మరో 1921 పాజిటివ్‌ కేసులు

కరోనాతో తాజాగా 9 మంది మృతి
88,396కు చేరిన బాధితులు, 674కు పెరిగిన మృతులు
ఒక్క రోజే 1210 మంది డిశ్చార్జ్‌
ప్రజాపక్షం/హైదరాబాద్‌ కరోనా వైరస్‌తో రాష్ట్రంలో మరో 9 మంది మరణించారు. కొత్తగా 1921 కరోనా పాజిటివ్‌ కేసులు నమోదయ్యాయి. దీంతో ఈ సంఖ్య 88,396కు చేరింది. మొత్తం 674 మంది మరణించారు. రాష్ట్ర వ్యాప్తంగా 23,438 యాక్టివ్‌ కేసులు ఉన్నాయి. 16,439 మంది గృహ, ఇతర సంస్థలలో ఐసోలేషన్‌లో ఉన్నారు. ఈ మేరకు గురువారం నాటి కరోనా హెల్త్‌ బులిటెన్‌ను రాష్ట్ర వైద్య ఆరోగ్య శాఖ శుక్రవారం విడుదల చేసింది. కరోనా మరణాల రేటు రాష్ట్రంలో 0.76 శాతం ఉండగా, జాతీయ స్థాయిలో 1.96 శాతం ఉన్నది. ఒక్క రోజే 1210 మంది కరోనా చికిత్స పొంది డిశ్చార్జ్‌ అయ్యారు. ఐసోలేషన్‌ల సంఖ్య 84 శాతంగా ఉన్నది. గురువారంనాడు 22,046 మందికి కరోనా పరీక్షలు నిర్వహించగా, అందులో 1151 రిపోర్టులు రావాల్సి ఉన్నది. ఇప్పటి వరకు మొత్తంగా 7,11,196 మందికి పరీక్షలు నిర్వహించారు. 64,284 మంది కరోనా సోకి కోలుకున్నారు. ఇతర వ్యాధులతో మరణించిన వారి రేటు 53.87 శాతంగా ఉండగా, కరోనాతో 46.13 శాతం మరణిస్తున్నట్టు వైద్య ఆరోగ్య శాఖ తన హెల్త్‌ బులిటెన్‌లో పేర్కొంది. కొవిడ్‌ వైరస్‌ నుంచి ప్రజలు భయాందోళన చెందాల్సిన అవసరం లేదని వైద్య ఆరోగ్య శాఖ తెలిపింది. టెలిమెడిసిన్‌, వివిధ సమస్యల పరిష్కారానికి 104కు ఫోన్‌ చేయాలని, ప్రైవేటు ఆస్పత్రులు, ల్యాబరేటరీలకు సంబంధించిన సమస్యల పరిష్కారానికి 9154170960 నంబర్‌కు ఫోన్‌ చేయాలని సూచించింది. కాగా 21 నుంచి 50 సంవత్సరాల మధ్య వయసు ఉన్న వారు అత్యధికంగా కరోనా వైరస్‌ సోకుతుందని, అందుకే అనవసరంగా బయటకు రాకూడదని వైద్య ఆరోగ్య శాఖ సూచించింది.
జిల్లాల వారీగా తాజా కరోనా పాజిటివ్‌ కేసులు
గురువారం నాడు ఆదిలాబాద్‌లో 28, భద్రాద్రి- కొత్తగూడెంలో 34, జిహెచ్‌ఎంసిలో 356, జగిత్యాలలో 40, జనగాంలో38, జయశంకర్‌ భూపాల్‌పల్లిలో 21, జోగులాంబ గద్వాల్‌లో 51, కామారెడ్డిలో 44, కరీంనగర్‌లో 73, ఖమ్మంలో 71, కొమురంబీమ్‌ ఆసిఫాబాద్‌లో 17, మహబూబ్‌నగర్‌లో 48, మహబూబాబాద్‌లో 38, మంచిర్యాలలో 18, మెదక్‌లో 39, మేడ్చల్‌- మల్కాజిగిరిలో 168, ములుగులో 12, నాగర్‌కర్నూల్‌లో 26, నల్లగొండలో 73, నారాయణపేట్‌లో 6, నిర్మల్‌లో 37, నిజామాబాద్‌లో 63, పెద్దపల్లిలో 54, రాజన్న సిరిసిల్లాలో 33, రంగారెడ్డిలో 134, సంగారెడ్డిలో 90, సిద్దిపేటలో 63, సూర్యాపేటలో47, వికారాబాద్‌లో 14,వనపర్తిలో 41, వరంగల్‌ రూరల్‌లో 54, వరంగల్‌ అర్బన్‌లో 74, యాదాద్రి -భువనగిరిలో 16 పాజిటివ్‌ కేసులు నమోదయ్యాయి.