కాళేశ్వరం నీటితో రిజర్వాయర్లు నింపండి

అధికారులకు ముఖ్యమంత్రి కెసిఆర్‌ ఆదేశం
గోదావరి జలాలకు పుష్పాభిషేకం
ప్రాజెక్టు పనులపై సంతోషం
రైతులకు సాగునీటి గోస లేకుండా చేయడమే లక్ష్యమని వ్యాఖ్య
ప్రజాపక్షం / హైదరాబాద్‌/ జయశంకర్‌ భూపాలపల్లి ప్రతినిధి/ కాళేశ్వరం కాళేశ్వరం ప్రాజెక్టుకు సంబంధించిన బ్యారేజీల వద్ద ప్రస్తుతం పూర్తి స్థాయిలో నీరు నిలువ ఉందని, ఈ ఎండాకాలం అంతా ఈ నీటితో రాష్ట్రంలోని రిజర్వాయర్లు, చెరువులను నింపాలని రాష్ట్ర ముఖ్యమంత్రి కె.చంద్రశేఖర్‌రావు సంబంధి త అధికారులను ఆదేశించారు. ప్రాజెక్టుల వారీగా ఆపరేషన్‌ రూల్స్‌ రూపొందిం చి అమలు చేయాలన్నారు. కాళేశ్వరం ప్రాజెక్టు నిర్మించిన స్ఫూర్తితోనే రాష్ట్రంలో చేపట్టిన ఇతర భారీ ప్రాజెక్టుల నిర్మాణాలను వేగవంతం చేయాలని కోరారు. మంగళవారం మేడిగడ్డ వద్ద నిర్మించిన లక్ష్మీ బ్యారేజీని ముఖ్యమంత్రి సందర్శించారు. సిఎం సతీమణి శోభ, మంత్రులు, ఇతర నాయకులు, అధికారులతో కలిసి గోదావరి జలాలకు పుష్పాభిషేకం చేశారు. ఈ సందర్భంగా ముఖ్యమంత్రి కెసిఆర్‌ ప్రాజెక్టు నిర్మాణం సందర్భంగా ఎదురైన అనుభవాలను గుర్తు చేసుకున్నట్లు సిఎం కార్యాలయం తెలియజేసింది. కాళేశ్వరం ప్రాజెక్టు నిర్మాణం అనుకున్న సమయంలో అనుకున్న విధంగా పూర్తయి నీటి పంపింగ్‌ కూడా నిరాటంకంగా జరుగుతుండడం పట్ల సిఎం కె.చంద్రశేఖర్‌రావు సంతృప్తిని, సంతోషాన్ని వ్యక్తం చేశారు. ప్రాజెక్టు నిర్మాణం త్వరితగతిన పూర్తి కావడంలో కృషి చేసిన నీటి పారుదల శాఖాధికారులు, వర్కింగ్‌ ఏజెన్సీలు, ఇతర శాఖల ఉద్యోగులను ముఖ్యమంత్రి అభినందించారు. సాగునీరు లేక తెలంగాణ రైతాంగం దశాబ్దాల తరబడి గోసను అనుభవించిందని, తెలంగాణ రాష్ట్రం సాధించుకున్న ఫలితం సంపూర్ణంగా దక్కాలంటే రైతులు రెండు పంటలను సమృద్ధిగా పండించేందుకు అవసరమైన సాగునీరు అందించి తీరాలని మొదట్లోనే నిర్ణయించుకున్నామని ముఖ్యమంత్రి తెలిపారు. అటు ప్రాణహిత, ఇటు గోదావరి రెండు నదుల నీళ్లు కలిసిన తరువాత బ్యారేజీ నిర్మాణం చేపడితే ఎక్కువ కాలం పాటు కావలసినంత నీళ్లు పంపింగ్‌ చేయవచ్చని వ్యూహం రూపొందించామన్నారు. వ్యాప్కోస్‌తో శాస్త్రీయంగా సర్వే నిర్వహించి మేడిగడ్డ పాయింట్‌ వద్ద బ్యారేజీ నిర్మించాలని