సిఎం కార్యదర్శి విజ్ఞప్తి
ప్రజాపక్షం / హైదరాబాద్‌ :మిషన్‌ భగీరథ నీటిని మాత్రమే తాగేలా ప్రజలను చైతన్యపరిచే కార్యక్రమాలను మరిన్ని రూపొందించాలని ముఖ్యమంత్రి కార్యదర్శి స్మితా సభర్వాల్‌ అన్నారు. భగీరథ కంటే స్వచ్చమైన తాగునీరు ఇంకెక్కడా దొరకదని పేర్కొన్నారు. ఎర్రమంజిల్‌లోని మిషన్‌ భగీరథ ప్రధాన కార్యాలయంలో బుధవారం అన్ని జిల్లాల సిఈ, ఎస్‌ఈలతో స్మితా సభర్వాల్‌ సమీక్షా సమావేశం నిర్వహించారు. కొత్తగా నిర్మిస్తున్న రైతు వేదికలు, వైకుంఠధామాలకు భగీరథ నీటిని అందించాలన్నారు. అంగన్‌ వాడీలు, ప్రభుత్వ విద్యాసంస్థలు, వైద్యసంస్థలతో పాటు ధార్మిక సంస్థలకు కూడా భగీరథ వాటర్‌ కనెక్షన్‌ ఇవ్వాలన్నారు. అన్ని ప్రభుత్వ కార్యక్రమాల్లో భగీరథ వాటర్‌ బాటిల్స్‌ను ఉపయోగించేలా చూడాలని అధికారులను ఆదేశించారు. ముందుగా రోజువారీ తాగునీటి సరాఫరా తీరును ఈఎన్‌సి కృపాకర్‌రెడ్డి సిఎంఓ కార్యదర్శికి వివరించారు. రాష్ట్రంలోని అన్ని గ్రామాలకు మిషన్‌ భగీరథతో శుద్దిచేసిన తాగునీరు అందుతోందని, అనుకున్న పరిమాణం కంటే ఎక్కువగానే నీటిని సరాఫరా చేస్తున్నామని చెప్పారు. సరాఫరాతో పాటు నీటి నాణ్యత పై దృష్టి పెట్టామన్నారు. రాష్ట్ర వ్యాప్తంగా జోరుగా సాగుతున్న స్టెబిలైజేషన్‌ కార్యక్రమాల్లో ఇంటింటికి సరాఫరా అవుతున్న నీటి నాణ్యతను కూడా పరీక్షిస్తున్నామన్నారు. మిషన్‌ భగీరథ వాటర్‌ టెస్టింగ్‌ ల్యాబ్‌ నిపుణులతో ప్రజలను చైతన్యపరుస్తున్నామన్నారు. దీనిపై సంతోషం వ్యక్తం చేసిన స్మితా సభర్వాల్‌ వందకు వంద శాతం స్టెబిలైజేషన్‌ ను సాధించిన అధికారులకు ప్రోత్సాహకాలు అందిస్తామన్నారు. ఈ నెల చివరి నాటికి మారుమూల ఆవాసాలు ( ఐసోలేటెడ్‌ ) అన్నింటికి భగీరథ నీటిని అందించాలన్నారు. జనవరిలో నిర్వహించే సమీక్షా సమావేశం నాటికి రాష్ట్రంలోని అన్ని ఐసోలేటెడ్‌ ఆవాసాలకు భగీరథ నీరు సరాఫరా కావాలన్నారు. ఇక భగీరథలో భాగంగా నిర్మించిన సివిల్‌ కట్టడాలు, పంపుసెట్లు, పైప్‌ లైన్‌ల పనితీరును ఎప్పటికప్పుడు పర్యవేక్షించాలన్నారు. ఈ సమావేశంలో ప్రభుత్వ సలహాదారు జ్ఞానేశ్వర్‌ తో పాటు చీఫ్‌ ఇంజనీర్లు, ఎస్‌ఈలు పాల్గొన్నారు.
భగీరథ నీటినే తాగండి!
RELATED ARTICLES
