ప్రజాగాయకుడుగద్దర్‌ కన్నుమూత

హైదరాబాద్‌ : ప్రజా గాయకుడు గద్దర్‌ (74) ఇకలేరు. గతకొంతకాలంగా అనారోగ్యంతో బాధపడుతున్న ఆయన అపోలో ఆస్పత్రిలో చికిత్స పొందుతూ ఆదివారం కన్నుమూశారు. గుండెపోటుతో కొద్దిరోజుల కిందట అమీర్‌పేటలోని అపోలో స్పెక్ట్రా హాస్పిటల్‌లో చేరిన గద్దర్‌ అక్కడే చికిత్స పొందుతున్నారు. ఈనెల 3న వైద్యులు గద్దర్‌కు బైపాస్‌ సర్జరీ చేయగా, కోలుకున్నట్లు కనిపించారు. అయితే, ఊపిరితిత్తులు, యూరినరీ సమస్యలతో గద్దర్‌ బాధపడుతుండటంతో ఆదివారం ఆయన ఆరోగ్యం మరింత క్షీణించడంతో మృతి చెందారు. ఆయనకు భార్య విమల, ముగ్గురు పిల్లలు (సూర్యుడు, చంద్రుడు, వెన్నెల) ఉన్నారు. గద్దర్‌ మృతిపట్ల ముఖ్యమంత్రి కెసిఆర్‌ సంతాపం తెలిపారు. తెలంగాణ పాటకు ప్రపంచ ఖ్యాతి తెచ్చిన ప్రజాగాయకుడు అని.. తన పాటతో పల్లెపల్లెనా తెలంగాణ భావజాలం వ్యాప్తి చేశారని పేర్కొన్నారు. తన ఆటపాటలతో ప్రజల్లో స్వరాష్ట్ర చైతన్యం రగిలించారని వివరించారు. గద్దర్‌ మరణంతో తెలంగాణ
గొప్ప ప్రజాకవిని కోల్పోయిందని కెసిఆర్‌ అన్నారు. ఆపోలో ఆసుపత్రిలో గద్దర్‌ భౌతికకాయాన్ని రేవంత్‌రెడ్డి, విహెచ్‌, సీతక్క, గోరటివెంకన్న, విమలక్క సందర్శించారు. ఆయన పార్థివదేహాన్ని చూసి విమలక్క కన్నీటిపర్యంతమయ్యారు. ఆసుపత్రి నుంచి గద్దర్‌ పార్థివదేహాన్ని.. ఎల్‌బి స్టేడియానికి తరలించారు. సోమవారం ఉదయం వరకు ప్రజల సందర్శనార్థం అక్కడే ఉంచనున్నారు. అనంతరం మధ్యాహ్నం అల్వాల్‌లోని మహాబోధి పాఠశాల ప్రాంగణంలో అంత్యక్రియలు నిర్వహించనున్నట్లు కుటుంబసభ్యులు తెలిపారు. గద్దర్‌ చేసిన త్యాగాలకు ప్రతీకగా ఆయన అంత్యక్రియలు ప్రభుత్వ లాంఛనాలతో నిర్వహించాలని సిఎం కెసిఆర్‌ ఆదేశించారు. ఈమేరకు సిఎస్‌కు అదేశాలు జారీచేశారు.
గద్దర్‌ అసలు పేరు గుమ్మడి విఠల్‌రావు
మెదక్‌ జిల్లాలోని తూప్రాన్‌ గ్రామంలో లచ్చమ్మ, శేషయ్య దంపతులకు 1949లో గద్దర్‌ జన్మించారు. నిజామాబాద్‌, మహబూబ్‌నగర్‌ జిల్లాలో చదువుకున్నారు. ఆయన హైదరాబాద్‌లో ఇంజినీరింగ్‌ చదివారు. 1969 తెలంగాణ ఉద్యమంలో చురుగ్గా పాల్గొన్నారు. ప్రత్యేక తెలంగాణ ఎందుకు కావాలో చెబుతూ.. ఊరురా తిరిగి ప్రచారం చేశారు. దర్శకుడు బి.నరసింగరావు ప్రోత్సాహంతో 1971లో సినిమాల్లో తొలి పాట పాడారు. ‘ఆపార రిక్షా’ రాశాడు. ఆయన తొలి ఆల్బం పేరు గద్దర్‌. ఇదే ఆయన పేరుగా స్థిరపడింది. తన పాటలతో తాడిత పీడిత, బడుగు బలహీన వర్గాలను మేల్కొలపారు. మాభూమి సినిమాలో సాయుధ పోరాట యోధుడు యాదగిరి పాత్రలో గద్దర్‌ నటించారు. ‘బండెనక బండి కట్టి’ అంటూ ఆడిపాడి. తెలుగు ప్రేక్షకుల్ని ఉర్రూతలూగించారు. 1984లో బ్యాంకు ఉద్యోగానికి రాజీనామా చేసి పూర్తిస్తాయిలో.. ప్రజగాయకుడిగా ప్రస్థానం ప్రారంభించారు. కారంచేడులో దళితుల హత్యలకు వ్యతిరేకంగా పోరాడారు. జన నాట్య మండలిలో చేరి.. ఒగ్గు కథ, బుర్ర కథ, ఎల్లమ్మ కథల ద్వారా గ్రామీణ ప్రజల్లోకి వెళ్లారు. తెలుగు రాష్ట్రాల్లోనే కాకుండా మహారాష్ట్ర, మధ్యప్రదేశ్‌, ఒడిశా, బీహార్‌లోనూ ప్రదర్శనలు ఇచ్చారు. కాగా, గద్దర్‌పై హత్యాయత్నం జరిగింది. ఆయన శరీరంలోకి అనేక బుల్లెట్లు దూసుకెళ్లాయి. అన్ని బుల్లెట్‌లను తొలగించినా.. ఒక తూటాను మాత్రం తొలగించలేదు. ఆ బుల్లెట్‌ను తొలగిస్తే ఆయన ప్రాణాలకే ప్రమాదమని వదిలేశారు. చనిపోయే వరకు ఒంట్లో బుల్లెట్‌తోనే గద్దర్‌ జీవించారు. మలిదశ తెలంగాణ ఉద్యమంలోనూ గద్దర్‌ కీలక పాత్ర పోషించారు. తొలి నుంచి తెలంగాణవాదిగా ఉన్న ఆయన.. ప్రత్యేక రాష్ట్రం ఎందుకు అవసరమో ఎప్పుడూ చెబుతుండేవారు. గద్దర్‌ రాసిన ‘అమ్మ తెలంగాణమా… ఆకలి కేకల గానమా’ పాట… ప్రత్యేక రాష్ట్ర ఉద్యమంలో మారుమోగని ఊరు లేదు. స్ఫూర్తిపొందని ఉద్యమకారుడు లేడు. జై బోలే తెలంగాణ సినిమాలో ‘పొడుస్తున్న పొద్దు మీద నడుస్తున్న కాలామా అంటూ.. మరోసారి తెలంగాణ గుండెల్ని తట్టి లేపారు. ఈ పాట అద్భుత విజయం సాధించింది. సినిమాల్లో గద్దర్‌ రాసిన ‘నీ పాదం మీద పుట్టు మచ్చనై చెల్లెమ్మ’ అనే పాటకు ఉత్తమ గీతంగా నంది అవార్డు వచ్చింది. అయితే గద్దర్‌ ఆ పురస్కారాన్ని తిరస్కరించారు. ప్రజాగాయకుడు కన్నుమూతతో విషాదఛాయలు అమలుకున్నాయి.