రుణమాఫీ చేస్తాం…
నెలాఖరు నాటికి తెల్ల కార్డులు లేని 4 లక్షల మంది రైతులకు రుణమాఫీ డబ్బులు జమ
నల్లగొండలో ధాన్యం, పత్తి కొనుగోలు కేంద్రాలు ప్రారంభించిన మంత్రులు తుమ్మల, కోమటిరెడ్డి
ప్రజాపక్షం /నల్లగొండ ప్రతినిధి
రాష్ట్ర ప్రభుత్వం ఇచ్చిన మాట ప్రకారం మొదటి పంటకాలంలోనే రూ.31 వేల కోట్లు రైతుల రుణమాఫీని చేస్తామని, ఎన్ని ఇబ్బందులు వచ్చినా పంట కాలానికి రైతు భరోసా ఇస్తామని రాష్ట్ర వ్యవసాయ శాఖ మంత్రి తుమ్మల నాగేశ్వరరావు తెలిపారు. బుధవారం ఆయన నల్లగొండ జిల్లా కేంద్రం సమీపంలోని ఎస్‌ఎల్‌ బిసి బత్తాయి మార్కెట్‌ యార్డ్‌లో ధాన్యం కొనుగోలు కేంద్రాన్ని, అలాగే పత్తి కొనుగోలు కేంద్రాన్ని రాష్ట్ర రోడ్లు, భవనాలు, సినిమాటోగ్రఫీ శాఖల మంత్రి కోమటిరెడ్డి వెంకట్‌రెడ్డితో కలిసి ప్రారంభించారు. ఈ సందర్భంగా ఏర్పాటు చేసిన సమావేశంలో మంత్రి తుమ్మల నాగే శ్వరరావు మాట్లాడుతూ గడచిన 5 సంవత్సరాలలో రైతుకు ఏ బ్యాంకులో ఎంత బాకీ ఉన్నా రెండు లక్షల వరకు రుణమాఫీ చేయాలని రాష్ట్ర ప్రభుత్వం క్యాబినెట్లో నిర్ణయం తీసుకున్నదని, క్యాబినెట్‌ నిర్ణయం ప్రకారం 22 లక్షల తెల్ల కార్డులు కలిగిన రైతులకు ఇది వరకే 18 వేల కోట్ల రూపాయలు రుణమాఫీ చేస్తూవారి ఖాతాలలో జమ చేయడం జరిగిందని, ఈ నెలాఖరు నాటికి తెల్ల కార్డులు లేని 4 లక్షల మంది రైతులకు రుణాలు మాఫీ చేసేందుకు షెడ్యూల్‌ ప్రకటిస్తా మని, ఎట్టి పరిస్థితులలో ఈ పంట కాలంలోనే 31 వేల కోట్ల రూపాయల రుణమాఫీని చేసి తీరుతామని మంత్రి స్పష్టం చేశారు. ఈ ఏడాది నుండే రైతు పంటల బీమాను సైతం అమలు చేస్తామని, రైతులు ఏ పంట వేసిన ప్రభుత్వమే ప్రీమియం చెల్లించి రైతు పంట బీమా ఇచ్చే విధంగా చర్యలు తీసుకుంటున్నట్లు తెలిపారు. ధాన్యం కొనుగోలులో భాగంగా రైతులు ధాన్యాన్ని సక్రమంగా కొనుగోలు కేంద్రాలకు తీసుకురావాలని, పత్తిని సైతం అలాగే తేవాలని, ఈ సంవత్సరం తెలంగాణలో కోటి 50 లక్షల మెట్రిక్‌ టన్నుల ధాన్యం పండి దేశానికి అన్నం పెట్టే విధంగా తెలంగాణ తయారుకానుందని తెలిపారు. జనవరి నుండి రేషన్‌ కార్డుల ద్వారా అందరికీ సన్న బియ్యం ఇవ్వాలని నిర్ణయించడం జరిగిందని, అందుకే సన్న రకాలకు మద్దతు ధరతో పాటు, 500 రూపాయల బోనస్‌ వస్తుంది అని అన్నారు. ఆయిల్‌ ఫామ్‌ వల్ల మంచి లాభాలు, దిగుబడి ఉన్నందున రైతులు ఆయిల్‌ ఫామ్‌ పంటల సాగుపై ప్రత్యేక దృష్టి కేంద్రీకరించాలని, నల్లగొండ తెలంగాణలో 10 లక్షల ఎకరాల ఆయిల్‌ ఫామ్‌ సాగు చేయాలని ఆయన రైతులకు పిలుపునిచ్చారు. కరీంనగర్‌, మెదక్‌, మహబూబ్‌ నగర్‌లో ఆయిల్‌ ఫామ్‌ ఫ్యాక్టరీలను ఏర్పాటు చేస్తున్నామని, తర్వాత నల్లగొండలో ఫ్యాక్టరీ కట్టిస్తామని వెల్లడించారు.
