ప్రజాపక్షం / హైదరాబాద్‌/ఖమ్మం
భారీ వర్షాలతో పెద్ద సంఖ్యలో ప్రాణ నష్టం, లక్షల ఎకరాల్లో పంట నష్టం వాటిల్లినందున జాతీయ విపత్తుగా ప్రకటించాలని ప్రధానమంత్రి నరేంద్ర మోదీకి ముఖ్యమంత్రి రేవంత్‌ రెడ్డి విజ్ఞప్తి చేశారు. ప్రాథమిక అంచనా ప్రకారం రూ.5,438 కోట్లు నష్టం జరిగినట్లు తెలిందని ఆయన తెలిపారు. సోమవారం అతీతంగా ఆలోచన చేసి కేంద్ర ప్రభుత్వం పెద్దన్న పాత్ర పోషించి నిధులు విడుదల చేయాలని ఇదే సందర్బంలో ప్రధాన మంత్రి తెలంగాణలో పర్యటించి ప్రజల కష్టాలను తెలుసుకుని స్పందించాల్సిందిగా కోరుతున్నానని ఆయన తెలిపారు. ఈమేరకు రాయాలని ప్రధాన కార్యదర్శి శాంతికుమారిని ముఖ్యమంత్రి ఆదేశించారు. భారీ వర్షా ల నేపథ్యంలో తొలుత కమాండ్‌ కంట్రోల్‌ రూమ్‌ లో ఉన్నతాధికారులతో ముఖ్యమంత్రి రేవంత్‌రెడ్డి సోమవారం ఉద యం సమీక్ష నిర్వహించారు. అతి తక్కువ సమయంలో ఇంత భారీ వర్షాలు కురవడానికి కారణాలు, గత రెండు రోజులు, రేపటి పరిస్థితులను సిఎం వాతావరణ శాఖ అధికారులను అడిగి తెలుసుకున్నా రు. ఊహించిన దానికన్నా ఎక్కవ వర్షాలు వచ్చాయని, గతంలో అయిదేళ్లకో, పదేళ్లకో ఇలా వచ్చేవని, ఇటీవల తరచూ వస్తున్నాయ ని, దీనిపై మరింత అధ్యయనాలు జరుగుతున్నాయని వాతావరణ శాఖ అధికారులు సిఎంకు వివరించారు. రోడ్డు మార్గం ద్వారా ఖమ్మంకు పాలేరు నియోజక వర్గంలోని పాలేరు ప్రాజెక్టును పరిశీలించారు. పలు చోట్ల దెబ్బతిన్న రోడ్లను పరిశీలించి ఖమ్మం సమీపంలోని మున్నేరు వరద బాధిత ప్రాంతాలలో పర్యటించారు. రాజీవ్‌ గృహ కల్ప, బొక్కలగడ్డ, మోతి నగర్‌ తదితర ప్రాంతాలలో పర్యటించి ప్రజలు అధైర్యపడవద్దని ప్రభుత్వం అన్ని విధాలా ఆదుకుంటుందని అభయమిచ్చారు. తక్షణ సాయం అందిస్తామని తెలిపారు. కంట్రోల్‌ రూమ్‌లో ఎక్కువగా ఉండే జిల్లాల కలెక్టర్లు, అన్ని విభాగాల అధికారులు, సిబ్బందిని అప్రమత్తం చేయాలని ముఖ్యమంత్రి ఆదేశించారు. లోతట్టు ప్రాంతాల్లోని ప్రజలను అవసరమైతే వెంటనే సహాయక శిబిరాలకు తరలించాలని సిఎం ఆదేశించారు. జిల్లా కలెక్టరేట్లలో కంట్రోల్‌ రూమ్‌లు ఏర్పాటు చేసి 24 గంటలు పర్యవేక్షణ కొనసాగించాలని రేవంత్‌రెడ్డి సూచించారు. చెరువులు, కల్వర్టులు, లోలెవల్‌ కాజ్‌వేలు ఇతర ప్రదేశాల్లో వివిధ శాఖల అధికారులతో పర్యవేక్షణ చేయించాలని ముఖ్యమంత్రి రేవంత్‌ రెడ్డి ఆదేశించారు. వాతావరణ పరిస్థితులపై ప్రతి మూడు గంటలకో బులెటిన్‌ విడుదల చేయాలని ముఖ్యమంత్రి సూచించారు. 