మోడీ సర్కార్‌ వల్ల తెలంగాణకు రూ.3లక్షల కోట్లు నష్టం

కేంద్రం సహకరించి ఉంటే రాష్ట్ర జిఎస్‌డిపి పెరిగేది
కృష్ణా జలాల్లో వాటా తేల్చేందుకు ఎనిమిదేళ్లు సరిపోదా?
ప్రశ్నించిన ప్రభుత్వాన్ని పడగొట్టడమే మోడీ విధానమా?
మహబూబ్‌నగర్‌ బహిరంగసభలో కేంద్ర సర్కార్‌పై సిఎం కెసిఆర్‌ ఆగ్రహం
ప్రజాపక్షం/మహబూబ్‌నగర్‌ ప్రతినిధి నరేంద్ర మోడీ సర్కారు వల్ల తెలంగాణ రాష్ట్రం రూ.3 లక్షల కోట్లు నష్టపోయిందని, కేంద్ర ప్రభుత్వం సహకరించి ఉంటే తెలంగాణ జిఎస్‌డిపి ఇంకా పెరిగి ఉండేదని ముఖ్యమంత్రి కె. చంద్రశేఖర్‌రావు అన్నారు. కృష్ణా జలాల్లో వాటా తేల్చేందుకు మోడీకి ఎనిమిదేళ్లు కూడా సరిపోలేదా? వాటా తేల్చేందుకు 8 ఏళ్లు సరిపోకపోతే అనుమతులు ఇచ్చేది ఎప్పుడు అని ప్రశ్నించారు. ప్రజాస్వామ్య బద్ధంగా ఏర్పడిన ప్రభుత్వానికి ఆటంకాలు సృష్టిస్తున్నారని మండిపడ్డారు. ప్రశ్నించిన ప్రభుత్వాన్ని పడగొట్టడమే మోడీ విధానమా? అని నిలదీశారు. ఆదివారం మహబూబ్‌నగర్‌లోని ఎంవిఎస్‌ కళాశాల మైదానంలో ఏర్పాటు చేసిన బహిరంగ సభలో సిఎం కెసిఆర్‌ మాట్లాడారు. కేంద్ర ప్రభుత్వ విధానాలపై ధ్వజమెత్తారు. జాతీయ రాజకీయాల్లో చురుకైన పాత్ర పోషిద్దామని పాలమూరు ప్రజలకు పిలుపునిచ్చారు. మహబూబ్‌ నగర్‌ ఎంపిగా ఉన్నప్పుడే తెలంగాణ సాధించుకున్నామని, అదే స్ఫూర్తితో జాతీయ రాజకీయాల్లో ముందుకెళ్తామన్నారు. ‘నేను మీతో ఉంటా.. మీరు నాతో ఉండాలి. మీరు హామీ ఇస్తే జాతీయ రాజకీయాల్లోకి వెళ్తాం. తెలంగాణ వలే భారత్‌ను కూడా అభివృద్ధి చేసుకుందాం. జాతీయ రాజకీయాల్లో బిఆర్‌ఎస్‌ చురుకైన పాత్ర పోషించాలి’ అని కెసిఆర్‌ అన్నారు. ‘సమైక్య పాలకులు మనల్ని నిరాదరణకు గురి చేశారు. వలసలతో వలవలపించేను పాలమూరు అనే పాట ఉండేది. కానీ, ఇప్పుడు పాలమూరు అంటే పచ్చబడ్డ జిల్లా అంటున్నారు. పోరాటాలు చేసిన సాధించుకున్న తెలంగాణలో అద్భుతమైన పథకాలు అమలు చేస్తున్నాం. మహబూబ్‌నగర్‌ జిల్లా ఇప్పుడు ఐటి, పారిశ్రామిక హబ్‌గా మారుతోంది. పాలమూరు- ప్రాజెక్టు ఒక్కటే పూర్తి కావాల్సి ఉంది. ఈ ప్రాజెక్టుకు కేంద్రం సహకరించటం లేదు. సంక్షేమంలో మనకు ఎవరూ సాటి లేరు.. పోటీ లేరు. ప్రతి వర్గానికి ఒక కార్యక్రమం చేపట్టి ఆదుకుంటున్నాం. మహబూబ్‌నగరుకు క్రీడా మైదానం, ఆడిటోరియం మంజూరు చేస్తాం. తెలంగాణ వస్తే బ్రహ్మాండంగా బాగుపడుతుందని 20 ఏళ్ల క్రితమే చెప్పాను. కర్ణాటక, మహారాష్ట్ర