రాయుడు బౌలింగ్‌పై ఐసిసి నిషేధం

దుబాయి : భారత ఆటగాడు అంబటి రాయుడి బౌలింగ్‌పై అసంతృప్తి చెందిన ఐసిసి నిషేధం విధించింది. అంతర్జాతీయ క్రికెట్‌లో బౌలింగ్‌ చేయకుండా అతనిపై వేటు వేసింది. రాయుడి బౌలింగ్‌ అనుమానాస్పదంగా ఉందని ఆరోపణలు వెల్లువెత్తిన నేపథ్యంలో బౌలింగ్‌ యాక్షన్‌కు సంబంధించిన పరీక్షకు హాజరుకావాల్సిందిగా అత్యున్నత బోర్డు ఆదేశించింది. అయితే నిర్ణీత 14 రోజుల్లో అతను హాజరుకాకపోవడంతో ఐసిసి చర్యలకు ఉపక్రమించింది. ఐసిసి నిబంధనల్లోని 4.2 క్లాజ్‌ ప్రకారం అంతర్జాతీయ మ్యాచ్‌ల్లో బౌలింగ్‌ చేయకుండా అతనిపై నిషేధం విధించింది. రాయుడు బౌలింగ్‌ శైలిని పరిశీలించి.. సక్రమంగానే బౌలింగ్‌ చేస్తున్నాడని నిర్ధారించే వరకూ ఈ సస్పెన్షన్‌ కొనసాగుతుందని ఐసిసి స్పష్టం చేసింది. సిడ్నీలో ఈ నెల 13న ఆస్ట్రేలియాతో జరిగిన తొలి వన్డేలో అంబటి రాయుడి బౌలింగ్‌ శైలిపై ఫిర్యాదు అందిన విషయం విధితమే.