25 పెద్ద టవర్లు కూలిపోయినప్పటికీ విద్యుత్తు సిబ్బంది వెంటనే కరెంట్‌ సరఫరాను పునరుద్ధరించారని ముఖ్యమంత్రి గుర్తు చేశారు. అదే విధంగా 24 గంటలు అప్రమత్తంగా ఉండాలని, విద్యుత్తు సమస్యలు, ప్రమాదాలు తలెత్తకుండా చర్యలు తీసుకోవాలని సిఎం ఆదేశించారు. లోతట్టు ప్రాంతాల్లో ఉన్న వారిని గుర్తించి తక్షణమే పునరావాస కేంద్రాలకు తరలించి నష్టాలను నివారించాలని చెప్పారు. వాగులు, వంకలు పొర్లుతున్న దృష్ట్యా దెబ్బతిన్న రోడ్లు, వరద ప్రవహిస్తున్న రోడ్లపై నుంచి ఎవరూ దాటే ప్రయత్నం చేయవద్దని ముఖ్యమంత్రి హెచ్చరించారు. రెవిన్యూ, పోలీసు, ఇతర విభాగాల అధికారులు బృందాలు ఏర్పడి అన్ని చోట్ల తగిన జాగ్రత్తలు తీసుకోవాలని తెలిపారు.
పంట నష్టం వివరాలు సేకరించాలి
ఇళ్లు కూలిపోయిన వారికి ఇందిరమ్మ ఇళ్లు
రైతులకు జరిగిన పంట నష్టంపైనా ముఖ్యమంత్రి రేవంత్‌ రెడ్డి సమీక్షించారు. ప్రాథమిక అంచనాల ప్రకారం లక్షన్నర ఎకరాలకుపైగా పంట నష్టం వాటిల్లిందని అధికారులు తెలిపారు. నాలుగు లక్షలకుపైగా ఎకరాల్లో పంట నష్టం వాటిల్లినట్లు వార్తలు వస్తున్నాయని, తక్షణమే రంగంలోకి దిగి పంట నష్టం వివరాలు సేకరించాలని సిఎం రేవంత్‌ రెడ్డి ఆదేశించారు. కామారెడ్డిలో వరదలు వచ్చినప్పుడు పంట నష్ట పరిహారం వెంటనే విడుదల చేశామని, ప్రస్తుతం అలా చేసేందుకు ఏర్పాట్లు చేయాలని సిఎం అన్నారు. నష్టం వివరాలను సమగ్రంగా పేర్కొంటూ కేంద్ర ప్రభుత్వ బృందాలు సైతం తక్షణమే పంట నష్ట పరిశీలనకు వచ్చే ఏర్పాట్లు చేయాలని ముఖ్యమంత్రి సూచించారు. ఇళ్లు కూలిపోయిన వారికి ఇందిరమ్మ ఇళ్లు మంజూరు చేయాలని అధికారులను ముఖ్యమంత్రి ఆదేశించారు. రైల్వే లైన్‌ సైతం కొట్టుకుపోవడం, పదుల సంఖ్యలో రోడ్లు, చెరువులకు గండి పడడం, విద్యుత్‌ స్తంభాలు కూలిపోవడం, ఇతర ఆస్తి నష్టాలు చోటుచేసుకున్నందున స్వయంగా ప్రధానమంత్రిని పర్యటనకు రావాలని కోరుతూ లేఖ రాయాలని సిఎస్‌కు ముఖ్యమంత్రి సూచించారు.
