భారత్‌, తెలంగాణల్లో వ్యాపార అవకాశాలు అద్భుతం

దావోస్‌లో ప్రముఖ పారిశ్రామికవేత్తలతో మంత్రి కెటిఆర్‌
పలు ప్రముఖ కంపెనీల సీనియర్‌ నాయకత్వంతో భేటీ
తెలంగాణలో పెట్టుబడి అవకాశాలపై వివరణ
ప్రజాపక్షం/హైదరాబాద్‌: వరల్డ్‌ ఎకనామిక్‌ ఫోరం సదస్సులో పాల్గొనేందుకు స్విట్జర్లాండ్‌లోని దావోస్‌కు చేరుకున్న రాష్ట్ర పరిశ్రమల శాఖ మంత్రి కెటిఆర్‌ బుధవారం నాడు ప్రముఖ పారిశ్రామికవేత్తలతో సమావేశమయ్యారు. దావోస్‌లో సిఐఐ, సిఎన్‌బిసి టివి 18 సంయుక్తంగా నిర్వహించిన చర్చాగోష్టిలో మంత్రి కెటిఆర్‌ పాల్గొన్నారు. ఇండియా ఇన్వెస్ట్‌మెంట్‌ అండ్‌ ఇన్నోవేషన్‌ నేషన్‌ అంశంపై నిర్వహించిన చర్చ గోష్టిలో పాల్గొన్నారు. ఈ సందర్భంగా మాట్లాడుతూ ఇతర దేశాలతో పోలిస్తే భారత దేశంలో అద్భుతమైన వ్యాపార అవకాశాలు ఉన్నాయన్నారు. 20 నుంచి 40 ఏళ్ల వయస్సులో ఉన్న యువత భారత దేశానికి అద్భుతమైన బలమన్నారు. ఈ చర్చాగోష్టిలో భాగంగా తెలంగాణలోని పెట్టుబడుల అవకాశాలు, ఇన్నోవేషన్‌ రంగం గురించి ప్రస్తావించారు. తెలంగాణ రాష్ట్రం సులభతర వాణిజ్య విధానం (ఈజ్‌ అఫ్‌ డూయింగ్‌ బిజినెస్‌ ) ర్యాంకుల్లో అగ్రస్థానంలో నిలుస్తూ వస్తున్నదన్నారు. ఇప్పటికే మైక్రోసాఫ్ట్‌, అమెజాన్‌ , గూగుల్‌, ఆపిల్‌, ఫేస్‌ బుక్‌ వంటి ప్రపంచ దిగ్గజ ఐదు కంపెనీలు తమ కేంద్ర కార్యాలయాల తర్వతి అతిపెద్ద కార్యాలయాలను హైదరాబాద్‌లో ఏర్పాటు చేసుకున్నాయన్నారు. నివసించేందుకు హైదరాబాద్‌ అత్యుత్తమ నగరమని మెర్సర్‌ గత ఐదు సంవత్సరాలుగా గుర్తిస్తూ వస్తోందన్నారు. దీంతోపాటు ప్రపంచంలోని 130 నగరాల్లో అత్యంత డైనమిక్‌ నగరంగా హైదరాబాద్‌ని జెఎల్‌ఎల్‌ గుర్తించిందన్నారు. నైపుణ్యం కలిగిన మానవ వనరులను వినియోగించడంతో పాటు, మౌలిక సదుపాయాలు మెరుగుపర్చేందుకు కృషి చేస్తున్నామని తెలిపారు. ఈ నేపథ్యంలోనే ఈఓడిబి ర్యాంకుతో పాటు కాస్ట్‌ ఆఫ్‌ డూయింగ్‌ బిజినెస్‌ తగ్గింపు, క్వాలిటీ ఆఫ్‌ డూయింగ్‌ బిజినెస్‌ మెరుగుపర్చడంపై ప్రత్యేక దృష్టి పెట్టినట్టు చెప్పారు. భారత్‌తో పాటు రాష్ట్రాలన్ని మరింత బలోపేతం కావాలంటే.. ఇన్నోవేషన్‌, ఇన్‌ క్లూజివ్‌ గ్రోత్‌, ఇన్‌ ఫ్రాస్ట్రక్చర్‌.. అనే త్రీ ఐ మంత్రను పాటించాలని కెటిఆర్‌ సూచించారు. ఈ చర్చగోష్టి అనంతరం దావోస్‌లో ఏర్పాటు చేసిన తెలంగాణ పెవిలియన్‌లో పలు ప్రముఖ అంతర్జాతీయ కంపెనీల ప్రతినిధులను కలిశారు. రోషే చైర్మన్‌ క్రిస్టోఫర్‌ ప్రాన్జ్‌ మంత్రి కెటియార్‌ను కలిసారు. ఈ సమావేశం సందర్భంగా కెటిఆర్‌ ఆయనకు హైదరాబాద్‌ నగరం ఫార్మా హబ్‌ గా ఉన్నదని, ఫార్మాసిటీ, మెడికల్‌ డివైస్‌ పార్కుల్లో ఉన్న పెట్టుబడి అవకాశాలను వివరించారు. పిఅండ్‌ జి దక్షిణాసియా సియివో మాగెశ్వరన్‌ సురంజన్‌, హెచ్‌పి సిఒఒ విశాల్‌లాల్‌, అపోలో టైర్స్‌ ఎండి నీరజ్‌ కన్వర్‌, కార్ల్స్‌ బెర్గ్‌ గ్రూప్‌ చైర్మన్‌ ప్లెమింగ్‌ బెసెన్‌ బాచర్‌లతోనూ కెటిఆర్‌ సమావేశం అయ్యారు. వీరితో సమావేశాల సందర్భంగా ఫుడ్‌ ప్రాసెసింగ్‌, ఎలక్ట్రానిక్స్‌, టెక్స్‌టైల్స్‌ , లైఫ్‌ లైసెన్స్‌ రంగాల్లో ఉన్న పెట్టుబడి అవకాశాలను వివరించారు.