తక్కువ సమయంలోనే కుండపోత వర్షాలు
ఎలాంటి పరిస్థితులనైనా ఎదుర్కొనేందుకు సిద్ధంకావాలి
వర్షాకాల విపత్తులపై అధికార యంత్రాంగానికి మంత్రి కెటిఆర్‌ ఆదేశం
ప్రజాపక్షం/హైదరాబాద్‌
ప్రస్తుత వర్షాకాలానికి రూపొందించిన ప్రణాళికల మేరకు పూర్తి సంసిద్ధతతో పనిచేయాలని జిహెచ్‌ఎంసి యంత్రాంగాన్ని మున్సిపల్‌ శాఖమంత్రి కె.టి.రామారావు ఆదేశించారు. ప్రగతి భవన్‌లో గురువారం జరిగిన జిహెచ్‌ఎంసి సమీ క్షా సమావేశంలో మంత్రి కెటిఆర్‌ పలు ఆదేశాలు జారీ చేశారు. గత కొన్ని సంవత్సరాలుగా నగరంలో తక్కువ సమయంలోనే కుండపోత వర్షా లు కురుస్తున్న నేపథ్యంలో ఈసారి కూడా జిహెచ్‌ఎంసి యంత్రాంగం ఎలాంటి పరిస్థితులనైనా ఎదుర్కొనేందుకు సిద్ధంగా ఉండాలని సూచించారు. జిహెచ్‌ఎంసిలో ఉన్న వివిధ విభాగాల మధ్య సమన్వయం తో ముందుకు వెళ్లేలా పక్కా ప్రణాళిక సిద్ధం చేయాలన్నారు. నాలాల అభివృద్ధి కోసం ఇప్పటికే జిహెచ్‌ఎంసికి తగిన పరిపాలనా పరమైన అనుమతులు ఇచ్చామని చెప్పారు. నాలాలపైన క్యాపింగ్‌ లేదా ఫెన్సింగ్‌ వంటి కార్యక్రమాలను మరింత వేగవంతం చేయాలన్నారు. వివిధ జోన్‌లలో ఉన్న నాలాల ఫెన్సింగ్‌ కార్యక్రమానికి సంబంధించి వివరాలు అడిగి తెలుసుకున్నారు. నాలాల అభివృద్ధి పనులను మరింత వేగవంతంగా పూర్తి చేసేందుకు అవసరమైన నిధులను జిహెచ్‌ఎంసి అందించడం ద్వారా ఎస్‌ఎన్‌డిపిని మరింత బలోపేతం చేస్తామని మంత్రి అన్నారు. నాలాలకు సంబంధించిన పనులను మేయర్‌, కమిషనర్‌ ప్రత్యేక పర్యవేక్షణ చేయాలని సూచించారు. జిహెచ్‌ఎంసి పరిధిలో వివిధ శాఖల ఆధ్వర్యంలో నడుస్తున్న అభివృద్ధి కార్యక్రమాల్లో భాగంగా జరిపిన తవ్వకాలు (ముఖ్యంగా రోడ్లపై) అవసరమైన అన్ని రక్షణ చర్యలు చేపట్టాలన్నారు. ఆయా కార్యక్రమాలలో భాగస్వాములైన ఎజెన్సీలు, శాఖలకు ప్రత్యేకంగా అదేశాలు జారీ చేయాలన్నారు. ఈ వర్షాకాలం సందర్భంగా నగరంలో ఎలాంటి సీజనల్‌ వ్యాధులు ప్రబలకుండా అవసరమైన పారిశుద్ధ్య కార్యక్రమాలను మరింత విస్తృతం చేయాలన్నారు. నగరంలో సీజనల్‌ వ్యాధులు ప్రబలకుండా ఆరోగ్యం-పారిశుద్ధ్యం విభాగాలు కలిసి పని చేయాలని ఆదేశించారు. జిహెచ్‌ఎంసి వర్షాకాల ప్రణాళికలో పారిశుద్ధ్యానికి, పరిశుభ్రతకు మరింత ప్రాధాన్యమిచ్చే కార్యక్రమాలను చేపట్టాలని సూచించారు. దోమల నివారణకు సంబంధించి ఫాగింగ్‌, యాంటీ లార్వాల్‌ వంటి చర్యలు చేపట్టాలన్నారు. జిహెచ్‌ఎంసిలో అమలవుతున్న టిఎస్‌ బిపాస్‌తో పాటు, ఎస్‌ఆర్‌డిపి పనులపై కూడా మంత్రి సమీక్ష నిర్వహించారు. ఈ సమావేశంలో నగర మేయర్‌ గద్వాల్‌ విజయలక్ష్మి, డిప్యూటీ మేయర్‌ మోతె శ్రీలత శోభన్‌ రెడ్డి, మున్సిపల్‌ శాఖ ముఖ్యకార్యదర్శి అర్వింద్‌ కుమార్‌, జిహెచ్‌ఎంసి కమిషనర్‌ డి.ఎస్‌.లోకేష్‌ కుమార్‌, ఇంజనీర్‌ ఇన్‌ చీఫ్‌ శ్రీధర్‌, చీఫ్‌ సిటీ ప్లానర్‌ ఎస్‌.దేవేందర్‌ రెడ్డి, జోనల్‌ కమిషనర్లు, వివిధ విభాగాల అధికారులు పాల్గొన్నారు.
సంసిద్ధంగా ఉండండి
RELATED ARTICLES