నిర్ణయం తీసుకున్నామని, 16.17 టిఎంసిల నీటి నిలువ సామర్థ్యంతో దాదాపు 100 మీటర్ల ఎత్తులో బ్యారేజీ నిర్మించడం వల్ల దాదాపు 7 నెలల పాటు నీటిని పంపింగ్‌ చేయవచ్చని అంచనా వేశామని, అనుకున్నది అనుకున్నట్లుగా జరుగుతున్నదని, 99.7 మీటర్ల ఎత్తులో 16.17 టింఎంసిల నీరు నిలువ వున్నదన్నారు. నిర్మాణాలన్నీ అనుకున్నవి అనుకున్నట్లుగా జరిగాయని, నీటి పంపింగ్‌ కూడా ఎలాంటి ఇబ్బంది లేకుండా సాఫీగా జరుగుతున్నదని, మెడిగడ్డ పాయింట్‌ నుండి 54 కిలోమీటర్ల వరకు ప్రాణహితలో, 42 కిలోమీటర్ల వరకు గోదావరిలో నీరు నిలువ ఉండడంతో జలకళ ఉట్టి పడుతున్నదని, బ్యారేజీలు సముద్రాలను తలపిస్తున్నాయి. ఏ సమయం ఎట్ల వచ్చినా మేడిగడ్డ నుండి ఎల్లంపల్లి, మిడ్‌ మానేరు, ఎల్‌ఎండి, మల్లన్న సాగర్‌, కొండపోచమ్మ సాగర్‌, బస్వాపూర్‌, గంధమల్ల రిజర్వాయర్లకు ప్రతీ ఏటా నీరందుతుందని సిఎం వివరించారు. నిజాంసాగర్‌కు కూడా కాళేశ్వరం ప్రాజెక్టు ద్వారానే నీరందించడానికి ఏర్పాట్లు జరుగుతున్నాయని, అవసరమైతే ఎస్‌ఆర్‌ఎస్‌పికి కూడా ఈ ప్రాజెక్టు నుండే నీటి పంపింగ్‌ చేయడానికి ఏర్పాట్లు చేశామని, కాళేశ్వరం ప్రాజెక్టు తెలంగాణ సాగునీటి ముఖచిత్రాన్ని మార్చి వేసిందన్నారు. కాళేశ్వరం ప్రాజెక్టు నిర్మించిన స్ఫూర్తితోనే దేవాదుల ప్రాజెక్టుకు సంబంధించిన తూపాకుల గూడెం బ్యారేజీ, సీతారామ ప్రాజెక్టుకు సంబంధించిన దుమ్ముగూడెం బ్యారెజీ నిర్మాణాలు శరవేగంగా జరగుతున్నాయని, ఈ ప్రాజెక్టులన్నీంటిని త్వరితిగతిన పూర్తి చేసి రైతుల సాగునీట గోసను శాశ్వతంగా రూపుమాపలన్నది ప్రభుత్వ లక్ష్యమని ముఖ్యమంత్రి కెసిఆర్‌ చెప్పారు. “కాళేశ్వరం ప్రాజెక్టు నిర్మాణాన్ని ఓ యజ్ఞంలా చేపట్టాం. 50 డిగ్రీల ఉష్ణోగ్రత ఉన్న సమయంలో కూడా వేలాది మంది కార్మికులు పనిలో నిమగ్నమై 365 రోజులు పనిచేశారు. భూసేకరణతో పాటు వివిధ క్రాసింగ్‌లకు సంబంధిచిన అంశాలను అధికారులు సమయోచితంగా, సమర్ధవంతంగా పరిష్కరించారు. మొత్తంగా రాష్ట్ర రైతాంగానికి ఎంతో ఆవశ్యకమైన ప్రాజెక్టు నిర్మాణం పూర్తయి వినియోగంలోకి రావడం ఎంతో సంతోషంగా వుంది. తెలంగాణ రైతుల కల నెరవేరినందుకు, సాగునీటి సమస్య తీరుతున్నందుకు సంతృప్తిగా వుంది” అని ముఖ్యమంత్రి అన్నారు. “మేడిగడ్డ బ్యారేజీ, తుపాకుల