మణిపూర్‌ ఘటనల వెనుకబిజెపి కుట్ర

ఈశాన్యరాష్ట్రం మండుతున్నా ప్రధాని నోరువిప్పకపోవడం అత్యంత దారుణం
రాజకీయ లబ్ధిపొందాలని చూస్తున్న కాషాయ పార్టీని గద్దె దించాలి
ప్రజాస్వామ్యం, లౌకికవాద శక్తులు ఏకమై ముందుకురావాలి
మణిపూర్‌ సిఎం రాజీనామా చేయాలని సిపిఐ, సిపిఐ(ఎం) భారీ నిరసన ప్రదర్శన
ప్రజాపక్షం/హైదరాబాద్‌ మణిపూర్‌లో అల్లర్ల ఘటన వెనుక బిజెపి కుట్ర ఉన్నదని సిపిఐ, సిపిఐ(ఎం) నాయకులు విమర్శించారు. మణిపూర్‌ రావణకాష్టంలా కాలుతున్నప్పటికీ ప్రధాని మోడీ నోరు విప్పకపోవడం అత్యంత దారుణమని, మణిపూర్‌ రాష్ట్రం దేశంలో అంతర్భాగం కాదా అని వారు ఆగ్రహం వ్యక్తం చేశారు. కేంద్రంలోని బిజెపి ప్రభుత్వ పెద్దల ప్రోద్భలంతోనే మణిపూర్‌లోని బిజెపి సిఎం అల్లర్లను ప్రోత్సహిస్తున్నారని వారు విమర్శించారు. మతఘర్షణలతో రాజకీయ లబ్ధిపొందాలని కుట్ర చేస్తున్న బిజెపిని కేంద్రం నుండి గద్దె దించాలని, అందుకు ప్రజాస్వామ్య, లౌకకవాద శక్తులన్నీ ఏకంగా ముందుకు రావాలని పిలుపునిచ్చారు. మహిళలపై దాడులకు పాల్పడడమే “బేటీ బచావో” నినాదమా అని ప్రశ్నించారు. “మణిపూర్‌ అల్లర్లను అరికట్టండి..ప్రజల ప్రాణాలను కాపాడండి…
మణిపూర్‌లోని బిజెపి సిఎం రాజీనామా చేయాలి ” అనే డిమాండ్‌తో సిపిఐ, సిపిఐ(ఎం) ఆధ్వర్యంలో హైదరాబాద్‌లోని లిబర్టీ నుండి డాక్టర్‌ బి.ఆర్‌. అంబేడ్కర్‌ విగ్రహం వరకు మంగళవారం పెద్దఎత్తున ప్రదర్శన నిర్వహించారు. “ బిజెపికో హటావో.. దేశ్‌కో బచావో..మణిపూర్‌ సిఎం రాజీనామా చేయాలి.. ఆర్‌ఎస్‌ఎస్‌ భావజాలానికి వ్యతిరేకంగా, విద్వేష రాజకీయాలకు వ్యతిరకంగా పోరాటం చేయాలి ” అని ఉభయ కమ్యూనిస్టు పార్టీల శ్రేణులు పెద్దపెట్టున నినాదాలు చేస్తూ నల్ల జెండాలను చేతబూని ప్రదర్శనగా వెళ్లారు. అనంతరం అంబేడ్కర్‌ విగ్రహం వద్ద వారు నిరసన వ్యక్తం చేశారు. ఈ సందర్భంగా సిపిఐ జాతీయ కార్యదర్శి డాక్టర్‌ కె.నారాయణ మాట్లాడుతూ మణిపూర్‌లోని చైన్‌ మార్గ్‌ ద్వారా ఆయుధాలతో టెర్రరిస్టులు దేశంలోకి చొరబడుతున్నప్పటికీ కేంద్రం, మణిపూర్‌లోని బిజెపి ప్రభుత్వాలు పట్టించుకోవడంలేదని విమర్శించారు. టెర్రరిస్టులను అరెస్ట్‌ చేసి, వారి వద్ద ఉన్న ఆయుధాలను స్వాధీనం చేసుకోవాలని ఆయన డిమాండ్‌ చేశారు. మణిపూర్‌లో వాతావరణం శాంతియుతంగా ఉండాలని, అల్లర్లను అదుపు చేయాలని ఇప్పటివరకు ప్రధాని మోడీ కోరలేదన్నారు. మణిపూర్‌లోని మహిళలపై అత్యాచారం, ఉరేగింపు తీసిన వీడియోను పార్లమెంట్‌ సమాశాలకు ఒక రోజుముందుగా ఉద్దేశపూర్వకంగా విడుదల చేశారని, ఈ ఘటనలో సుప్రీంకోర్టు సూచనలను కూడా బిజెపి ప్రభుత్వం తమకు అనులంగా మల్చుకున్నదని మండిపడ్డారు. ప్రజా సమస్యలను పార్లమెంట్‌లో చర్చకు రానివ్వకుండా, అదే సమయంలో మణిపూర్‌ ఘటన అంశంలో సుప్రీంకోర్టు సూచనలను చూపిస్తూ ఇతర అంశాల నుండి తప్పించుకుంటున్నారని విమర్శించారు. మణిపూర్‌లోని భూగర్భ సంపదను కార్పొరేట్‌ శక్తులకు అంటగట్టాలని, అలాగే మణిపూర్‌లో ఉన్న 54 వేల ఎకరాల భూమిని అదానీకి అప్పగించారని, అందుకే మణిపూర్‌ ఘటనను బిజెపి ప్రభుత్వం ప్రొత్సహిస్తోందని విమర్శించారు.
