‘మహా’ మహమ్మారి!

మహానగరిని వణికిస్తున్న కొవిడ్‌ 19
ఒక్కరోజే 546 కరోనా కేసులు
7000 దాటిన పాజిటివ్‌లు
200 దాటిన మరణాలు
ప్రజాపక్షం/హైదరాబాద్‌ తెలంగాణ రాష్ట్రంలో కరోనా వైరస్‌ రోజురోజుకీ ఉధృతమవుతోంది. ముఖ్యంగా మహానగరి (గ్రేటర్‌ హైదరాబాద్‌)లో ఈ వ్యాధి జనాన్ని వణికిస్తోంది. శనివారం కూడా రికార్డు స్థాయిలో పాజిటివ్‌ కేసులు నమోదయ్యాయి. ఈసారి ఒక్కరోజే ఏకంగా 546 కొవిడ్‌ 19 పాజిటివ్‌ కేసులు నమోదయ్యాయి. 24 గంటల్లో ఈ స్థాయిలో కేసులు నమోదు కావడం ఇదే రికార్డు. కేసులు ఏడువేలు దాటగా, మరణాల సంఖ్య రెండు వందల మార్కు దాటింది. కొత్తగా మరో ఐదుగురు ప్రాణాలు కోల్పోయారు. దీంతో మొత్తం కరోనా మరణాల సంఖ్య 203కి చేరింది. శనివారం నమోదైన 546 కేసుల్లో జిహెచ్‌ఎంసి పరిధిలోనే 458 పాజిటివ్‌లను గుర్తించారు. గ్రేటర్‌ హైదరాబాద్‌ కాకుండా దాన్ని ఆనుకొని వున్న రంగారెడ్డి జిల్లాలో కొత్తగా 50 కేసులు నమోదయ్యాయి. ఇక మేడ్చల్‌ మల్కాజ్‌గిరి జిల్లాలో కొత్తగా 6 కేసులు నమోదు అయ్యాయి. ఇవి కాకుండా, కరీంనగర్‌ జిల్లాలో 13, జనగామ జిల్లాలో 10, మహబూబ్‌నగర్‌ జిల్లాలో 3, ఖమ్మం, వరంగల్‌ రూరల్‌ జిల్లాల్లో రెండేసి కేసులు, వరంగల్‌ అర్బన్‌, ఆదిలాబాద్‌ జిల్లాల్లో ఒక్కొక్క కేసు చొప్పున నమోదయ్యాయి. వలసలు, ప్రవాసులకు సంబంధించి తాజాగా ఎలాంటి కేసులు నమోదు కాలేదు. ఇదిలావుండగా, రాష్ట్ర వ్యాప్తంగా కరోనా వైరస్‌ పాజిటివ్‌ కేసుల సంఖ్య 7,072కి పెరిగిందని రాష్ట్ర వైద్య, ఆరోగ్య శాఖ తన హెల్త్‌ బులిటెన్‌లో ప్రకటించింది. కరోనా వైరస్‌ సోకిన వారిలో ఇంకా 3,363 మంది చికిత్స పొందుతున్నారు. ఇప్పటివరకు 3,506 మందిని డిశ్చార్జి చేసినట్లుగా వైద్యఆరోగ్య శాఖ తెలిపింది. శనివారంనాడు 154 మందిని డిశ్చార్జి చేసినట్లు తెలిపింది. శనివారం నూతనంగా 3,188 శాంపిల్స్‌ను టెస్టు చేయగా, అందులో 2,642 శాంపిల్స్‌ నెగిటివ్‌గా నిర్ధారించారు.