మార్పులు అవసరం

రెండో టెస్టుకు టీమిండియా కసరత్తు
వెల్లింగ్టన్‌ : న్యూజిలాండ్‌ పర్యటనలో భారత్‌ మరో క్లీన్‌స్వీప్‌ ప్రమాదం ముంగిట నిలిచింది. ఇంతకుముందు మూడు వన్డేల సిరీస్‌ను 0-3తో కోల్పోయిన కోహ్లీసేన.. రెండు టెస్టుల సిరీస్‌లో తొలి మ్యాచ్‌ ఓడిపోయి 0-1తో వెనుకంజలో నిలిచింది. దీంతో అందరి దృష్టి ఈ నెల 29 నుంచి ప్రారంభమయ్యే రెండో టెస్టుపైనే నిలిచింది. క్రైస్ట్‌చర్చ్‌లో ప్రారంభమయ్యే ఈ టెస్టులో భారత్‌ నెగ్గాల్సిన అవసరముంది. లేకపోతే బ్లాక్‌ క్యాప్స్‌ చేతిలో మరో వైట్‌వాష్‌కు గురవుతుంది. ఇక టీమిండియ తొలి టెస్టులో ఓటమి అనంతరం సోషల్‌ మీడియా వేదికగా ఫ్యాన్స్‌ విరుచుకుపడ్డారు. వారిని శాంతింప చేయాలంటే రెండోటెస్టులో సత్తా చాటాల్సిన స్థితిలో భారత్‌ నిలిచింది. ఈక్రమంలో టీమిండియాలో మార్పులు తప్పనిసరిగా చేయాలని విశ్లేషకులు సూచిస్తున్నారు. నిజానికి ఈ పర్యటనలో తొలుత జరిగిన ఐదు టీ20ల సిరీస్‌లో భారత్‌ శుభారంభం చేసింది. ఐదు మ్యాచ్‌లను నెగ్గి 5-0తో ఆతిథ్యజట్టును క్లీన్‌స్వీప్‌ చేసింది. అయితే ఆ తర్వాతే కథ అడ్డం తిరిగింది. సూపర్‌ ఫామ్‌లో ఉన్న రోహిత్‌ శర్మ గాయంతో జట్టుకు దూరమయ్యాడు. ఆ తర్వాత నుంచి భారత్‌కు గెలుపు అందని ద్రాక్షగా మారింది. వరుసగా మూడు వన్డేలు ఓడిపోయిన టీమిండియా.. వెల్లింగ్టన్‌లో జరిగిన తొలి టెస్టులో ఏకంగా పది వికెట్లతో చిత్తుగా ఓడిపోయింది. ఈక్రమంలో భారత జట్టులో మూడు ప్రధాన మార్పులు చేయాలని నిపుణలు సూచిస్తున్నారు.
బాటింగ్‌లో మార్పులు తప్పవా?
రోహిత్‌ స్థానంలో టీమిండియాలో చోటు దక్కించుకున్న పృథ్వీ షా.. ఈ టూర్‌లో తనదైన ముద్ర వేయలేకపోయాడు. మూడు వన్డేల సిరీస్‌లో తేలిపోయిన షా.. ఆ తర్వాత జరిగిన ప్రాక్టీస్‌ మ్యాచ్‌తోపాటు తొలి టెస్టులోనూ విఫలమయ్యాడు. దీంతో ఇతని స్థానంలో సూపర్‌ ఫామ్‌లో ఉన్న శుబ్‌మాన్‌ గిల్‌ను జట్టులోకి తీసుకోవాలని అంతటా డిమాండ్లు విన్పిస్తున్నారు. ఇటీవలే జరిగిన న్యూజిలా్‌ండఎ,ఇండియా-ఎ మధ్య జరిగిన అనధికార టెస్టు సిరీస్‌లో ఆడిన గిల్‌ పరుగుల వరద పారించాడు. అన్నీ అనుకున్నట్లు జరిగితే రెండోటెస్టులో గిల్‌ అరంగేట్రం ఖాయమని విశ్లేషకులు పేర్కొంటున్నారు. వెన్నుగాయం నుంచి కోలుకుని పునరాగమనం చేసిన తర్వాత భారత పేసర్‌ జస్‌ప్రీత్‌ బుమ్రా అనుకున్న స్థాయిలో ఆకట్టుకోవడం లేదన్నది నిర్వివాదాంశం.
బౌలింగ్‌ విభాగం..
ఒక ఎండ్‌లో ఇషాంత్‌ శర్మ, మహ్మద్‌ షమీ రెగ్యులర్‌గా వికెట్లు తీస్తుండగా.. బుమ్రా మాత్రం తత్తరపడ్డాడు. భారత ప్రధాన పేసరైన తనకు కాస్త విరామమిస్తే తను పాత లయను దొరకబుచ్చుకునే అవకాశముందని విశ్లేషకులు సూచిస్తున్నారు. ఇక ఇటీవల వైట్‌బాల్‌ క్రికెట్లో రాణిస్తున్న నవదీప్‌ సైనీని రెండో టెస్టులో ఆడించాలని పేర్కొంటున్నారు. దీంతో తనకు అనుభవం రావడంతోపాటు అతన సత్తాను నిరూపించుకునే అవకాశమిచ్చినట్లు అవుతుందని విశ్లేషకులు సూచిస్తున్నారు. ఏదేమైనా రెండోటెస్టుకు ముందు తీవ్ర ఒత్తిడిలో ఉన్న భారత్‌.. ఎలాంటి వ్యూహాలతో బరిలోకి దిగుతుందో చూడాలి. తొలి టెస్టులో భారత ఓటమికి టీమిండియా లోయర్‌ ఆర్డర్‌ వైఫల్యం కూడా ఒక కారణంగా చెప్పుకోవచ్చు. అంతగా బ్యాటింగ్‌ రాని కివీస్‌ టెయిలెండర్లు జేమీసన్‌, ట్రెంట్‌ బౌల్ట్‌ అలవోకగా పరుగులు సాధించిన పిచ్‌పై.. భారత ఆఫ్‌ స్పిన్నర్‌ రవిచంద్రన్‌ అశ్విన్‌ తేలిపోయాడు. బౌలింగ్‌లో మూడు వికెట్లు తీసిన అశ్విన్‌.. బ్యాటింగ్‌లో కేవలం 4 పరుగులు మాత్రమే చేశాడు. ఈ నేపథ్యంలో భారత బ్యాటింగ్‌ను మరింత పటిష్టం చేసుకునేందుకు అశ్విన్‌ స్థానంలో రవీంద్ర జడేజాను తీసుకునే అవకాశముంది. ఆఫ్‌ స్పిన్నర్‌గా హనుమ విహారి సేవలు ఉపయోగించుకోవచ్చని విశ్లేషకులు సూచిస్తున్నారు.
భారత జట్టు స్వాడ్‌: విరాట్‌ కోహ్లీ (కెప్టెన్‌), మయాంక్‌ అగర్వాల్‌, పృథ్వీ షా, శుబ్‌మాన్‌ గిల్‌, చటేశ్వర్‌ పుజారా, అజింక్య రహానే, రిషబ్‌ పంత్‌, వృద్ధిమాన్‌ సాహా, హనుమ విహారి, రవిచంద్రన్‌ అశ్విన్‌, రవీంద్ర జడేజా, ఇషాంత్‌ శర్మ, మహ్మద్‌ షమీ, జస్‌ప్రీత్‌ బుమ్రా, నవదీప్‌ సైనీ, ఉమేశ్‌ యాదవ్‌.