సరిహద్దుల్లోని ప్రజలు తెలంగాణలో కలపాలని కోరుతున్నారు. గతంలో రూ.50వేలు ఇచ్చే ఆపద్బంధు కోసం కాళ్లు అరిగేలా తిరిగే పరిస్థితి ఉండేది. కానీ, ఇప్పుడు రైతు ఏ కారణంతో చనిపోయినా.. రైతు బీమా కింద రూ.5 లక్షలు వస్తున్నాయి. మహబూబ్‌ నగర్‌ జిల్లాకు వైద్య కళాశాలలు వస్తాయని ఎప్పుడైనా అనుకున్నామా? రాత్రింబవళ్లు కష్టపడితేనే తెలంగాణ రాష్ట్రం ఇంత ప్రగతి సాధించింది. మేధావులు, చదువుకున్న యువత సరిగా ఆలోచించాలి. ఇంటి నిర్మాణానికి ఆర్థిక సాయం పథకాన్ని త్వరలో ప్రారంభిస్తాం. స్థలం ఉండి ఇల్లు కట్టుకోలేని పేదలకు రూ.3లక్షల చొప్పున మంజూరు చేస్తాం. నియోజకవర్గానికి వెయ్యి ఇళ్లు చొప్పున త్వరలోనే మంజూరు చేస్తాం అని సిఎం కెసిఆర్‌ ప్రకటించారు. దేశంలో ఏం జరుగుతుందో గ్రామాల్లో చర్చ జరగాలని, ప్రజలు, మేధావులు, యువత ఆలోచించాలన్నారు. ఐదేళ్లలో మిషన్‌ భగీరథ పూర్తి చేసి ప్రతి ఇంటికి నల్లా నీళ్లు ఇవ్వకపోతే వచ్చే ఎన్నికల్లో ఓటు అడగనని చెప్పానని, ఆవిధంగానే చేసి చూపించామని చెప్పారు. రాష్ట్రానికి బిజెపి నేతలు ఏమీ చేయరు,రని, చేసే వారి కాళ్లలో కట్టెలు పెడతారని ఎద్దేవా చేశారు. రైతు బంధు, రైతు బీమా, ఉచిత కరెంటు రాజకీయాల కోసం కాదని, తెలంగాణ రైతు దేశంలోనే గర్వంగా తలెత్తుకుని నిలబడాలని భావించడం వల్లే ఆ పథకాలు అమలు చేస్తున్నామన్నారు. కేంద్రాన్ని ప్రశ్నిస్తే ‘కెసిఆర్‌… నీ ప్రభుత్వాన్ని కూల్చేస్తాం‘ అని ప్రధాని మోడేయే అనడం విడ్డూరంగా ఉందన్నారు. ప్రశ్నించిన ప్రభుత్వాన్ని పడగొట్టడమే మోడీ విధానమా? అని నిలదీశారు. పశ్చిమ బెంగాల్‌లో మమతా బెనర్జీ పార్టీకి చెందిన 40మంది ఎంఎల్‌ఎలు తనతో టచ్‌లో ఉన్నారని సాక్షాత్తు దేశ ప్రధాని చెప్పడం ఏమిటని, ఎంఎల్‌ఎలను కొనుగోలు చేయడమే ప్రజాస్వామ్య విధానమా అని అన్నారు. తెలంగాణ ప్రభుత్వాన్ని పడగొట్టడానికి నలుగురు దొంగలు వస్తే.. వారిని పట్టుకుని జైల్లో పెట్టామని సిఎం కెసిఆర్‌ వెల్లడించారు. మహాసభలో మంత్రులు శ్రీనివాస్‌గౌడ్‌, నిరంజన్‌ రెడ్డి, ప్రశాంత్‌ రెడ్డి, మల్లారెడ్డి, ఎంఎల్‌ఎలు జైపాల్‌యాదవ్‌, లక్ష్మారెడ్డి, మర్రి జనార్ధన్‌రెడ్డి, ఆల వెంకటేశ్వర్‌ రెడ్డి, రాజేందర్‌రెడ్డి, అంజయ్య యాదవ్‌, అబ్రహం, బీరం హర్షవర్ధన్‌ రెడ్డి, ఎంఎల్‌సిలు కూచుకుళ్ల దామోదర్‌రెడ్డి, గోరటి వెంకన్న, కసిరెడ్డి నారాయణపేట, వాణిదేవిలు పాల్గొన్నారు.