649 బాధితులు
న్యూఢిల్లీ : భారత్‌లో కరోనా వైరస్ పాజిటివ్ కేసుల సంఖ్య రోజురోజుకు పెరుగుతోంది. ఇప్పటికే దేశంలోని 26రాష్ట్రాలు, కేంద్రపాలిత ప్రాంతాలకు ఈ వైరస్ పాకింది. గురువారం నాటికి దేశవ్యాప్తంగా కరోనా వైరస్ పాజిటివ్ కేసుల సంఖ్య 694కి చేరినట్లు కేంద్ర ఆరోగ్య, కుటుంబ సంక్షేమశాఖ వెల్లడించింది. కొవిడ్-19 కారణంగా ఇప్పటివరకు మొత్తం 16మంది మృతి చెందినట్లు ప్రకటించింది. మొత్తం బాధితుల్లో 43మంది కోలుకోగా 593మంది ప్రస్తుతం చికిత్స పొందుతున్నారు. మహారాష్ట్ర, కేరళలో కొవిడ్-19 తీవ్రత ఎక్కువగా ఉంది. మహారాష్ట్రలో అత్యధికంగా 124కరోనా పాజిటివ్ కేసులు నిర్ధారణ అయ్యాయి. వీరిలో ఒకరు కోలుకోగా మరో ముగ్గురు మరణించారు. కేరళలో ఈ కేసుల సంఖ్య 118కి చేరగా వీరిలో నలుగురు కోలుకున్నారు.
ఇక తెలంగాణలో కరోనా కేసుల సంఖ్య 43కి చేరగా వీరిలో ఒకరు కోలుకున్నారు. గురువారం నాడు మరో ముగ్గురికి పాజిటివ్‌గా తేలింద‌ని రాష్ట్ర వైద్య, ఆరోగ్య శాఖ మ‌ధ్యాహ్నం 12 గంట‌ల‌కు విడుద‌ల చేసిన బులిటెన్‌లో పేర్కొంది. అందులో హైద‌రాబాద్ దోమ‌ల్‌గూడ‌కు చెందిన భార్య‌భ‌ర్త‌లైన డాక్ట‌ర్లు, మ‌రొక‌రు మేడ్చ‌ల్ జిల్లా కుత్బుల్లాపూర్‌కు చెందిన 49 ఏళ్ల వ్యక్తికి కరోనా పాజిటివ్‌గా తేలింద‌ని తెలిపింది. మొత్తం బాధితుల్లో పది మంది విదేశీయులే ఉన్నారు. ఆంధ్రప్రదేశ్ విష‌యానికొస్తే 11కరోనా కేసులు నిర్ధారణ అయ్యాయి. వీరిలో ఒకరు కోలుకున్నట్లు ప్రభుత్వం ప్రకటించింది. మధ్యప్రదేశ్‌లో గురువారం మరో ఐదు కరోనా పాజిటివ్ కేసులు నమోదయ్యాయి. దీంతో రాష్ట్రంలో బాధితుల సంఖ్య 20కి చేరింది. పశ్చిమబెంగాల్‌లో కరోనా కేసుల తీవ్రత పెరుగుతోంది. తాజాగా 66ఏళ్ల వ్యక్తికి కరోనా నిర్ధారణ కావడంతో ఈ కేసుల సంఖ్య 10కి చేరింది. ఇప్పటికే ఆ రాష్ట్రంలో కరోనా కారణంగా ఒకరు మరణించారు. గోవాలో మూడు కరోనా వైరస్ కేసులు నిర్ధారణ అయినట్లు గోవా ముఖ్యమంత్రి ప్రమోద్ సావంత్ వెల్లడించారు. కొవిడ్-19 నిర్ధారించిన వారిని ప్రత్యేక సంరక్షణలో ఉంచి చికిత్స అందిస్తున్నామని సావంత్ పేర్కొన్నారు. కశ్మీర్‌లో తొలి కరోనా మరణం నమోదైంది. హైదర్ పోరా గ్రామంలో కొవిడ్ -19 కారణంగా 65ఏళ్ల వ్యక్తి మరణించినట్లు కశ్మీర్ వైద్య అధికారులు వెల్లడించారు. అనంతరం ఈ వ్యక్తి కుటుంబంలోని నలుగురికి కూడా వైరస్ సోకినట్లు నిర్ధారించారు.