విపత్తులను ఎదుర్కునేందుకు టిజిడిఆర్‌ఎఫ్‌ ఏర్పాటు
యువ పోలీసులకు ఎన్‌డిఆర్‌ఎఫ్‌ తరహాలో శిక్షణ
భవిష్యత్తులో ఇలాంటి విపత్తులను సమర్థవంతంగా ఎదుర్కునేందుకు తెలంగాణ డిజాస్టర్‌ రెస్పాన్స్‌ ఫోర్స్‌ (టిజిడిఆర్‌ఎఫ్‌) ను ఏర్పాటు చేయాలని ముఖ్యమంత్రి నిర్ణయం తీసుకున్నారు. రాష్ట్రంలోని 8 బెటాలియన్లలో మూడో వంతు యువ పోలీసులకు ఎన్‌డిఆర్‌ఎఫ్‌ తరహాలో శిక్షణ ఇవ్వాలని ముఖ్యమంత్రి రేవంత్‌ రెడ్డి డిజిపిని ఆదేశించారు. భారీ వర్షాలు, వరదల సమయంలో ఎన్‌డిఆర్‌ఎఫ్‌ నుంచి తక్షణం సిబ్బంది ఎందుకు అందడంలేదని ముఖ్యమంత్రి ప్రశ్నించారు. మనం పెట్టిన ఇండెంట్‌ ఆధారంగా వాళ్ల దగ్గర ఉన్న బలగాలను పంపుతారని, ఇందుకు సమయం పడుతుందని అధికారులు బదులిచ్చారు. స్పందించిన ముఖ్యమంత్రి మన బెటాలియన్లలోని యువ పోలీసులకు ఎన్‌డిఆర్‌ఎఫ్‌ తరహాలో శిక్షణ ఇవ్వాలని ఆదేశించారు. ఎక్విప్‌మెంట్‌ సమస్యగా ఉంటుందని అధికారులు తెలపగా, ఎంత ఖర్చయినా ఫర్వాలేదని, వెంటనే కొనుగోలు చేయాలని సిఎం సూచించారు. ఒడిశా, గుజరాత్‌లో అలా శిక్షణ ఇచ్చి బృందాలు ఏర్పాటు చేసుకున్నాయని అధికారులు తెలపగా, అవసరమైతే అక్కడి విధానాలను అధ్యయనం చేయాలని, అక్కడి అనుభవం ఉన్నవారితో శిక్షణ ఇప్పించాలని సిఎం సూచించారు. దానికోసం ఒక మాన్యువల్‌ రూపొందించాలని, ప్రతి సీజన్‌ ముందు శిక్షణ ఇప్పించిన సిబ్బందితో రిహార్సల్స్‌ చేయించాలని ముఖ్యమంత్రి ఆదేశించారు.
జిహెచ్‌ఎంసి, కమిషనరేట్ల పరిధిలో
నగరంలో ఎక్కడా చిన్న అవాంఛనీయ సంఘటన చోటుచేసుకోవడానికి వీల్లేదని ముఖ్యమంత్రి రేవంత్‌ రెడ్డి అధికారులను ఆదేశించారు. విద్యుత్‌, ట్రాఫిక్‌, తాగు నీరు, పారిశుధ్యం విషయాల్లో అప్రమత్తంగా ఉండాలని సిఎం సూచించారు. ట్రాఫిక్‌కు నిరంతరం పర్యవేక్షించాలని, విద్యుత్‌ సమస్యలు ఉంటే వెంటనే పరిష్కరించాలని, లోతట్టు ప్రాంతాల ప్రజలను సహాయ శిబిరాలను తరలించాలని సూచించారు. నిత్యం పనికి వెళ్లే కూలీలు పనులు ఉండక ఇంటి దగ్గరే ఉండిపోతారని, వారిని గుర్తించి బియ్యం, పప్పులు, నిత్యావసర సరకులు పంపిణీ చేయాలని ముఖ్యమంత్రి ఆదేశించారు. సమీక్షలో మంత్రులు కోమటిరెడ్డి వెంకట్‌ రెడ్డి, డి.శ్రీధర్‌బాబు, సిఎం సలహాదారు వేం నరేంద్‌ రెడ్డి, ఎంఎల్‌ఎ దానం నాగేందర్‌, ఎంపి ఎం.అనిల్‌కుమార్‌ యాదవ్‌, సిఎస్‌ శాంతి కుమారి, డిజిపి డాక్టర్‌ జితేందర్‌, అన్ని శాఖల ఉన్నతాధికారులు పాల్గొన్నారు.
