రెపోరేటు యథాతథం : ఆర్‌బిఐ కీలక ప్రకటనలు

రివర్స్‌ రెపోరేటు 3.75శాతానికి తగ్గింపు
హౌసింగ్‌ బోర్డుకు రూ. 10 వేల కోట్లు, నాబార్డుకు రూ.25వేల కోట్లు కేటాయింపు
ఆర్‌బిఐ కీలక ప్రకటనలు

ముంబయి : కరోనా వైరస్‌ వ్యాప్తి, లాక్‌డౌన్‌ కారణంగా ఆర్థిక వ్యవస్థ మరింత చితికిపోయిన నేపథ్యంలో భారతీయ రిజర్వ్‌ బ్యాంకు (ఆర్‌బిఐ) కొన్ని కీలక ప్రకటనలు చేసింది. ఇప్పటి వరకు స్థూల జాతీయోత్పత్తి (జిడిపి) లో 3.2 శాతం ద్రవ్యం అందుబాటులోనే వుం దని, ఆందోళన పడాల్సిన అవసరం లేదని ఆర్‌బిఐ ప్రకటించింది. లాక్‌డౌన్‌ తర్వాత రూ. 1.2 లక్షల కోట్లు విడుదల చేసిన విషయాన్ని గుర్తు చేసింది. ఆర్‌బిఐ గవర్నర్‌ శక్తికాంతదాస్‌ శుక్రవారంనాడిక్కడ పత్రికా సమావేశంలో మాట్లాడారు సూక్ష్మ ఆర్థిక సం స్థలకు రూ.50వేల కోట్ల ఆర్థిక ప్యాకేజీని ప్రకటించారు. అలాగే,రివర్స్‌ రెపోరేటు 4 శాతం నుంచి 3.75శాతానికి తగ్గిస్తున్నట్లు చెప్పారు. కాకపోతే, రెపో రేటు యథాతథంగా వుంటుందన్నారు. రాష్ట్రాలకు 60శాతం మేరకు వేస్‌ అండ్‌ మీన్స్‌అడ్వాన్సెస్‌(డబ్ల్యూఎంఏ)ను పెంచుతున్నామని, ఇది సెప్టెంబరు 30 వరకు అమల్లో ఉంటుందని తెలిపారు. స్వల్పకాలిక చెల్లింపుల్లో తేడా వచ్చినప్పుడు రాష్ట్ర, కేంద్ర ప్రభుత్వాలు ఆర్‌బిఐ సహకారాన్ని తీసుకుంటాయని చెప్పారు.ఆర్‌బిఐ నుంచి ప్రభుత్వాలు తీసుకునే స్వల్పకాలిక రుణాలను వేస్‌ డబ్ల్యూఎంఏగా వ్యవహరిస్తారు. కాగా, జాతీయ హౌసింగ్‌ బోర్డుకు రూ.10 వేల కోట్లు, నాబార్డుకు రూ.25వేల కోట్లు కేటాయిస్తున్నట్లు ప్రకటించారు. మారటోరియం సమయంలో 90 రోజుల ఎన్‌పిఎ గడువు వర్తించదని స్పష్టం చేశారు. బ్యాంకుల లిక్విడిటీ కవరేజ్‌ రేషియో(ఎల్‌సిఆర్‌)ను 100శాతం నుంచి 80శాతానికి తగ్గించామని, దీని వల్ల బ్యాంకుల నగదు నిల్వలు పెరిగే అవకాశం ఉంటుందని చెప్పారు. దీన్ని తిరిగి 2020 అక్టోబర్‌ 1 నాటికి 90 శాతం, ఏప్రిల్‌ 1, 2021 నాటికి 100 శాతానికి పునరుద్ధరించాలని లక్ష్యంగా పెట్టుకున్నట్లు తెలిపారు. ఆర్థిక వ్యవస్థ పునరుత్తేజానికి ఈ నిర్ణయాలు దోహదం చేస్తాయని అభిప్రాయపడ్డారు. బ్యాంకుల్లో నిధుల కొరత వుందన్న వాదనను కొట్టిపారేశారు. కరోనా కష్టకాలంలో ఏటీఎంల వినియోగం పెరిగిందని శక్తికాంత దాస్‌ తెలిపారు. బ్యాంకుల్లో నిధుల కొరత లేకుండా అన్ని జాగ్రత్తలు తీసుకుంటున్నామన్నారు.బ్యాంకు కార్యకలాపాలు యథాతథంగానే జరుగుతాయని స్పష్టం చేశారు. లాక్‌డౌన్‌ వేళ మొబైల్‌ బ్యాంకింగ్‌ సేవలు సజావుగా సాగుతున్నాయన్నారు. ఆర్‌బీఐ చర్యల వల్లే బ్యాంకుల్లో ద్రవ్య లభ్యత మెరుగ్గా ఉందని 2021-22లో భారత ఆర్థిక వ్యవస్థ పుంజుకుంటుందని విశ్వాసం వ్యక్తం చేశారు. ఆ ఏడాది 7.4శాతం వృద్ధి నమోదు కానుందని అంచనా వేశారు. మార్చిలో ఆటోమొబైల్‌, ఉత్పత్తి, అమ్మకాలు తగ్గాయని తెలిపారు. విద్యుత్‌ వినియోగం భారీగా తగ్గిందన్నారు.  