సుప్రీంకోర్టు సిజెగా జస్టిస్‌ రమణ ప్రమాణం

అత్యున్నత ధర్మపీఠంపై తెలుగు ఆణిముత్యం
న్యూఢిల్లీ: సుప్రీంకోర్టు ప్రధాన న్యాయమూర్తి (సిజె)గా ఎన్‌వి రమణ శనివారం ప్రమాణ స్వీకారం చేశారు. భారత అత్యున్నత న్యాయస్థానం 48వ ప్రధాన న్యాయమూర్తిగా ఆయన తో రాష్ట్రపతి రామ్‌నాథ్‌ కోవింద్‌ రాష్ట్రపతి భవన్‌లో ప్రమాణం చేయించారు. ఉపరాష్ట్రపతి వెంకయ్యనాయుడు, ప్రధాని మోడీతోపాటు సుప్రీంకోర్టు న్యాయమూర్తులు, కేబినెట్‌ మం త్రులు, న్యాయమంత్రిత్వ శాఖ ఉన్నతాధికారులు, జస్టిస్‌ ఎన్‌వి రమణ కుటుంబ సభ్యులు, ఇతర ప్రముఖులు ప్రమాణస్వీకార కార్యక్రమానికి హాజరయ్యారు. దేశ అత్యున్నత ధర్మపీఠంపై తెలుగు ఆణిముత్యం కొలువుతీరడం ఒక అద్భుత ఘట్టం. ఈ పదవిని చేపట్టిన రెండో తెలుగు వ్యక్తిగా జస్టిస్‌ రమణ చరిత్ర పుటల్లో చోటు సంపాదించారు. ఇంతకు ముం దు, 1966 జూన్‌ 30 నుంచి 1967 ఏప్రిల్‌ 11 వరకు జస్టిస్‌ కోకా సుబ్బారావు సిజెఐగా సేవలందించారు. ఇప్పటి వరకూ ఈ బాధ్యతలను నిర్వర్తించిన జస్టిస్‌ ఎస్‌ఎ బాబ్డే శుక్రవా రం పదవీ విరమణ చేయగా, ఆయన స్థానం లో సిజెఐగా బాధ్యతలు స్వీకరించిన జస్టిస్‌ రమణ కృష్ణా జిల్లా పొన్నవరం గ్రామంలోని ఓ వ్యవసాయ కుటుంబంలో 1957 ఆగస్టు 27న జన్మించారు. గణపతిరావు, సరోజిని దంపతుల కుమారుడైన జస్టిస్‌ రమణ కంచికచర్లలో ఉన్నత పాఠశాల విద్యాభ్యాసం పూర్తి చేసి, అమరావతిలోని ఆర్‌వివిఎన్‌ కళాశాలలో బిఎస్‌సి పట్టా పొందారు. 1982లో నాగార్జున విశ్వవిద్యాలయంలో న్యాయశాస్త్రంలో పట్టా తీసుకుని 1983 ఫిబ్రవరి 10న రాష్ట్ర బార్‌ కౌన్సిల్లో న్యాయవాదిగా నమోదయ్యారు. న్యాయవాద వృత్తిలో సివిల్‌, క్రిమినల్‌, రాజ్యాంగ, కార్మిక, సేవ, ఎన్నికల వ్యవహారాలకు సంబంధించిన అంశాలపై వాదనలు వినిపించారు. 2013లో ఆంధ్రప్రదేశ్‌ హైకోర్టు తాత్కాలిక ప్రధాన న్యాయమూర్తిగా వ్యవహరించారు. ఆ తర్వాత ఢిల్లీ హైకోర్టు ప్రధాన న్యాయమూర్తిగా నియమితులయ్యారు. 2014లో సుప్రీంకోర్టుకు పదోన్నతి పొందారు. ప్రస్తుతం సుప్రీం కోర్టు సిజెగా బాధ్యతలు తీసుకున్న ఆయన 2022 ఆగస్టు 26న పదవీ విరమణ చేసేంత వరకు ఈ పదవిలో కొనసాగుతారు. సుప్రీంకోర్టు ప్రధాన న్యాయమూర్తి కార్యాలయం కూడా సమాచార హక్కు పరిధిలోకి వస్తుందని చెప్పిన ధర్మాసనంలో జస్టిస్‌ రమణ ఒకరుకావడం విశేష,ం.