ప్రమోట్‌ చేయొద్దు
సెప్టెంబర్‌ 30న యథాతథంగా పరీక్షలు
రాష్ట్రాలు, వర్సిటీలకు సుప్రీంకోర్టు ఆదేశం
న్యూఢిల్లీ : వివిధ కోర్సుల్లో చివరి సెమిస్టర్‌ చదువుతున్న విద్యార్థులకు పరీక్షలు సెప్టెంబరు 30లోగా నిర్వహించకుండా పై తరగతులకు ప్రమోట్‌ చేయొద్దని సుప్రీం కోర్టు తేల్చి చెప్పింది. ఈ మేరకు రాష్ట్రాలకు, వర్సిటీలకు సుప్రీంకోర్టు శుక్రవారం ఆదేశాలు జారీ చేసింది. విద్యార్థులకు పరీక్షలు నిర్వహించిన తర్వాతే పై తరగతులకు ప్రమోట్‌ చేయాలన్న యూనివర్సిటీ గ్రాంట్స్‌ కమిషన్‌ (యుజిసి) మార్గదర్శకాల్ని సుప్రీంకోర్టు సమర్థించింది. యుజిసి మార్గదర్శకాల్ని సవాల్‌ చేస్తూ దాఖలైన పిటిషన్లపై జస్టిస్‌ అశోక్‌భూషణ్‌ నేతృత్వంలోని ధర్మాసనం శుక్రవారం విచారణ జరిపింది. చివరి సెమిస్టర్‌ పరీక్షలు నిర్వహించాల్సిందేనని స్పష్టం చేసింది. కరోనా దృష్టా పరీక్షల నిర్వహణకు ఇబ్బందులు ఉంటే యుజిసిని సంప్రదించాలని సూచించింది. పరీక్షల గడువు పెంచాలని రాష్ట్రాలు యుజిసిని కోరవచ్చని స్పష్టం చేసింది. కాగా, కరోనా వైరస్‌ నేపథ్యంలో ఫైనలియర్‌ పరీక్షలు లేకుండానే విద్యార్థులను పై తరగతులకు ప్రమోట్‌ చేయాల్సిందిగా ఆదిత్య థాక్రేకు చెందిన యువసేనతో సహ పలు సంఘాలు పిటిషన్లు దాఖలు చేశాయి. కరోనా వైరస్‌ కారణంగా విద్యాసంస్థలు మూసి వేశారని.. ఇలాంటి పరిస్థితులోల పరీక్షలు పెడితే విద్యార్థులు ఇబ్బందులు ఎదుర్కొంటారని పిటిషన్‌దారులు కోర్టుకు తెలిపారు. దీన్ని దృష్టిలో ఉంచుకుని పరీక్షలు రద్దు చేయాలని పిటిషన్‌దారులు కోర్టును కోరారు. ఇప్పటికే విద్యార్థులు ఐదు సెమిస్టర్లు పూర్తి చేశారని.. వాటిలో సాధించిన మార్కుల ఆధారంగా ఫలితాలు ప్రకటించాలన్నారు. ఈ పిటిషన్లను నేడు విచారించిన సుప్రీం కోర్టు యుజిసి తీసుకున్న నిర్ణయానికి అనుకూలంగా తీర్పు వెలువరించింది.
యుజిసి మార్గదర్శకాలు ఇవీ…
* చివరి సెమిస్టర్‌ విద్యార్థులకు సెప్టెంబరు పూర్తయ్యేలోపు విశ్వవిద్యాలయాలు పరీక్షలు నిర్వహించాలి. ఆఫ్‌లైన్‌, ఆన్‌లైన్‌ పద్ధతుల్లో లేదా రెండింటి కలయికగా పరీక్షలు జరుపుకోవచ్చు. బ్యాక్‌లాగ్‌ సబ్జెక్టులు ఉంటే పరీక్షలు నిర్వహించాలి. వాటిని కూడా పైవిధానంలో జరపాలి.
* ఒకవేళ సెప్టెంబరులో పరీక్షలకు, ఏదైనా ఒక సబ్జెక్టు పరీక్షకు హాజరుకాలేని విద్యార్థులకు మరోసారి ప్రత్యేకంగా పరీక్షలు నిర్వహించాలి. ఇది 2019 విద్యార్థులకు ఈ ఒక్కసారి మాత్రమే అవకాశం ఇవ్వాలి.
* మిగిలిన సెమిస్టర్ల వారికి గత ఏప్రిల్‌లో సూచించినట్లుగా అంతర్గత పరీక్షలు, గత సెమిస్టర్‌ పరీక్షల మార్కులను పరిగణనలోకి తీసుకొని గ్రేడ్లు ఇచ్చుకోవచ్చు.
