మోడీ మద్దతు లేకుండా..అదానీ వ్యాపారమే లేదు!

కూపీలాగితే మోడీ, అమిత్‌ షా బయటకు వస్తారు
సిపిఐ జాతీయ కార్యదర్శి డాక్టర్‌ కె.నారాయణ
‘బిజెపి హఠావో – దేశ్‌ బచావో’ కరపత్రం విడుదల
ప్రజాపక్షం/హైదరాబాద్‌ నరేంద్ర మోడీ మద్దతు లేకుండా అదానీ వ్యాపారమే లేదని సిపిఐ జాతీయ కార్యదర్శి డాక్టర్‌ కె.నారాయణ అన్నారు. అదానీ బంగారు చిలుక అని, కూపీలాగితే మోడీ, అమిత్‌ షాలు బయటకు వస్తారని, అందుకే అదానీని ప్రధాని మోడీ రక్షించేందుకు ప్రయత్నిస్తున్నారని విమర్శించారు. సిపిఐ జాతీయ సమితి పిలుపు మేరకు ఈనెల 14 నుండి మే 15 వరకు నిర్వహించే ‘బిజెపి హఠావో – దేశ్‌ బచావో’ పాదయాత్ర కార్యక్రమానికి సంబంధించిన కరపత్రాన్ని సిపిఐ రాష్ట్ర కార్యదర్శి కూనంనేని సాంబశివరావు, రాష్ట్ర కార్యదర్శివర్గ సభ్యుడు ఇటి నర్సింహ, హైదరాబాద్‌ జిల్లా కార్యదర్శి ఎస్‌. ఛాయాదేవి, సహాయ కార్యదర్శులు కమ తం యాదగిరి, బి. స్టాలిన్‌, ఎఐటియుసి రాష్ట్ర కార్యదర్శి బి. వెంకటేశం, సిపిఐ జిల్లా కార్యవర్గ సభ్యులు జి. చంద్ర మోహన్‌ గౌడ్‌, పడాల నళిని, నిర్లేకంటి శ్రీకాంత్‌, ఆర్‌.మల్లేష్‌లతో కలిసి హైదరాబాద్‌ హిమాయత్‌నగర్‌, మఖ్దూంభవన్‌లో నారాయణ సోమవారం ఆవిష్కరించారు. ఈ సందర్భంగా నారాయణ మాట్లాడుతూ లాభాలను చూపించి, ప్రైవేటుపరం చేసేందుకే కేంద్ర ప్రభుత్వం వందేభారత్‌ రైలును తీసుకొచ్చిందని విమర్శించారు. ఒక వైపు ఎయిర్‌ ఇండియాను ప్రైవేటు పరం చేసి, మరోవైపు ప్రజా సొమ్ముతో వంద ఎయిర్‌పోర్ట్‌లను ఎవరి కోసం నిర్మిస్తున్నారని మోడీ ప్రభుత్వాన్ని నిలదీశారు. ఎయిర్‌పోర్ట్‌లను కూడా కార్పొరేట్లకు అప్పగించేందుకు ప్రయత్నిస్తున్నారని ధ్వజమెత్తారు. ‘బిజెపి హఠావో – దేశ్‌ బచావో ’ నినాదంతో ప్రజా క్షేత్రంలోనికి వెళ్లి కేంద్ర ప్రభుత్వ ప్రజా వ్యతిరేక, అప్రజస్వామిక విధానాలను ప్రజలకు తెలియజేస్తామని వెల్లడించారు. రూ.15 లక్షల కోట్ల ఆస్తులు కలిగిన బిఎస్‌ఎన్‌ఎల్‌ సంస్థకు కేవలం రూ.35 కోట్ల అప్పును కూడ కేంద్రం ఇవ్వలేదని విమర్శించారు. ప్రధాని పదవికి చదువుకు సంబంధం లేకపోయినా చదువుకున్న డిగ్రీ అంశంలో కూడా మోడీ అబద్ధాలు చెబుతూ అనైతికంగా వ్యవహరిస్తూ ప్రధాని స్థాయిని దిగజార్చుకున్నారని మండిపడ్డారు.