గుడెం బ్యారేజీ, దుమ్ముగూడెం బ్యారేజీల వల్ల కంట్రోల్‌ రూములు ఏర్పాటు చేయాలి. అన్ని ప్రాజెక్టులకు సంబంధించి ఆపరేషన్‌ రూల్స్‌ రూపొందించాలి. సమయానుగుణంగా రూల్స్‌ను అమలు చేయాలి” అని ముఖ్యమంత్రి నీటి పారుదల శాఖాధికారులను ఆదేశించారు. ఈ కార్యక్రమంలో మంత్రులు కొప్పుల ఈశ్వర్‌, గంగుల కమలాకర్‌, ఎర్రబెల్లి దయాకర్‌ రావు, ప్రభుత్వ సలహాదారు రాజీవ్‌ శర్మ, ప్రభుత్వ ప్రధాన కార్యదర్శి సోమేష్‌ కుమార్‌, డిజిపి ఎం.మహేందర్‌రెడ్డి, నీటిపారుదల శాఖ ముఖ్య కార్యదర్శి రజత్‌ కుమార్‌, సిఎం కార్యదర్శి స్మితా సభర్వాల్‌, నీటిపారుదల శాఖ ఇఎన్‌సిలు మురళీధర్‌రావు, వెంకటేశ్వర్లు, పెద్దపల్లి ఎంపి వెంకటేష్‌ నేత, పెద్దపలి – వరంగల్‌ రూరల్‌ జడ్‌పి చెర్‌ పర్సన్లు పుట్ట మధు, గండ్ర జ్యోతి, ప్రభుత్వ విప్‌ బాల్క సుమన్‌, ఎంఎల్‌ఎలు గండ్ర వెంకట్రామరెడ్డి, పోర్తిక చందర్‌, దివాకర్‌రావు, మనోహర్‌ రెడ్డి, ఎంఎల్‌సిలు పురాణం సతీష్‌, నారదాసు లక్మ్తణ్‌ రావు తదితరులు పాల్గొన్నారు.
కెసిఆర్‌కు ఘన స్వాగతం…
తెలంగాణ ప్రభుత్వం ప్రతిష్టాత్మకంగా నిర్మించిన మేడిగడ్డ లక్ష్మీ బ్యారేజీ పర్యటనలో భాగంగా జయశంకర్‌ భూపాలపల్లి జిల్లాలో దక్షిణ కాశీగా ప్రసిద్ధిగాంచిన ప్రముఖ పుణ్యక్షేత్రమైన కాళేశ్వరం ఆలయాన్ని సతీసమేతంగా సిఎం కెసిఆర్‌ దంపతులు మంగళవారం సందర్శించి కాళేశ్వర ముక్తీశ్వర స్వామి వారికి ప్రత్యేక పూజలు నిర్వహించారు. ఆలయానికి చేరుకున్నప్పుడు సిఎం కెసిఆర్‌ దంపతులకు ఆలయ ప్రధాన రాజగోపురం వద్ద ఆలయ అధికారులు పూర్ణకుంభంతో ఘన స్వాగతం పలికారు. సిఎం కెసిఆర్‌ దంపతులు ఆలయ అర్చకుల వేద మంత్రోచ్ఛారణల మధ్య కాళేశ్వర ముక్తీశ్వర స్వామి వారిని దర్శించుకొని ప్రత్యేక పూజలు నిర్వహించారు. అనంతరం పార్వతి అమ్మవారిని సిఎం కెసిఆర్‌ దంపతులు దర్శించుకొన్నారు. కళ్యాణ మంటపం వద్ద సిఎం కెసిఆర్‌ దంపతులను స్వామి వారి శేష వస్త్రాలతో సన్మానించి, స్వామి వారి చిత్ర పటాన్ని అందించారు.అనంతరం కాళేశ్వరంలోని గోదావరి విఐపి ఘాట్‌కు చేరుకొని ప్రాణహిత, గోదావరి సంగమం తీరం వద్ద సిఎం కెసిఆర్‌ దంపతులు గోదారమ్మ నది మా తల్లికి ప్రత్యేక పూజలు నిర్వహించి పసుపు, కుంకుమ, పూలు, పండ్లతో పాటు నాణేలను సమర్పించారు.