రాష్ట్రానికి భారీ పెట్టుబడి

డిస్‌ప్లే ఫ్యాబ్‌ కోసం రూ.24వేల కోట్లు పెట్టుబడి పెట్టనున్న ఎలేస్ట్‌ కంపెనీ
బెంగళూరులో మంత్రి కెటిఆర్‌తో జరిగిన సమావేశంలో అవగాహన ఒప్పందం
ప్రజాపక్షం/హైదరాబాద్‌ భారత దేశ చరిత్రలో తొలిసారిగా డిస్‌ప్లే ఫ్యాబ్‌ రంగంలో తెలంగాణకి భారీ పెట్టుబడి దక్కింది. 24 వేల కోట్ల రూపాయలను తెలంగాణలో డిస్‌ప్లే ఫ్యాబ్‌ కోసం పెట్టుబడిగా పెట్టనున్నట్లు ఎలేస్ట్‌ కంపెనీ ప్రకటించింది. ఈ మేరకు బెంగళూరులో మంత్రి కె.టి.రామారావుతో జరిగిన సమావేశంలో అవగాహన ఒప్పందాన్ని తెలంగాణ ప్రభుత్వంతో కుదుర్చుకుంది. బెంగళూరు కేంద్రంగా కార్యకలాపాలు నిర్వహిస్తున్న ఎలేస్ట్‌ కంపెనీ ఈ పెట్టుబడితో తెలంగాణ రాష్ట్రంలో ఈ డిస్‌ప్లే ఫ్యాబ్‌ను ఏర్పాటు చేయనుంది. ఎలెస్ట్‌
కంపెనీ ప్రపంచ ఫార్చ్యూన్‌ 500 కంపెనీల్లో ఒకటైన రాజేష్‌ ఎక్స్‌స్పోర్ట్‌ ద్వారా ఏర్పాటు చేయబడింది. ఏలేస్ట్‌ కంపెనీ అమొలెడ్‌ డిస్‌ప్లే, లిథియం అయాన్‌ సెల్స్‌, బ్యాటరీలు, ఎలక్ట్రిక్‌ వాహనాల తయారీ కోసం ప్రత్యేకంగా ఏర్పాటు చేయబడింది. డిస్‌ప్లే ఫ్యాబ్‌ రంగంలో ఉన్న ప్రపంచంలోనే అత్యుత్తమ కంపెనీల శాస్త్ర సాంకేతికతల మేరకు తన ఉత్పత్తులను తయారు చేయనుంది. మంత్రి కెటిఆర్‌ సమక్షంలో రాజేష్‌ ఎక్స్‌స్పోర్ట్‌ ఛైర్మన్‌ రాజేష్‌ మెహతా ఈ అవగాహన ఒప్పందం కుదుర్చుకున్నారు. ఈ ఒప్పందం ద్వారా రాష్ట్రంలో 6వ తరం అమోలెడ్‌ డిస్‌ప్లే ఫ్యాబ్‌ ఉత్పత్తి కోసం 24 వేల కోట్లను సంస్థ పెట్టుబడిగా పెట్టనుంది. ఈ పెట్టుబడి ద్వారా స్మార్ట్‌ఫోన్‌లు, టాబ్లెట్‌లు, లాప్టాప్‌ వంటి డిస్‌ప్లేలను తయారు చేయనున్నారు.
తెలంగాణకు వస్తున్న పెట్టుబడులు దేశానికే గర్వకారణం : కెటిఆర్‌
డిస్‌ప్లే ఫ్యాబ్‌ రంగంలో తెలంగాణకు రానున్న ఈ పెట్టుబడి ద్వారా కేవలం తెలంగాణను మాత్రమే కాకుండా భారతదేశాన్ని సైతం చైనా, అమెరికా, జపాన్‌ వంటి అతికొద్ది దేశాల సరసన నిలబెడుతుందని మంత్రి కెటిఆర్‌ అన్నారు. తెలంగాణకు వస్తున్న పెట్టుబడులు రాష్ట్రానికే కాకుండా దేశానికి గర్వకారణమన్నారు. భారతదేశ సెమీకండక్టర్‌ మిషన్‌ ప్రకటన తర్వాత తెలంగాణ రాష్ట్రంలోకి ఫ్యాబ్‌ రంగంలో పెట్టుబడులు తీసుకువచ్చేందుకు నిరంతరం కృషి చేస్తున్నామని, తమ కృషి ఫలించి, ఎలేస్ట్‌ కంపెనీ పెట్టుబడి ప్రకటన చేసిందన్నారు. ఈ పెట్టుబడి తర్వాత ఫ్యాబ్‌ రంగంలో తెలంగాణకు మరిన్ని పెట్టుబడులు వస్తాయని కెటిఆర్‌ ఆశాభాశం వ్యక్తం చేశారు. రాజేష్‌ మేహత మాట్లాడుతూ ఈ డిస్‌ప్లే ఫ్యాబ్‌ ఏర్పాటు తర్వాత రాష్ట్రంలో ఎలక్ట్రానిక్స్‌, ఐటి ఈకోసిస్టం, దాని అనుబంధ రంగాల్లో వృద్ధికి గణనీయమైన అవకాశాలు లభిస్తాయన్నారు. తెలంగాణ రాష్ట్రంలో తాము ఏర్పాటు చేయబోతున్న డిస్‌ప్లే ఫ్యాబ్‌తో ప్రపంచంలోనే అత్యుత్తమ గ్లోబల్‌ టాలెంట్‌ను ఆకర్షించేందుకు అవకాశం ఉంటుందని, అత్యాధునిక సాంకేతికత ఆధారంగా పనిచేసే ఈ ప్లాంట్‌లో 3000 మంది సైంటిస్టులు, ఇతర అత్యాధునిక టెక్నాలజీ నిపుణులకు ఉద్యోగ అవకాశాలు లభిస్తాయన్నారు. డిస్‌ప్లే ఫ్యాబ్‌ భాగస్వాములు, ఈ రంగ అనుబంధం సంస్థలు, సరఫరాదారుల లాంటి రూపంలో వేలాది ఉద్యోగాలు లభిస్తాయన్నారు. తమ ఎలేస్ట్‌ కంపెనీ, ఆరవ తరం అమోల్‌ డిస్‌ప్లే తయారీ ద్వారా భారతదేశం నుంచి గొప్ప ఫ్యూచర్‌ టెక్నాలజీని ప్రపంచానికి అందించగలమన్న విశ్వాసాన్ని ఆయన వ్యక్తం చేశారు. బెంగళూరులో జరిగిన ఈ సమావేశంలో పరిశ్రమలు, ఐటి శాఖ ముఖ్య కార్యదర్శి జయేష్‌ రంజన్‌, డైరెక్టర్‌ ఎలక్ట్రానిక్స్‌ సుజయ్‌ కారంపురి, ఎలేస్ట్‌ సిఈఓ శ్యామ్‌ రఘుపతి తదితరులు పాల్గొన్నారు.