖ్యాతిని ప్రపంచానికి చాటిన చేర్యాల పెయింటింగ్‌, పోచంపల్లి ఇక్కత్‌, ఐటీ, సాంకేతిక ఆవిష్కరణల కొత్త సౌధం టీ హబ్‌.. స్కైరూట్‌ ఏరోస్పేస్‌ ఇలా విభిన్న రంగాల మేళవింపు ఉట్టిపడేలా తయారు చేసిన వాల్‌ డిజైనింగ్‌ పెవిలియన్‌కు ప్రత్యేక ఆకర్షణగా నిలిచాయి. తెలంగాణలో పెట్టుబడి పెట్టండి అనే పేరుతో పెవిలియన్‌ను రూపొందించారు. “పెట్టుబడులకు దేశంలోనే మొదటి గమ్యస్థానం, అపారమైన అవకాశాలు ఉన్న రాష్ట్రం తెలంగాణ ” అనే ,నినాదాలతో పారిశ్రామిక వేత్తలను ఆకర్షిస్తున్నారు. “ మీ కోసమే తెలంగాణ అంటూ హోర్గింట్‌ ఏర్పాటు ఏశారు. పెట్టుబడులు పెట్టేందుకు రాష్ట్రంలో ఉన్న అనుకూలతలను వ్యక్తం చేసేలా ఏర్పాటుల చేశారు. ‘మీ కోసమే తెలంగాణ’ అంటూ సిఎం రేవంత్‌ రెడ్డి హోర్డింగ్‌ ప్రపంచ దిగ్గజ కంపెనీలను ఆకట్టుకునేలా ఉంది.