రాష్ట్రానికి కేంద్రం ఎంతిచ్చిందో బిజెపి చర్చకు రావాలి : కూనంనేని సవాల్‌
దెయ్యాలు వేదాలు వల్లించినట్టుగా ప్రధాని మోడీ అవినీతి గురించి మాట్లాడుతున్నారని సిపిఐ రాష్ట్ర కార్యదర్శి కూనంనేని సాంబశివరావు ఎద్దేవా చేశారు. దేశాన్ని సర్వనాశనం చేసే మోడీ bంటి విపత్కర మైన ప్రధానిని తాము ఎప్పడూ చూడలేదన్నారు. తెలంగాణ రాష్ట్రానికి కేంద్ర ప్రభుత్వం ఇప్పటి వరకు ఎంత వరకు నిధుల సహాయం చేసింది?, రాష్ట్రం నుంచి పన్నుల రూపంలో ఎంత వరకు తీసుకున్నారో స్పష్టం చేయాలని, దీనిపై తాను ఎక్కడైనా, మీడియా సమక్షంలోనైనా చర్చకు సిద్ధమేనని బిజెపి నేతలకు కూనంనేని సవాల్‌ విసిరారు. కేంద్రం నుంచి తెలంగాణ రాష్ట్రానికి రూ.45వేల కోట్లు రావాల్సి ఉన్నదని, ఆర్థిక సంఘం సూచించినా కేంద్రం నిధులు ఇవ్వడం లేదని ధ్వజమెత్తారు. చట్ట ప్రకారం రాష్ట్రానికి రావాల్సిన నిధులు, కాజీపేట కోచ్‌ ఫ్యాక్టరీ, ఐఐఎం, ఐఐఐటి రాలేదన్నారు. విశాఖ స్టీల్‌ ప్రభుత్వ రంగ సంస్థను కాపాడుకునేందుకు సిపిఐ ఎంఎల్‌ఎలు రాజీనామా చేసిన విషయాన్ని గుర్తు చేశారు. ఈ సంస్థను ప్రైవేటుపరం చేసేందుకు మోడీ ప్రభుత్వ ప్రయత్నించడం అన్యాయమని ద్వజమెత్తారు. 14న హైదరాబాద్‌లో ప్రారంభంః ఇంటింటికి సిపిఐ కార్యక్రమాన్ని హైదరాబాద్‌, ట్యాంక్‌ బండ్‌, బాబా సాహెబ్‌ అంబేడ్కర్‌ విగ్రహం వద్ద సిపిఐ జాతీయ కార్యదర్శి డాక్టర్‌ కె.నారాయణ ప్రారంభిస్తారని కూనంనేని తెలిపారు. ఈ యాత్ర రాష్ట్ర వ్యాపితంగా సాగుతుందని, అలాగే హైదరాబాద్‌ జిల్లా పరిధిలోని 15 నియజకవర్గాల్లో పాదయాత్రగా ప్రజలకు వద్దకు వెళ్తారని తెలిపారు. కేంద్ర ప్రభుత్వ అవినీతిని, ప్రజా వ్యతిరేక విధానాలను, తెలంగాణ రాష్ట్రం పట్ల నిర్లక్షాయన్ని ప్రజలకు వివరిస్తామని, క్షేత్రస్థాయిలో ప్రజలను చైతన్యపరుస్తామని తెలిపారు. ఈ యాత్రలో వేలాది మంది సిపిఐ శ్రేణులు ఎక్కడికక్కడ పాల్గొంటారని తెలిపారు. ఇటి నర్సింహ మాట్లాడుతూ ‘వందేభారత్‌ రైలు’ భాగ్యలక్ష్మినగర్‌ నుంచి వెంటేశ్వరనగర్‌ వరకు వెళ్తుందని మోడీ ప్రకటించారని, కానీ భాగ్యలక్ష్మి ఆలయం సమీపంలో కూడా రైల్వేస్టేషన్‌ లేదని, రైలును కూడా మతోన్మాదానికి వాడుకుంటున్నారని మండిపడ్డారు. నెల రోజుల పాటు జరిగే తమ పాదయాత్రలో మతోన్మాద బిజెపి, ఎంఐఎం పార్టీల వైఖరిని, వ్యవహార శైలిని ప్రజలకు వివరిస్తామని తెలిపారు.