బిఆర్‌ఎస్‌ జాతీయ అధ్యక్షులు, ముఖ్యమ్రంతి కల్వకుంట్ల చంద్రశేఖర్‌రావు
ప్రజాపక్షం / హైదరాబాద్‌ దేశాభివృద్ధిని విస్మరించి ఇప్పటికే పలు రకాలుగా దేశ ప్రజల మధ్య చిచ్చు పెడుతున్న కేంద్రలోని ప్రభుత్వం, ఉమ్మడి పౌరస్మృతి (యూనిఫామ్‌ సివిల్‌ కోడ్‌) పేరుతో మరోమారు దేశ ప్రజలను విభజించేందుకు కుయుక్తులు పన్నుతున్నదని బిఆర్‌ఎస్‌ జాతీయ అధ్యక్షులు, ముఖ్యమ్రంతి కల్వకుంట్ల చంద్రశేఖర్‌రావు విమర్శించారు. విభిన్న ప్రాంతాలు, జాతులు, మతాలు, ఆచార వ్యవహారాలు, సంస్కృతులు కలిగి.. భిన్నత్వంలో ఏకత్వాన్ని చాటుతూ ప్రపంచానికి ఆదర్శంగా నిలిచిన భారత ప్రజల ఐక్యతను చీల్చేందుకు కేంద్ర ప్రభుత్వం తీసుకునే నిర్ద్వంద్వంగా తిరస్కరిస్తామని, అందు లో భాగంగానే ఉమ్మడి పౌరస్మృతి (యుసిసి) బిల్లును వ్యతిరేకిస్తున్నామని స్పష్టం చేశారు. యుసిసి బిల్లుతో దేశంలో ప్రత్యేక సంస్కతి కలిగిన గిరిజనులు, పలు మతాలు. జాతులు, ప్రాంతాలతో పాటుగా హిందూ మతాన్ని ఆచరించే ప్రజలూ అయోమయానికి లోనవుతున్నారని అన్నారు. దేశ ప్రజల అస్థిత్వానికి వారి తరతరాల సాంప్రదాయ సాంస్కృతిక ఆచార వ్యవహారాలకు గొడ్డలిపెట్టుగా మారిన.. బిజెపి కేంద్ర ప్రభుత్వం అమలు చేయాలనుకుంటున్న యుసిసి బిల్లును వ్యతిరేకించాలని, తద్వా రా దేశ ఐక్యతకు పాటు పడాలని
కోరుతూ… సోమవారం నాడు ఆల్‌ ఇండియా ముస్లిం పర్సనల్‌ లా బోర్డు అధ్యక్షులు ఖాలీద్‌ సయీఫుల్లా రెహ్మాని ఆధ్వర్యంలో బోర్డు కార్యవర్గం ప్రగతి భవన్‌లో ముఖ్యమంత్రి కె.చంద్రశేఖర్‌ రావుతో సమావేశమయ్యింది. ఈ సమావేశంలో ఎఐఎంఐఎం పార్టీ అధ్యక్షులు, ఎంపి అసదుద్దీన్‌ ఒవైసీ, ఎంఎల్‌ఎ అక్భరుద్దీన్‌, మంత్రులు మహమూద్‌ అలీ, కెటిఆర్‌, బోర్డు కార్యవర్గ సభ్యలు, తదితరులు పాల్గొన్నారు. సందర్భంగా సిఎం కెసిఆర్‌ మాట్లాడుతూ ప్రభుత్వం అమలు చేయాలనుకుంటున్న యుసిసి నిర్ణయం దురుద్దేశంతో కూడుకున్నదని స్పష్టమౌతున్నది. దేశంలో ఎన్నో పరిష్కరించాల్సిన సమస్యలు ఉన్నా పట్టించుకోకుండా గత తొమ్మిదేండ్లుగా దేశ ప్రజల అభివృద్ధిని ప్రజాసంక్షేమాన్ని విస్మరించింది ప్రభుత్వం దేశంలో పనులేమీ లేనట్టు.. ప్రజలను రెచ్చగొట్టి అనవసరమైన గొడవలు పెట్టి రాజకీయ పబ్బం గడుపుకునేందుకే యుసిసి అంటూ మరోసారి విభజన రాజకీయాలకు పాల్పడుతున్నది. అందుకే బిజెపి తీసుకోవాలనుకుంటున్న యుసిసి బిల్లును తీవ్రంగా వ్యతిరేకిస్తున్నాం’ అని సిఎం కెసిఆర్‌ పునరుద్ఘాటించారు. ఇందుకు సంబంధించిన బిల్లును రాబోయే పార్లమెంటు సమావేశాల్లో వ్యతిరేకిస్తుందని సిఎం స్పష్టం చేశారు. అంతే కాకుండా భావ సారూప్యత కలిగిన పార్టీలను కలుపుకుపోతూ యుసిసి బిల్లుపై పోరాడుతామని సిఎం స్పష్టం చేశారు. ఇందుకు సంబంధించి పార్లమెంటు ఉభయ సభల్లో చేపట్టే కార్యాచరణకు రంగం సిద్ధం చేసుకోవాలని బిఆర్‌ఎస్‌ పార్లమెంటరీ పార్టీ నేత డాక్టర్‌ కె.కేశవరావు, లోక్‌ సభ పక్ష నాయకులు నామా నాగేశ్వర్‌ రావులకు సిఎం కెసిఆర్‌ దిశానిర్దేశం చేశారు.కాగా, మతాలకు ప్రాంతాలకు అతీతంగా, దేశ ప్రజల సంస్కృతీ సాంప్రదాయాలను కాపాడాలని, దేశంలోని గంగ జమునా తహజీబ్‌ ను రక్షించేందుకు ముందుకు రావాలని, తమ అభ్యర్ధనను అర్థం చేసుకుని, ఉమ్మడి పౌరస్మృతి నిర్ణయాన్ని తీవ్రంగా వ్యతిరేకించినందుకు సిఎం కెసిఆర్‌కు ఆల్‌ ఇండియా ముస్లిం పర్సనల్‌ లా బోర్డు కార్యవర్గం ధన్యవాదాలు తెలిపింది.
అన్ని వర్గాలకు నష్టమే : అసదుద్దీన్‌ ఓవైసీ
ఉమ్మడి పౌరస్మృతి వస్తే అన్ని వర్గాలకూ నష్టం జరుగుతుందని అసదుద్దీన్‌ ఓవైసీ అన్నారు. సిఎంతో సమావేశంల అనంతరం ఆయన మీడియాతో మాట్లాడుతూ భారతదేశం అంటేనే భిన్నతంంలో ఏకత్వానికి ప్రతీక అని , దాదాపు అన్నీ రాష్ట్రాలలో కోట్ల సంఖ్యలో గిరిజనులు ఉన్నారని, యుసిసి వల్ల వారందరికీ కొన్ని ఇబ్బందులు వస్తాయన్నారు. హిందూ వివాహ చట్టము కూడా రద్దవుతుందన్నారు. యుసిసి ప్రజాస్వామ్యానికి మంచిది కాద సిఎంతో చెప్పామని, గత పదేళ్లుగా తెలంగాణ ప్రశాంతంగా ఉన్నదన్నారు. ఈ బిల్లు ముస్లింలతో పాటు ఎవరికీ మంచిది కాదని చెప్పారు. ప్రధాని మోడీకి లౌకికవాదం అంటే పడదన్నారు. యుసిసి బిల్లును తప్పక వ్యతిరేకిస్తామని సిఎం కెసిఆర్‌ హామీ ఇచ్చారని వెల్లడించారు. భావసారూప్యత కలిగిన పార్టీలతో చర్చిస్తామని కెసిఆర్‌ చెప్పారని, ఈ బిల్లును వ్యతిరేకించాలని ఎపి సిఎంను కూడా కోరుతామని ఓవైసీ తెలిపారు. యుసిసికి వ్యతిరేకంగా అన్ని పార్టీల మద్దతు కూడగడతామని, అన్ని రాష్ట్రాల ముఖ్యమంత్రులు , పార్టీ అధినేతలను కలుస్తామని వివరించారు.
