మేడిగడ్డకు ఎందుకు వెళుతున్నారో సమాధానం చెప్పండి

బిఆర్‌ఎస్‌ను ప్రశ్నించిన సిపిఐ రాష్ట్ర కార్యదర్శి, ఎమ్మెల్యే కూనంనేని
మతం పేరుతో బిజెపి బతుకుతోంది
ఇండియా కూటమిని కాంగ్రెస్‌ కాపాడుకోవాలని సూచన
ప్రజాపక్షం/హన్మకొండ ప్రతినిధి
టిఆర్‌ఎస్‌ ప్రభుత్వ హయాంలోనే నిర్మించిన మేడిగడ్డ కుంగిందని, అన్నారం బ్యారేజీలో పగుళ్లు ఏర్పడ్డాయని, పైగా మేడిగడ్డను బొందలగడ్డ అని మాజీ ముఖ్యమంత్రి కెసిఆర్‌ వ్యాఖ్యలు చేశారని, అలాంటి బొందలగడ్డకు ఎందుకు వెళ్తున్నారని సిపిఐ రాష్ట్ర కార్యదర్శి, కొత్తగూడెం ఎంఎల్‌ఎ కూనంనేని సాంబశివరావు ప్రశ్నించారు. గురువారం హనుమకొండ బాల సముద్రంలోని సిపిఐ జిల్లా కార్యాలయంలో ఏర్పాటు చేసిన విలేకరుల సమావేశంలో ఆయన మాట్లాడారు. కాళేశ్వరం ప్రాజెక్టుపై నిపుణులు ఏది చెబితే అది చేయడానికి ప్రభుత్వం సిద్ధంగా ఉందని సిఎం, మంత్రులు చెప్పార ని, నిపుణులు త్వరగా తేల్చితే పరిష్కారం దొరుకుతుందని అన్నారు. కాళేశ్వరం ప్రాజెక్టు నిర్మాణంలోనే లోపాలు ఉన్నాయని స్వయంగా కాగ్‌ రిపోర్టులో అనేక లోపాలు ఎత్తి చూపారని చెప్పారు. ప్రజాధనాన్ని దుర్వినియోగం చేసిన బిఆర్‌ఎస్‌… ప్రజలకు ఏ సమాధానం చెబుతారని ప్రశ్నించారు. తుమ్మిడిహెట్టి వద్ద రూ. 28వేల కోట్లతో ప్రాజెక్టు నిర్మిస్తే గ్రావిటి ద్వారా 16 లక్షల ఎకరాలకు నీరందేదని, నేడు రూ. 93వేల కోట్లతో కాళేశ్వరం నిర్మించినా సాధించిందేమిటని ప్రశ్నించారు. కెటిఆర్‌, హరీశ్‌రావు అధికారం లేకపోయే సరికి చిన్నపిల్లల మాదిరిగా మాట్లాడుతున్నారని ఎద్దేవా చేశారు. రాష్ట్రం లో అసెంబ్లీ ఎన్నికల్లో కాంగ్రెస్‌తో సిపిఐ కలవడం వల్లనే మంచి ఫలితాలు వచ్చాయని, కమ్యూనిస్టులు బలంగా ఉన్న చోట ఎక్కువ స్థానాలు గెలిచారని, రానున్న పార్లమెంటు ఎన్నికల్లో ఇండియా కూటమిని కాపాడుకునే బాధ్యత కాంగ్రెస్‌దేనన్నారు. రాష్ట్రంలో సిపిఐకి ఒక పార్లమెంట్‌ స్థానం ఇవ్వాలని తాము కోరుతున్నామని, పార్లమెంట్‌లోనూ తమ గొంతు వినిపించేందుకు ఎంపి స్థానాన్ని ఇవ్వాలని డిమాండ్‌ చేశారు. ఇండియా కూటమిని కాంగ్రెస్‌ కాపాడుకుంటేనే దేశానికి భవిష్యుత్తు ఉంటుందని పేర్కొన్నారు. గడిచిన సింగరేణి ఎన్నికల్లో ఎఐటియుసి గెలవడంతో పాటు ఆర్‌టిసి, బ్యాంకు తదితర అనేక రంగాల్లో బలంగా ఉన్నామని స్పష్టం చేశారు. కాగా మతం పేరు చెప్పుకొని బిజెపి బతుకుతోందని కూనంనేని సాంబశివరావు అన్నారు. కేంద్రంలోని నరేంద్రమోడీ ప్రభుత్వం ఎన్నికల్లో ఇచ్చిన హామీలైన ఏటా రెండుకోట్ల ఉద్యోగాలు, ప్రతీ ఒక్కరి ఖాతాలో రూ.15 లక్షలు జమ చేయడం లాంటివి నెరవేర్చకుండా ప్రజలకు అబద్ధాలు చెప్పి భావోద్వేగాలను రెచ్చగొట్టి తిరిగి అధికారంలోకి రావాలని చూస్తుందని, ప్రజలు ఈసారి వారికి తగిన గుణపాఠం చెబుతారని అన్నారు. బిజెపి మతతత్వ విధానాలతో రాముడి పేరు చెప్పి రాజకీయాలు చేస్తుందని, ఐదు వేల ఏళ్ల కిత్రమే రాముని చరిత్ర ఉందని, కొత్తగా బిజెపి సాధించిందేమి లేదన్నారు. అబద్ధాలు, భావోద్వేగాలు పని చేయవని, కాషాయ పార్టీని వచ్చే ఎన్నికల్లో బొంద పెట్టాలన్నారు. ఈ సమావేశంలో సిపిఐ రాష్ట్రకార్యదర్శి వర్గ సభ్యులు తక్కళ్లపల్లి శ్రీనివాసరావు, రాష్ట్ర కార్యవర్గ సభ్యులు బి.విజయసారథి, నేదునూరి జ్యోతి, రాష్ట్ర సమితి సభ్యులు పంజాల రమేశ్‌, ఆదరి శ్రీనివాస్‌, మండ సదాలక్ష్మి, నాయకులు సిరబోయిన కర్ణాకర్‌, జిల్లా సహాయ కార్యదర్శులు తోట బిక్షపతి, మద్దెల ఎల్లేశ్‌, షేక్‌ బాస్‌మియా, నాయకులు బుస్సారవిందర్‌, కర్రె లక్ష్మణ్‌, రాములు, కొట్టెపాక రవి, బాషబోయిన సంతోష్‌,ల్యాదెళ్ల శరత్‌,శ్యామ్‌ సుందర్‌రెడ్డి తదితరులు పాల్గొన్నారు.