ప్రపంచవ్యాప్తంగా 9 ట్రిలియన్‌ డాలర్ల మేర నష్టం వాటిల్లే అవకాశం ఉందని అంచనా వేశారు. కరో నా వైరస్‌ నేపథ్యంలో ఇటు దేశంతో పాటు ప్రపంచవ్యాప్తంగా  అన్నింటినీ అంచనా వేసి చర్యలు తీసుకోవాల్సిన అవసరం ఉందని అభిప్రాయపడ్డారు. ఆర్థిక వ్యవస్థపై వైరస్‌ ప్రభావాన్ని ఎప్పటికప్పుడు సమీక్షిస్తున్నామన్నా రు. ఇంతటి విపత్కర పరిస్థితుల్లో సేవలందిస్తున్న బ్యాంకు సిబ్బందిని ఈ సందర్భంగా ప్రశంసించారు. అలాగే రోజు నిర్వహించిన మీడియా సమావేశంలో ఆయన ఈ విషయాలు వెల్లడించారు. ప్రపంచవ్యాప్తంగా ఆర్థిక వ్యవస్థలో సంక్షోభం నెలకొందని శక్తికాంతదాస్‌ అన్నారు. 1930 తర్వాత ఇంతటి సంక్షోభం ఎప్పుడూ ఎదుర్కోలేదని స్పష్టం చేశారు. ప్రపంచవ్యాప్తంగా స్టాక్‌ మార్కెట్లు, చమురు ధరలు భారీ ఒడుదొడుకులు ఎదుర్కొంటున్నాయని గుర్తుచేశారు.వృద్ధి రేటు పాజిటివ్‌గా ఉన్న అతికొద్ది దేశాల్లో భారత్‌ ఒకటని తెలిపారు. 2020 లో భారత్‌ 1.9శాతంగా ఉండనుందని చెప్పిన గవర్నర్‌ జీ20 దేశాల్లోకెల్లా ఇదే అత్యధికమని వెల్లడించారు.
ఊపందుకున్న మార్కెట్‌ : ఆర్‌బిఐ నిర్ణయాలతో దేశీయ మార్కెట్లు లాభాల్లో ముగిశాయి. వ్యవస్థలోకి నిధులు మళ్లించడం, రివర్స్‌ రెపో రేట్‌ తగ్గించడం, మొండి బాకీలకు సంబంధించిన నిబంధనలు సడలించడం సహా తీసుకున్న పలు చర్యలతో ఫైనాన్షియల్‌ స్టాక్స్‌ దూసుకెళ్లాయి. సెన్సెక్స్‌ 986.11 పాయింట్లు లాభంతో 31,588.72 వద్ద ముగిసింది. నిఫ్టీ సైతం 273.95 పాయింట్లు ఎగబాకి 9వేల పాయింట్ల మార్కును దాటి 9,266.75 పాయింట్ల వద్ద స్థిరపడింది. డాలరుతో రూపాయి మారకం విలువ 76.39గా ఉంది. నిఫ్టీలో యాక్సిస్‌ బ్యాంక్‌, ఐషర్‌ మోటార్స్‌, ఐసీఐసీఐ, ఇండస్‌ ఇండ్‌బ్యాంక్‌, మారుతీ సుజుకీ షేర్లు లాభపడ్డాయి. నెస్లే, హెయూఎల్‌, భారతీ ఇన్‌ ఫ్రాటెల్‌, టెక్‌ మహీంద్రా, సన్‌ ఫార్మా షేర్లు నష్టాలు చవిచూశాయి. ఫార్మా, ఎఫ్‌ఎంసీజీ రంగాల షేర్లు మినహా మిగిలిన అన్ని రంగాల షేర్లు లాభపడ్డాయి. అంతర్జాతీయ మార్కెట్లు కూడా లాభాలతో ముగియడం దేశీయ సూచీల పరుగుకు ఊతమిచ్చింది. షాంఘై, హాంకాంగ్‌, సియోల్‌, టోక్యో మార్కెట్ల షేర్లు లాభాల్లో ముగిశాయి.
ఋణపరపతి పెరుగుతుంది : ప్రధాని మోడీ
రిజర్వు బ్యాంక్‌ ప్రకటన ద్రవ్యలామణీకి ఋణపరపతి మెరుగుదలకు గొప్పగా దోహదపడతాయని ప్రధానమంత్రి నరేంద్రమోదీ అన్నారు.  మన చిన్న వ్యాపారాలు, చిన్న, మద్య తరహా పరిశ్రమల రంగం, రైతులు, పేదలకు ఆర్‌.బి.ఐ చర్యలు ఉపయోగపడతాయన్నారు.
కాగా కేంద్ర ఆర్థికమంత్రి నిర్మలాసీతారామన్‌ కూడా ఆర్థిక వ్యవస్థ నిర్వహణకు తగినంత ద్రవ్యం అందుబాటులోకి వస్తుందని, కోవిడ్‌ కారణంగా ఎదుర్కొంటున్న సమస్యల నేపథ్యంలో మార్కెట్లు సాధారణస్థితిలో పనిచేయడాకి, ఆర్థిక వ్యవస్థలో ఏర్పడిన ఒత్తిడిని నివారించడానికి రిజర్వుబ్యాంకు తీసుకున్న చర్యలు దోహదం చేస్తాయన్నారు.