నేటినుంచి పాఠశాలలు పునఃప్రారంభం
ఈ ఏడాదినుంచే ఆంగ్ల మాధ్యమ బో
ఏర్పాట్లు చేయాలని నిర్వాహకులకు మంత్రి సబిత ఆదేశం
ప్రజాపక్షం/హైదరాబాద్‌ రాష్ట్ర వ్యాపితంగా ప్రభుత్వ, ప్రైవేటు పాఠశాలలను సోమవారం నుంచి పునః ప్రారంభించనున్నట్టు విద్యాశాఖ మంత్రి సబితా ఇంద్రారెడ్డి వెల్లడించారు. సెలవులను పొడిగించడం లేదని స్పష్టం చేశారు. పాఠశాలల పునః ప్రారంభ నేపథ్యంలో అవసరమైన ఏర్పాట్లను చేసుకోవాలని పాఠశాలల నిర్వాహకులను ఆదేశించారు.“మన ఊరు – మన బడి”లో భాగంగా 9 వేల పాఠశాలల్లో అభివృద్ధి పనులు జరుగుతున్నాయని, విద్యార్థులకు ఇబ్బందులు లేకుండా నిర్మాణాలను పూర్తి చేస్తామన్నారు.ఒకటవ తరగతి నుంచి ఎనిమిదో తరగతి వరకు ఈ విద్యా సంవత్సరం నుంచే ప్రభుత్వ పాఠశాలల్లో ఇంగ్లీష్‌ మీడియం బోధన ప్రారంభిస్తున్నామని, ఇందులో భాగంగా 1.04లక్షల మంది ప్రభుత్వ ఉపాధ్యాయులకు అజీమ్‌ ప్రేమ్‌జీ యూనివర్సిటీ ఆధ్వర్యంలో శిక్షణ ఇచ్చామని వివరించారు. తననను కలిసిన మీడియాతో ఆదివారం మంత్రి సబితా ఇంద్రా రెడ్డి మాట్లాడారు. అనంతరం ఒక ప్రకటన విడుదల చేశారు. రాష్ట్ర వ్యాప్తంగా టెట్‌ పరీక్ష ప్రశాంతంగా జరిగిందన్నారు. తల్లిదండ్రులు తమ పిల్లలను పాఠశాలల్లో చేర్పించాలని,బడిబాటలో భాగంగా ఇప్పటి వరకు 70, 698 మంది పిల్లలను ప్రభుత్వ పాఠశాలల్లో చేర్పించామని, ఈ కార్యక్రమం మరో వారం రోజులు కొనసాగుతుందని అన్నారు. ఇంగ్లిష్‌ మీడియం బోధన నేపథ్యంలో పిల్లలకు ఇబ్బందులు లేకుండా నెల రోజుల పాటు బ్రిడ్జి కోర్సు మాదిరిగా తరగతులు నిర్వహించాలని ఉపాధ్యాయులకు అదేశించారు. రాష్ట్ర వ్యాప్తంగా పాఠశాలల పునః ప్రారంభం సందర్భంగా ఎమ్మెల్యేలు, స్థానిక ప్రజాప్రతినిధులు ప్రభుత్వ పాఠశాలలను సందర్శించి విద్యార్థులకు స్వాగతం పలుకాలని కోరారు. ఆయా గ్రామాల్లో సర్పంచ్‌లు, మునిసిపాలిటీలలో కౌన్సిలర్లు, ఛైర్మన్లు పాఠశాలల పారిశుద్ధ్యం పై దృష్టి పెట్టాలని సూచించారు. అన్ని పాఠశాలల్లో మిషన్‌ భగీరథ ద్వారా మంచినీటి కనెక్షన్లు ఉండేలా చూడాలన్నారు. రూ. 120 కోట్లతో పాఠ్య పుస్తకాలు ముద్రించామని, విద్యార్థులందరికీ తెలుగు, ఇంగ్లీష్‌ మీడియంలో పుస్తకాలను అందిస్తామని, దాదాపు 1.67కోట్ల పుస్తకాలను పంపిణీ చేస్తామని తెలిపారు. ఎప్పటిలాగే ఉచితంగా యూనిఫామ్‌ను,మధ్యాహ్న భోజనం అందిస్తామన్నారు.
రూ. 27వందల కోట్లు ఎక్కడో బండి సమాధానం చెప్పాలి: మంత్రి సబితా ఇంద్రారెడ్డి
“మన ఊరు -మన బడి’ కార్యక్రమానికి కేంద్ర ప్రభుత్వం నిధులు విడుదల చేసిందని బిజెపి నేతలు అబదాధలు చెబుతున్నారని మంత్రి సబితా ఇంద్రారెడ్డి ఆరోపించారు. రూ. 2700 కోట్లు ఎక్కడ ఉన్నాయో బిజెపి రాష్ట్ర అధ్యక్షుడు బండి సంజయ్‌ చెప్పాలని డిమాండ్‌ చేశారు. ఒక పక్క టెట్‌ పరీక్షను వాయిదా వేయాలని, మరో పక్క 20 వేల టీచర్‌ పోస్టులను భర్తీ చేయాలని బండి సంజయ్‌ ద్వంద్వ నీతితో వ్యవహరిస్తున్నారని ఆగ్రహం వ్యక్తం చేశారు. ఐఐటిలు,ఐఐఎంలు,మెడికల్‌ కాలేజీలను ఇతర రాష్ట్రాలకు కేటాయించి, మన రాష్ట్రంపై వివక్ష చూపుతున్నారని విమర్శించారు. రాష్ట్రానికి నవోదయ స్కూల్స్‌, గిరిజన యూనివర్సిటీని తీసుకొచ్చిన తర్వాత బండి సంజయ్‌ మాట్లాడాలన్నారు.రాష్ట్రంలో ఉపాధ్యాయులను గౌరవ ప్రదంగా చూస్తూ వారికి ప్రభుత్వం అన్ని విధాలుగా అండగా ఉంటుందని భరోసనిచ్చారు.
