మైసూరులో ‘దసరా క్రీడల’ను ప్రారంభించిన స్టార్‌ షట్లర్‌ సింధు

బెంగళూరు: భారత బ్యాడ్మింటన్‌ క్రీడాకారిణి పీవీ సింధుకు అరుదైన గౌరవం లభించింది. దేశంలోనే దసరా ఉత్సవాలకు ప్రఖ్యాతి గాంచిన మైసూరులో ‘దసరా యువ క్రీడల’ ప్రారంభోత్సవానికి ఆ రాష్ట్ర ముఖ్యమంత్రి యడియూరప్పతో కలసి పోటీల ప్రారంభోత్సవానికి హాజరయ్యారు. కర్ణాటక దసరా ఉత్సవాలతో పాటు, దసరా యువ క్రీడలను ప్రారంభించాల్సిందిగా సింధును ఆ రాష్ట్ర సీఎం యడియూరప్ప కొద్ది రోజుల కిందట ఆహ్వానించిన విషయం తెలిసిందే. ఇందులో భాగంగా నేడు మైసూరు చేరుకున్న పీవీ సింధు సీఎం యడియూరప్పతో కలసి దసరా యువ క్రీడలను ప్రారంభించారు. ఈ సందర్భంగా బ్యాడ్మింటన్‌ ప్రపంచ ఛాంపియన్‌షిప్‌ విజేత సింధును యడియూరప్ప సన్మానించారు. గత ఆగస్టులో జరిగిన బ్యాడ్మింటన్‌ ప్రపంచ ఛాంపియన్‌షిప్‌లో సింధు బంగారు పతకం సాధించిన విషయం తెలిసిందే. జపాన్‌కు చెందిన నోజోమి ఒకుహరను 21–7, 21–7 తేడాతో ఓడించింది.