రాష్ట్రంలోనే నల్లగొండ జిల్లాలో అత్యధికంగా ధాన్యం : మంత్రి కోమటిరెడ్డి
మంత్రి కోమటిరెడ్డి వెంకట్‌రెడ్డి మాట్లాడుతూ రైతులకు న్యాయం చేసేందుకు, రైతు సంక్షేమ కోసం రాష్ట్ర ప్రభుత్వం అనేక కార్యక్రమాలను అమలు చేస్తున్నదని తెలిపారు. రైతు రుణమాఫీలో భాగంగా ఇప్పటి వరకే 18 వేల కోట్ల రూపాయల రుణమాఫీ చేయడం జరిగిందని, రాష్ట్రంలోనే నల్లగొండ జిల్లాలో అత్యధికంగా ధాన్యం పండుతుందని, రైతులు ధాన్యాన్ని ఎండబెట్టి కొనుగోలు కేంద్రాలకు తీసుకువస్తే 24 గంటల్లో ధాన్యాన్ని కొనుగోలు చేసి డబ్బులు చెల్లించే ఏర్పాటు చేస్తామన్నారు. ఎస్‌ఎల్‌బిసి వద్ద గతంలో బత్తాయి కోసం నిర్మించిన షెడ్డులో కోల్డ్‌ స్టోరేజ్‌ ఏర్పాటు చేయాలని వ్యవసాయ శాఖ మంత్రితో విజ్ఞప్తి చేశారు. అనంతపూర్‌ తర్వాత నల్లగొండ జిల్లాలోనే అత్యధికంగా బత్తాయి సాగు జరుగుతుందని, సుమారు 50,000 ఎకరాలలో బత్తాయి సాగు చేస్తారని తెలిపారు. ఈ కార్యక్రమంలో జిల్లా కలెక్టర్‌ సి.నారాయణ రెడ్డి, రాష్ట్ర వేర్‌ హౌసింగ్‌ కార్పొరేషన్‌ చైర్మన్‌ నాగేశ్వరరావు, జిల్లా ఎస్‌పి శరత్‌ చంద్ర పవార్‌, అదనపు కలెక్టర్‌ జె. శ్రీనివాస్‌, మున్సిపల్‌ చైర్మన్‌ బుర్రి శ్రీనివాస్‌ రెడ్డి, మున్సిపల్‌ వైస్‌ చైర్మన్‌ అబ్బగోని రమేష్‌ గౌడ్‌, మార్కెట్‌ కమిటీ చైర్మన్‌ రమేష్‌, స్థానిక కౌన్సిలర్‌ అలివేలు, డిసిసిబి డైరెక్టర్‌ సైదులు, పిఎసిఎస్‌ డైరెక్టర్లు, డిఎస్‌ఓ వెంకటేశ్వర్లు, జిల్లా వ్యవసాయ అధికారి శ్రవణ్‌, పౌరసరఫరాల జిల్లా మేనేజర్‌ హరీష్‌,మార్కెటింగ్‌ జిల్లా అధికారి ఛాయా దేవి, ఆర్‌డిఓ శ్రీదేవి, డిఎస్‌పి శివరాం రెడ్డి, ఇతర ప్రజాప్రతినిధులు, అధికారులు పాల్గొన్నారు.
