ఉత్తర్వులు జారీ చేయాలని అధికారులకు సిఎం కెసిఆర్‌ ఆదేశం
హైదరాబాద్‌ : గోదావరి నదిపై నిర్మితమవుతున్న తుపాకుల గూడెం బ్యారేజీకి తెలంగాణ ఆదీవాసీ వీరవనిత, వనదేవత ‘సమ్మక్క’ పేరు పెట్టాలని ముఖ్యమంత్రి కె.చంద్రశేఖర్‌రావు నిర్ణయించారు. ఈ మేరకు తుపాకులగూడెం బ్యారేజీకి ‘సమ్మక్క బ్యారేజీ’గా నామకరణం చేస్తూ సంబంధిత ఉత్తర్వుల (జిఓ)ను జారీ చేయాలని ఇఎన్‌సి మురళీధర్‌ రావును సిఎం ఆదేశించారు. ముక్కోటి దేవతల కరుణాకటాక్షాలు బలంగా ఉండడం చేతనే తెలంగాణలో అభివృద్ధ్ది అనుకున్న రీతిలో సాగుతున్నదని సిఎం తెలిపారు. సాగునీటి ప్రాజెక్టుల నిర్మాణం పూర్తయ్యి తెలంగాణ బీళ్లల్లోకి కాళేశ్వరం సాగునీరు చేరుకుంటున్న శుభ సందర్భంలో ఇప్పటికే పలు బ్యారేజీలకు, రిజర్వాయర్లకు దేవతామూర్తుల పేర్లను పెట్టుకున్నామని సిఎం గుర్తు చేసినట్లు ముఖ్యమంత్రి కార్యాలయం తెలియజేసింది.
నేడు కాళేశ్వరానికి సిఎం
ముఖ్యమంత్రి కెసిఆర్‌ కాళేశ్వరం ప్రాజెక్టులను గురువారం సందర్శించనున్నారు. బుధవారం రాత్రి హైదరాబాద్‌ నుంచి బయలుదేరి రాత్రి కరీంనగర్‌ చేరుకుని తీగలగుట్టపల్లిలో బస చేస్తారు. గురువారం ఉదయం 8 గంటలకు అక్కడ నుంచి రోడ్డు మార్గాన కరీంనగర్‌ కలేక్టరేట్‌లోని హెలిప్యాడ్‌కు చేరుకుని అక్కడి నుంచి కాళేశ్వరం ప్రాజెక్టుకు చేరుకుంటారు. దైవ దర్శనం అనంతరం హెలికాప్టర్‌ ద్వారా లంబటిపల్లిలోని లక్ష్మీబ్యారేజీని చేరుకుని పనులను పరిశీలిస్తారు. మధ్యాహ్నం 2 గంటలకు బయలుదేరి కరీంనగర్‌ తీగులగుట్టపల్లికి తిరిగి వస్తారు. గురువారం సాయంత్రం హైదరాబాద్‌కు తిరిగి వస్తారు. కాళేశ్వరం పర్యటన నేపథ్యంలో బుధవారం ముఖ్యమంత్రి ప్రగతిభవన్‌లో సంబంధిత అధికారులతో సమీక్ష నిర్వహించారు. ఈ సందర్భంగా సిఎం మాట్లాడుతూ కాళేశ్వరం ప్రాజెక్టులలోకి అనుకున్న రీతిలో సాగునీరు చేరుకుంటున్నదన్నారు. ఇప్పుడు రాష్ట్రంలో కట్టుకున్న బ్యారేజీలు నిండుకుండలా మారాయని, రానున్న వానం కాలం నుంచి వరద నీటి ప్రవాహం పెరుగుతుందన్నారు. ప్రాణహిత ద్వారా లక్ష్మీ బారేజీకి చేరుకునే వరద నీటిని ఎప్పటికప్పుడు ఎగువకు ఎత్తి పోసుకునే దిశగా అటునుంచి కాలువలకు మల్లించేందుకు ఇరిగేషన్‌ శాఖ ఇప్పటి నుంచే అప్రమత్తం కావాలని, అందుకు సంబంధించిన ఏర్పాట్లు చేసుకోవాలని సిఎం అధికారులకు సూచించారు. అందులో భాగంగా పనుల విభజన చేసుకోవాలని సిఎం తెలిపారు.ఈ సమీక్షాసమావేశంలో రాష్ట్ర మంత్రులు గుంగుల కమలాకర్‌, పువ్వాడ అజయ్‌ కుమార్‌, రైతుసమన్వయ సమితి అధ్యక్షులు, ఎంఎల్‌సి పల్లా రాజేశ్వర్‌రెడ్డి, ప్రభుత్వ ముఖ్య సలహాదారు రాజీవ్‌ శర్మ, సిఎంఓ కార్యదర్శి స్మితా సబర్వాల్‌, సిఎం ఓఎస్‌డి శ్రీధర్‌ రావు దేశ్‌పాండే, సాగునీటి శాఖ ఇఎన్‌సి మురళీధర్‌ రావు తదితరులు పాల్గొన్నారు.
తుపాకులగూడెం బ్యారేజీకి ‘సమ్మక్క’ పేరు
RELATED ARTICLES
