మూగ‌బోయిన మైకులు

హైదరాబాద్‌:  తెలంగాణ‌లో ఎన్నిక‌ల ప్ర‌చారం ముగిసింది. ఓట‌రు దేవుళ్ల‌ను ప్ర‌స‌న్నం చేసుకునేందుకు నేత‌లు హోరాహోరీగా ప్ర‌చారం నిర్వ‌హించారు. బుధ‌వారం సాయంత్రం 5 గంట‌ల‌కు ప్ర‌చారం ముగిసింది. మైకులు మూగ‌బోయాయి. మావోయిస్టు ప్రభావిత ప్రాంతాల్లో ఈ సాయంత్రం 4గంటలకే ఎన్నికల ప్రచారం ముగిసింది. హామీల అమ‌లులో టిఆర్‌ఎస్ విఫ‌ల‌మైంద‌ని ప్ర‌జాఫ్రంట్.. నాలుగున్న‌రేళ్ల‌లో రాష్ట్రాన్ని ఎంతో అభివృద్ధి చేశామ‌ని టిఆర్‌ఎస్… మార్పు కోసం మ‌మ్మ‌ల్ని గెలిపించ‌డంటూ బిజెపి.. హోరాహోరీగా ప్ర‌చారం నిర్వ‌హించారు. అన్ని జాతీయ పార్టీల నాయ‌కులు ప్ర‌చారంలో పాల్గొన్నారు. డిసెంబ‌ర్ 7న 119 నియోజకవర్గాల్లో ఉదయం 7గంటల నుంచి సాయంత్రం 5గంటల వరకు పోలింగ్‌ జరగనుంది. ఈ ఎన్నికల బరిలో మొత్తం 1821 మంది అభ్యర్థులు బరిలో ఉన్నారు. రాష్ట్రవ్యాప్తంగా 32815 పోలింగ్‌ కేంద్రాలను ఏర్పాటు చేశారు. అత్యధికంగా హైదరాబాద్‌లో 3873, వనపర్తిలో 280 పోలింగ్‌కేంద్రాలు ఏర్పాటు చేశారు. ఎన్నికల విధుల కోసం 1,60,509 మంది సిబ్బందిని కేటాయించారు. ఎన్నికల కోసం 55,329 బ్యాలెట్‌ యూనిట్లు, 42,751 వీవీప్యాట్‌ యంత్రాలు, 39,763 కంట్రోల్‌ యూనిట్లను వినియోగించనున్నారు. ఎన్నికల విధుల్లో 649 మంది సహాయక రిటర్నింగ్‌ అధికారులు ఉంటారు. రాష్ట్ర వ్యాప్తంగా మొత్తం 2,80,64,684 మంది ఓటర్లు తమ ఓటు హక్కును వినియోగించుకోనున్నారు. ఈ ఎన్నికల ఫలితాలు ఈ నెల 11న వెల్లడికానున్నాయి.