అధికారాన్ని నిలబెట్టుకునేందుకే బిజెపి కుట్ర
నోరు విప్పని ప్రధాని మోడీ : కూనంనేని
అధికారాన్ని శాశ్వితంగా నిలబెట్టుకునేందుకు కేంద్రంలోని బిజెపి ప్రభుత్వం అనేక కుట్రలకు పాల్పడుతోందని సిపిఐ రాష్ట్ర కార్యదర్శి కూనంనేని సాంబశివరావు విమర్శించారు. బిజెపి పాలిత రాష్ట్రాల్లోనే అత్యధికంగా మతవిద్వేషాలు, మహిళలపై అత్యాచారాలు, దాడులు, పలు విధ్వంస ఘటనలు జరుగుతున్నాయని, ఆ రాష్ట్రాలలో మతవిద్వేషాలను రెచ్చగొడుతూ మెజార్టీ ఓట్లను తమ వైపు తిప్పుకునేందుకు బిజెపి ప్రయత్నిస్తోందన్నారు. మణిపూర్‌లో మహిళల పట్ల వ్యవహారించిన తీరు అత్యంత దారుణమని, ఇలాంటి వారు దేశ ద్రోహుల కంటే ప్రమాదకరమని, వారిని కఠినంగా శిక్షించేందుకు కొత్తగా చట్టాలను తీసుకురావాలని డిమాండ్‌ చేశారు. మహిళలపై అత్యాచారాలు, విధ్వంసం లాంటి అనేక ఘటనలకు పాల్పడుతున్న వారిలో 80 నుండి 90 శాతం బిజెపికి చెందిన వారే ఉన్నారని, వారిపై కేసులు నమోదు చేసి చర్యలు తీసుకోవడంలో ఉద్దేశ్యపూర్వకంగా జాప్యం చేస్తున్నారని మండిపడ్డారు. బిజెపి పాలనలో జరిగినన్ని అత్యాచారాలు ఎప్పుడూ జరలేదన్నారు. సిపిఐ జాతీయ కార్యదర్శి సయ్యద్‌ అజీజ్‌ పాషా మాట్లాడుతూ బేటి బచావో అని నినదించిన ప్రధాని మోడీ బేటీల విషయంలో ఏం చేస్తున్నారని నిలదీశారు. మణిపూర్‌లో అల్లర్లు చెలరేగుతున్నప్పటికీ కేంద్రం, మణిపూర్‌లోని బిజెపి ప్రభుత్వానికి ఏ మాత్రం చలనం లేదని, కనీసం బాధ కూడా లేదని ఆగ్రహం వ్యక్తం చేశారు. మణిపూర్‌ ప్రభుత్వాన్ని వెంటనే బర్తరఫ్‌ చేసి, రాష్ట్రపతి పాలన విధించాలని ఆయన డిమాండ్‌ చేశారు.
బిజెపి ఎదిగిన ప్రాంతాల్లోనే మత ఘర్షణలు: తమ్మినేని
సిపిఐ(ఎం) రాష్ట్ర కార్యదర్శి తమ్మినేని వీరభద్రం మాట్లాడుతూ బిజెపి ఉన్న ప్రాంతాల్లోనే మతఘర్షణలు జరుగుతున్నాయన్నారు. మణిపూర్‌ ఘర్షణలు రాజకీయ ఎత్తుగడలో భాగమన్నారు. సమానత్వం పేరుతో సివిల్‌ కోడ్‌ను ప్రవేశపెట్టి, మెజార్టీ, మైనార్టీల మధ్య చిచ్చు పెట్టాలని బిజెపి ప్రయత్నిస్తోందని, తద్వారా మెజార్టీ ఓట్ల తమ వైపే ఉంటాయనేది ఆ పార్టీ కుట్ర అని తెలిపారు. మణిపూర్‌ ఘటన, సివిల్‌ కోడ్‌ను వ్యతిరేకించిన తెలుగు రాష్ట్రాల సిఎంలు కెసిఆర్‌, జగన్‌, టిడిపి అధినేత చంద్రబాబునాయుడు వాటికి దీనికి వ్యతిరేకంగా ఐక్య ఉద్యమాలకు ముందుకు రావాలని సూచించారు. ఈ కార్యక్రమానికి సిపిఐ రాష్ట్ర కార్యదర్శివర్గ సభ్యులు ఈ.టి.నరసింహ అధ్యక్షత వహించగా, రాష్ట్ర కార్యదర్శివర్గ సభ్యులు వి.ఎస్‌. బోస్‌, ఎఐటియుసి రాష్ట్ర కార్యదర్శి బి.వెంకటేశం, మహిళా సమాఖ్య రాష్ట్ర అధ్యక్షురాలు ఉస్తేల సృజన, సిపిఐ హైదరాబాద్‌ జిల్లా కార్యదర్శి ఎస్‌.ఛాయాదేవి, సహాయ కార్యదర్శులు కమతం యాదగిరి, బి.స్టాలిన్‌, ఎఐవైఎఫ్‌ రాష్ట్ర ప్రధాన కార్యదర్శి కె.ధర్మేంద్ర, డిహెచ్‌పిఎస్‌ రాష్ట్ర ప్రధాన కార్యదర్శి మారుపాక అనిల్‌కుమార్‌, సిపిఐ(ఎం) రాష్ట్ర కార్యదర్శివర్గ సభ్యులు డి.జి.నరసింహరావు, మల్లు లక్ష్మి తదితరులు పాల్గొన్నారు.