ప్రజాపక్షం / హైదరాబాద్‌ : యువతకు రైలు టికెట్లపై 50 శాతం రాయితీ ఇవ్వనున్నట్లు కేంద్ర రైల్వే మంత్రిత్వ శాఖ ప్రకటించింది. ’ఏక్‌ భారత్‌ శ్రేష్ఠ భారత్‌’ పేరుతో కొత్త కార్యక్రమాన్ని ప్రారంభించింది. ఒక రాష్ట్రం నుంచి మరో రాష్ట్రానికి ప్రయాణించే యువతీయువకులకు రైలు టికెట్ల ప్రాధమిక చార్జీపై 50 శాతం రాయితీని ప్రకటించింది. రైల్వే మంత్రిత్వ శాఖ ప్రకటించిన వివరాల ప్రకారం నెలకు రూ.5 వేల కంటే తక్కువ సంపాదిస్తున్నవారికి మాత్రమే ఈ రాయితీ వర్తిస్తుంది. సెకండ్‌ క్లాస్‌, స్లీపర్‌ క్లాస్‌ రైలు టికెట్లపై ఈ రాయితీని ఉపయోగించుకోవచ్చు. అది కూడా సాధారణ రైలు సర్వీసులకు మాత్రమే ఈ పథకం వర్తిస్తుంది. ప్రత్యేక రైళ్లు, ప్రత్యేక కోచ్‌లకు ఈ రాయితీ వర్తించదు. ఒక స్టేషన్‌ నుంచి మరో స్టేషన్‌కు 300 కిలోమీటర్లపైన సెకండ్‌, స్లీపర్‌ క్లాస్‌ మెయిల్‌, ఎక్స్‌ప్రెస్‌ రైళ్లల్లో ప్రయాణించే వారికి రాయితీతో టికెట్లను ఆఫర్‌ చేయనుంది. రాయితీ కేవలం బేసిక్‌ ఫ్పేన మాత్రమే. రిజర్వేషన్‌ ఛార్జీలు, ఇతర ఛార్జీలు యథాతథంగా ఉంటాయి. వివిధ రాష్ట్రాలకు చెందిన మానవ వనరుల అభివృద్ధి శాఖ సెక్రెటరీ నుంచి సూచించిన ఫార్మాట్‌లో సర్టిఫికెట్‌ పొందిన వారు మాత్రమే రాయితీపై టికెట్లను పొందొచ్చు. ఆ సర్టిఫికెట్‌ను చీఫ్‌ కమర్షియల్‌ మేనేజర్‌, డివిజనల్‌ కమర్షియల్‌ మేనేజర్‌ లాంటి రైల్వే అధికారులకు సమర్పించాలి. ఆ తర్వాత రాయితీ కల్పిస్తూ ఆదేశాలు వస్తాయి. ఆ తర్వాత రైళ్లల్లో రాయితీపై టికెట్లు తీసుకోవచ్చు. అయితే కేంద్ర, రాష్ట్ర ప్రభుత్వాలు, స్థానిక సంస్థలు, చట్టబద్ధమైన సంస్థలు, కార్పొరేషన్లు, ప్రభుత్వ పరిధిలోని విశ్వవిద్యాలయాల రవాణా ఖర్చులతో ప్రయాణించేవారికి ఈ రాయితీ వర్తించదని రైల్వే స్పష్టం చేసింది.
యువతకు రైలు టికెట్లపై 50 శాతం తగ్గింపు
RELATED ARTICLES
