వైభవంగా రాష్ట్ర అవతరణ, పంద్రాగస్టు, గణతంత్ర దినోత్సవాలు
ఈ ఉత్సవాలు ఆహ్లాదకరంగా జరిగేందుకు ప్రత్యామ్నాయ పద్ధతులు
మార్పులు, చేర్పులపై అధికారులతో సిఎం కెసిఆర్‌ సమీక్ష
ప్రజాపక్షం / హైదరాబాద్‌ : భారత స్వాతంత్య్ర దినోత్సవం, గణతంత్ర దినోత్సవం, రాష్ర్ట అవతరణ దినోత్సవాలను ప్రజలకు ఏమాత్రం ఇబ్బంది కలుగకుండా, మరింత వైభవంగా నిర్వహించే అవకాశాలను పరిశీలించాలని ముఖ్యమంత్రి కె.చంద్రశేఖర్‌ రావు అధికారులను ఆదేశించారు. ప్రజలకు, విద్యార్థులకు, పోలీసులకు పెద్ద యాతన లేకుండా ఈ మూడు ఉత్సవాలను గొప్పగా, సౌకర్యవంతంగా, ఆహ్లాదకరంగా నిర్వహించడానికి ప్రత్యామ్నాయ పద్ధతులు ఆలోచించాలని సూచించారు. జాతీయ, రాష్ర్ట పండుగల నిర్వహణకు అనుసరించాల్సిన పద్ధతులపై ముఖ్యమంత్రి కె.చంద్రశేఖర్‌రావు శుక్రవారం ప్రగతి భవన్‌లో ఉన్నతస్థాయి సమీక్షా సమావేశం నిర్వహించారు. మంత్రి కొప్పుల ఈశ్వర్‌, ఎంపి వినోద్‌ కుమార్‌, ఎంఎల్‌ఎలు గంగుల కమలాకర్‌, కోరుకంటి చందర్‌, ప్రభుత్వ ముఖ్య సలహాదారు రాజీవ్‌ శర్మ, సలహాదారు అనురాగ్‌ శర్మ, ప్రభుత్వ ప్రధాన కార్యదర్శి ఎస్‌.కె.జోషి, డిజిపి మహేందర్‌రెడ్డి, సిపి అంజనీకుమార్‌, సీనియర్‌ అధికారులు ఎస్‌.నర్సింగ్‌ రావు, జనార్దన్‌రెడ్డి, అరవింద్‌ కుమార్‌, దానకిశోర్‌, పార్థసారథి, భూపాల్‌ రెడ్డి, మామిడి హరికృ ష్ణ తదితరులు ఇందులో పాల్గొన్నారు. స్వాతంత్య్ర, గణతంత్ర, రాష్ర్ట అవతరణ దినోత్సవాలను ప్రస్తుత పద్ధతిలోనే నిర్వహించాలా? ఏమైనా మార్పులు చేయాలా? అనే విషయంపై సమావేశంలో చర్చ జరిగింది. రాష్ర్ట వ్యాప్తంగా ఉన్న పోలీసు బలగాలను పిలిపించి ఎండలో కవాతు నిర్వహించడం, విద్యార్థులను కూడా రప్పించి ఎండలో ఇబ్బంది పెట్టడం వంటి కార్యక్రమాలు కొనసాగించవలసిన అవసరం ఉందా? లేదా? అనే విషయాలపై చర్చ జరిగింది. “రాష్ర్ట అవతరణ దినోత్సవం జూన్‌ 2న జరుగుతుంది. ఆ రోజు విపరీతమైన ఎండ ఉంటుంది. వడగాల్పులు కూడా ఉంటాయి. అప్పుడు పాఠశాలలకు సెలవులుంటాయి. ఈ సమయంలో విద్యార్థులను ఇండ్ల నుంచి తీసుకొచ్చి ఇబ్బంది పెట్టడం సమంజసం కాదు. ఎండలో కవాతు చేయడం వల్ల పోలీసులు, విద్యార్థులు కళ్లు తిరిగి పడిపోయిన సందర్భాలున్నాయి. తీవ్ర అస్వస్థతకు గురవుతున్నారు. పరేడ్‌ గ్రౌండ్‌ కూడా ఉత్సవాల నిర్వహణకు అనువుగా లేదు” అని సమావేశంలో అధికారులు అభిప్రాయపడ్డారు. పరేడ్‌ గ్రౌండ్‌ కు బదులుగా పబ్లిక్‌ గార్డెన్‌లోని జూబిలీహాల్‌కు ఎదురుగా ఉన్న మైదానంలో ఉత్సవాలు నిర్వహిస్తే సబబుగా ఉంటుందని సిటీ పోలీస్‌ కమిషనర్‌ అంజనీ కుమార్‌ ప్రతిపాదించారు. ఇతర అధికారులు కూడా దీన్ని అంగీకరించారు. పబ్లిక్‌ గార్డెన్‌కు, జూబిలీహాల్‌కు చారిత్రిక ప్రాధాన్యం కూడా ఉందని వారు వివరించారు. పోలీసులు, విద్యార్థులతో కవాతు నిర్వహించే పద్ధతికి చాలా రాష్ట్రాలు స్వస్తి పలికాయని, తెలంగాణలో కూడా ఉత్సవాలలో కవాతులను మినహాయించడం సముచితంగా ఉంటుందని చెప్పారు. పతాకావిష్కరణ, ముఖ్య అతిథి ప్రసంగాలకే పరిమితం కాకుండా, ఎట్‌ హోం కవి సమ్మేళనాలు, అవార్డుల ప్రదానోత్సవాలు కూడా నిర్వహించాలని సమావేశంలో అభిప్రాయాలు వ్యక్తమయ్యాయి.
