సెప్టెంబర్‌ 17 నుంచి పది రోజుల పాటు కార్యక్రమం
రేషన్‌ కార్డులు, హెల్త్‌ కార్డులే ఎజెండా
ఆరోగ్యంతో చెలగాటమాడితే సస్పెన్షన్‌
అధికారుల సమీక్షలో సిఎం రేవంత్‌రెడ్డి
ప్రజాపక్షం / హైదరాబాద్‌
సెప్టెంబర్‌ 17 నుంచి పది రోజుల పాటు రాష్ట్రమంతటా ప్రజా పాలన కార్యక్రమం నిర్వహించాలని ముఖ్యమంత్రి ఎ.రేవంత్‌ రెడ్డి నిర్ణయించారు. అర్హులైన ప్రతీ ఒక్కరికీ రేషన్‌ కార్డులు, హెల్త్‌ కార్డులు జారీ చేసేందుకు ఈసారి ప్రజాపాలన కార్యక్రమం చేపడుతామని చెప్పారు. ఇకపై రేషన్‌ కార్డులు, హెల్త్‌ కార్డులకు లింక్‌ ఉండదని, వేర్వేరుగా కార్డులు జారీ చేస్తామని సిఎం చెప్పారు. ప్రజా పాలనలో ప్రతీ కుటుంబం నుంచి అందుకు అవసరమైన వివరాలను సేకరిస్తామన్నారు. రాష్ట్రమంతటా అన్ని గ్రామాలు, వార్డుల్లో ప్రజా పాలన కార్యక్రమాన్ని నిర్వహించేందుకు అవసరమైన ఏర్పాట్లు చేసుకోవాలని ముఖ్యమంత్రి అధికారులను ఆదేశించారు. సచివాలయంలో మంగళవారం మంత్రి దామోదర రాజనర్సింహ్మతో కలిసి అధికారులతో ముఖ్యమంత్రి ఎ.రేవంత్‌ రెడ్డి సమీక్ష సమావేశం నిర్వహించారు. ప్రభుత్వ ప్రధాన కార్యదర్శి శాంతికుమారి, వైద్యారోగ్య శాఖ ముఖ్య కార్యదర్శి డాక్టర్‌ క్రిస్టినా చొంగ్తూ, మున్సిపల్‌ శాఖ ముఖ్య కార్యదర్శి దానకిశోర్‌, సిఎం ముఖ్య కార్యదర్శి శేషాద్రి ఈ సమావేశంలో పాల్గొన్నారు. హెల్త్‌ డిజిటల్‌ కార్డుల జారీకి ఎలాంటి పద్దతి అనుసరించాలి, ప్రతీ ఒక్కరి హెల్త్‌ ప్రొఫైల్‌ను నమోదు చేసేందుకు ఏయే వైద్య పరీక్షలు చేయాలి, గ్రామాల్లోనే హెల్త్‌ చెకప్‌ శిబిరాలు ఏర్పాటు చేయాలా, రాష్ట్రంలో ఉన్న లాబోరేటరీల సాయం తీసుకోవాలా తదితర అంశాలను వెంటనే పరిశీలించి నిర్ణయాలు తీసుకోవాలని వైద్య ఆరోగ్య శాఖ అధికారులను ముఖ్యమంత్రి ఆదేశించారు. హెల్త్‌ డిజిటల్‌ కార్డుకు సంబంధించి ఫ్రాన్స్‌లో ఉత్తమమైన విధానం అనుసరిస్తున్నారని ఇటీవల విదేశీ పర్యటనలో తనను కలిసిన ప్రతినిధులు చెప్పారని, అక్కడ అనుసరించే విధానాన్ని పరిశీలించాలని అధికారులకు సూచించారు. రాజీవ్‌ ఆరోగ్యశ్రీ వైద్య సేవలకు, సిఎంఆర్‌ఎఫ్‌ ద్వారా సాయం అందించేందుకు ఇకపై రాష్ట్ర ప్రభుత్వం జారీ చేసే హెల్త్‌ కార్డు ప్రామాణికంగా ఉంటుందని సిఎం అన్నారు.
ఆరోగ్యంతో చెలగాటమాడితే సస్పెండ్‌
సీజనల్‌ వ్యాధులపై అప్రమత్తంగా ఉండాలని అధికారులను ముఖ్యమంత్రి ఆదేశించారు. డెంగ్యూ, చికున్‌ గున్యా, వైరల్‌ జ్వరాలతో వివిధ ఆసుపత్రుల్లో పెరుగుతున్న కేసులపై సిఎం ఆందోళన వ్యక్తం చేశారు. వ్యాదులు రాకముందే తగిన నివారణ చర్యలు చేపట్టాలని సూచించారు. గ్రేటర్‌ హైదరాబాద్‌తో పాటు రాష్ట్రంలోని అన్ని పట్టణాలు, గ్రామాల్లో దోమల నిర్మూలనకు ఫాగింగ్‌, స్ప్రే ముమ్మరం చేయాలని ముఖ్యమంత్రి ఆదేశించారు. జిహెచ్‌ఎంసి పరిధిలోని అన్ని ప్రాంతాల్లో ఫాగింగ్‌ క్రమం తప్పకుండా జరిగేలా చూడాలని, ఎప్పటికప్పుడు అధికారులు క్షేత్రస్థాయికి వెళ్లి తనిఖీలు చేయాలని సిఎం ఆదేశించారు. పనిచేయని ఉద్యోగులను, ప్రజల ఆరోగ్య పరిరక్షణకు చేపట్టే చర్యల పట్ల ఉదాసీనంగా వ్యవహరించే వారిని సస్పెండ్‌ చేయాలని సిఎం హెచ్చరించారు. జిహెచ్‌ఎంసి పరిధిలోని అధికారులు, వైద్య ఆరోగ్య శాఖ అధికారులు, జిల్లా కలెక్టర్‌ సమన్వయంతో పని చేయాలని సిఎం ఆదేశించారు. అవసరమైతే పోలీసు విభాగం, స్వచ్ఛంద సంస్థలు, మీడియా సహకారంతో సీజనల్‌ వ్యాధులపై ప్రజలకు అవగాహన కల్పించాలని ముఖ్యమంత్రి సూచించారు. అన్ని జిల్లాల్లోనూ కలెక్టర్లు, పంచాయతీరాజ్‌ అధికారులు సీజనల్‌ వ్యాధులపై వెంటనే ప్రత్యేక కార్యాచరణ చేపట్టాలని ఆదేశించారు. అన్ని జిల్లాల్లో కలెక్టర్లు క్షేత్రస్థాయి పర్యటనలు చేయాలని, పలు గ్రామాలు, పట్టణాలకు వెళ్లి పరిస్థితులను ఎప్పటికప్పుడు తెలుసుకోవాలని సూచించారు. డెంగ్యూ, చికున్‌ గున్యా కేసులు నమోదైన ప్రాంతాలకు వెళ్లి కారణాలను గుర్తించాలని, అవసరమైన పారిశుధ్య కార్యక్రమాలు చేపట్టాలని ఆదేశించారు.
