జూన్‌లో‘పోడు’ పట్టాలు

జులైలో ‘గృహలక్ష్మి’ పథకం ప్రారంభం
ముఖ్యమంత్రి కె.చంద్రశేఖర్‌ రావు ఆదేశం
ప్రజాపక్షం/ హైదరాబాద్‌ గిరిజనులకు పోడు భూముల పట్టాల పంపిణీ కార్యక్రమాన్ని జూన్‌ 24 నుంచి 30 వరకు నిర్వహించనున్నట్లు ముఖ్యమంత్రి కె.చంద్రశేఖర్‌ రావు తెలిపారు. సొంత జాగాలో ఇంటి నిర్మాణానికి ఉద్దేశించిన గృహలక్ష్మి పథకాన్ని జులై నెలలో ప్రారంభించాలని సిఎం ఆదేశించారు. తెలంగాణ రాష్ర్ట అవతరణ దశాబ్ది ఉత్సవాల నిర్వహణ నేపథ్యంలో రోజువారీ కార్యక్రమాల షెడ్యూల్‌ ఖరారు, పోడు భూముల పట్టాల పంపిణీ, తదితర అభివృద్ధి, సంక్షేమ కార్యక్రమాలపై ముఖ్యమంత్రి కె.చంద్రశేఖర్‌ రావు మంగళవారం సచివాలయంలో ఉన్నతస్థాయి సమావేశం నిర్వహించారు. ఈ సందర్భంగా తీసుకున్న పలు నిర్ణయాలను సిఎంఒ విడుదల చేసింది. నూతనంగా పోడు పట్టాలు పొందిన గిరిజనుల వివరాలు సేకరించి రైతుబంధు వర్తింపచేయాలని అధికారులను ఆదేశించారు. ఇప్పటికే ఆర్‌ఓఎఫ్‌ఆర్‌ ద్వారా రైతుబంధు పొందుతున్న వారితో పాటు నూతనంగా పోడు పట్టాలు అందుకోబోతున్న గిరిజన లబ్ధిదారులతో క్రోడీకరించి, రాష్ర్టంలో మిగతా రైతులకు మాదిరిగానే రైతుబంధు అందేలా చర్యలు తీసుకోవాలని అధికారులకు సూచించారు. ఇందుకు సంబంధించి ప్రభుత్వమే బ్యాంకు అకౌంట్‌ ను తెరిచి పోడు భూముల పట్టాల యాజమానులకు నేరుగా వారి ఖాతాల్లో రైతుబంధును జమచేస్తుందన్నారు. ఇందుకు సంబంధించి నూతనంగా పోడు పట్టాలు అందుకున్న గిరిజన రైతుల బ్యాంకు ఖాతాల వివరాలను ఆర్థిక శాఖ వారికి అందజేయాలని, ఈ దిశగా చర్యలు తీసుకోవాలని గిరిజన సంక్షేమ శాఖ మంత్రి సత్యవతి రాథోడ్‌ ను సిఎం కెసిఆర్‌ ఆదేశించారు. పోడు భూముల పంపిణీ కార్యక్రమానికి తానే స్వయంగా హాజరవుతానని సిఎం తెలిపారు.
25న జిల్లా కలెక్టర్ల కాన్ఫరెన్స్‌
తెలంగాణ రాష్ర్ట అవతరణ దశాబ్ది ఉత్సవాల నిర్వహణ నేపథ్యంలో రాష్ర్ట వ్యాప్తంగా ఘనంగా నిర్వహించేందుకు చేపట్టాల్సిన ఏర్పాట్లు, కార్యాచరణకు సంబంధించి ఈ నెల 25న జిల్లా కలెక్టర్ల కాన్ఫరెన్సు నిర్వహించాలని ముఖ్యమంత్రి కె. చంద్రశేఖర్‌ రావు నిర్ణయించారు. ఈ సమావేశంలో మంత్రులు, జిల్లా ఎస్‌పిలు పాల్గొంటారు.
ఇండ్ల స్థలాల పంపిణీ
ఇప్పటికే ఆయా గ్రామాల్లో ఇంకా మిగిలి వున్న నివాసయోగ్యమైన ప్రభుత్వ భూములను అర్హులైన నిరుపేదలను గుర్తించి వారి ఇండ్ల నిర్మాణాల కోసం దశాబ్ది ఉత్సవాల నేపథ్యంలో అర్హులకు ఇండ్ల స్థలాల పట్టాల పంపిణీ చేపట్టాలని సిఎం కెసిఆర్‌ ఆదేశించారు.
జులైలో గృహలక్ష్మి పథకం ప్రారంభం
గృహలక్ష్మి పథకానికి సంబంధించిన గైడ్‌ లైన్స్‌ను త్వరితగతిన తయారు చేయాలని, జూలై నెలలో గృహలక్ష్మి పథకం ప్రారంభించాలని అధికారులను సిఎం ఆదేశించారు. జులైలోనే దళితబంధు కొనసాగింపు కోసం ఏర్పాట్లు చేయాలని సిఎస్‌ను సిఎం ఆదేశించారు.
నిమ్స్‌ దవాఖాన నూతన భవనానికి శంకుస్థాపన
జూన్‌ 14, వైద్య ఆరోగ్య దినోత్సవం నాడు నిమ్స్‌ దవాఖాన విస్తరణ పనులకు సిఎం శ్రీకారం చుట్టనున్నారు. 2000 పడకలతో నూతనంగా నిర్మించనున్న సూపర్‌ స్పెషాలిటి హాస్పిటల్‌ భవన నిర్మాణానికి సిఎం కెసిఆర్‌ శంకుస్థాపన చేయనున్నారు.