కాంగ్రెస్‌ ‘ఆరు’ గ్యారంటీలతోబిఆర్‌ఎస్‌ కకావికలం

టిపిసిసి అధ్యక్షుడు రేవంత్‌రెడ్డి వ్యాఖ్య
ప్రజాపక్షం / హైదరాబాద్‌ విజయభేరి సభలో కాంగ్రెస్‌ పార్టీ ప్రకటించిన ఆరు గ్యారంటీలతో బిఆర్‌ఎస్‌ నేతలు కకావికాలం అవుతున్నారని టిపిసిసి అధ్యక్షుడు రేవంత్‌ రెడ్డి వ్యాఖ్యానించారు. తాము ఏం చేస్తామో చెబుతూ ప్రజల్లోకి వెళతామని, గతంలో ఇచ్చిన ప్రతీ హామీని కాంగ్రెస్‌ నెరవేర్చిందని గుర్తు చేశారు. రాష్ర్టంలో కాంగ్రెస్‌ అధికారంలోకి రావడం తన స్వప్నం అని సభలో సోనియా చెప్పారన్నారు. గాంధీభవన్‌లో టిపిసిసి ప్రచార కమిటీ చైర్మన్‌ మధు యాస్కీ గౌడ్‌, షబ్బీర్‌ అలీలతో కలిసి సోమవారం ఏర్పాటు చేసిన మీడియా సమావేశంలో రేవంత్‌రెడ్డి మాట్లాడుతూ సోనియా గాంధీ ప్రకటించిన ఆరు గ్యారంటీలను వందరోజుల్లో అమలు చేస్తామని రాహుల్‌ హామీ ఇచ్చారని తెలిపారు. “విజయభేరిలో ప్రకటించిన విధంగా మహాలక్ష్మి పథకం ద్వారా మహిళలకు
ప్రతీ నెల రూ.2500, రూ.500లకే గ్యాస్‌ సిలిండర్‌ అందించనున్నాం. రైతు భరోసా ద్వారా రైతులకు, కౌలు రైతులకు ఏడాదికి రూ.15000, వ్యవసాయ కూలీలకు ఏడాదికి రూ.12000 అందిస్తాం. గహ జ్యోతి ద్వారా 200 యూనిట్ల వరకు ఉచిత విత్యుత్‌ అందించనున్నాం. ఇందిరమ్మ ఇండ్లు పథకం ద్వారా ఇంటి స్థలంతోపాటు ఇల్లు కట్టుకునేందుకు రూ.5లక్షలు అందించనున్నాం. యువ వికాసం ద్వారా చదువుకునే విద్యార్థులకు రూ.5లక్షల వరకు సాయం అందించనున్నాం చేయూత పథకం ద్వారా రూ.4వేలు పెన్షన్‌ ఇవ్వాలని కాంగ్రెస్‌ నిర్ణయించింది. రాజీవ్‌ ఆరోగ్యశ్రీ ద్వారా రూ.10లక్షల వరకు ఆరోగ్యబీమా అందించనున్నాం” అని రేవంత్‌ రెడ్డి వివరించారు.
ఇచ్చిన మాట నిలబెట్టుకోవడంలో కాంగ్రెస్‌ ట్రాక్‌ రికార్డ్‌ చూసి నిర్ణయం మీరే తీసుకోవాలని ప్రజలని కోరారు. కాంగ్రెస్‌ ప్రభుత్వానికి, బీఆర్‌ఎస్‌ ప్రభుత్వానికి మధ్య తేడాలని గమనించాలని చెప్పారు. గతంలో కాంగ్రెస్‌ అధికారంలో ఉన్నప్పుడు ఉచిత విద్యుత్‌, ఇందిరమ్మ ఇండ్లు, అర్హులకు పోడు భూముల పట్టాలు,ఆరోగ్యశ్రీ పథకాలు అమలు చేసి చూపించామన్నారు. కానీ అందుకు భిన్నంగా నల్లధనం తెస్తామని ప్రతి పేదవాడి ఖాతాలో 15 లక్షలు వేస్తామని, ఏటా 2 కోట్ల ఉద్యోగాలు ఇస్తామని కేంద్రంలోని మోడీ ప్రభుత్వం…దళిత ముఖ్యమంత్రి, దళితులకు మూడెకరాలు, డబుల్‌ బెడ్రూం ఇండ్లు.. అంటూ ఇక్కడ కెసిఆర్‌ మోసం చేశారని రేవంత్‌ రెడ్డి విమర్శించారు.
“2004 నుంచి 2014 వరకు కాంగ్రెస్‌ ఇచ్చిన హామీలు..తెలంగాణ వచ్చాక కెసిఆర్‌ ఇచ్చిన హామీలపై చర్చ పెట్టండి. ఎవరు మాట తప్పారో.. ఎవరు అమలు చేశారో తెలుస్తుంది” అని సవాలు విసిరారు.బీఆరెస్‌ కు ఇక మిగిలింది మరో 99 రోజులే అని రేవంత్‌ రెడ్డి హెచ్చరించారు.
తెలంగాణను సాకారం చేసిన సోనియమ్మను విమర్శిస్తారా?
ఇచ్చిన మాట ప్రకారం సోనియా గాంధీ తెలంగాణ రాష్ర్ట ఏర్పాటు కలను నెరవేర్చారని, అటువంటి తెలంగాణ తల్లి సోనియమ్మను స్వాగతించాల్సింది పోయి.. బిఆరెస్‌ నేతలు విమర్శలు చేస్తున్నారని రేవంత్‌ రెడ్డి ధ్వజమెత్తారు. బిఆరెస్‌ నేతలు రాజకీయ విచక్షణ కోల్పోయి మాట్లాడుతున్నారని మండిపడ్డారు. పార్లమెంట్లో పెప్పర్‌ స్ప్రే కొట్టి, బిల్లు పేపర్లు చింపేసినా సోనియా గాంధీ తెలంగాణ ప్రత్యేక రాష్ర్టం ఇచ్చారు. సోనియా గాంధీని గౌరవంగా స్వాగతించి ఉంటే బిఆర్‌ఎస్‌ పార్టీకి రాజకీయ విజ్ఞత ఉన్నట్టు అనిపించేదన్నారు. బంట్రోతులు అందరూ చొక్కాలు చించుకుంటున్నారని రేవంత్‌ రెడ్డి వ్యాఖ్యానించారు. రాజకీయ విచక్షణ కోల్పోయి వీధి కుక్కల కంటే దారుణంగా దిగజారి మాట్లాడుతున్నారని ఆయన ధ్వజమెత్తారు.
ఆ స్లోగన్‌ తెలంగాణ ప్రజలది కాదు
నీళ్ళు నిధులు నియామకాలు అనేది తెలంగాణ ప్రజల స్లోగన్‌ కాదు.. అది కెసిఆర్‌ స్లోగన్‌ అని రేవంత్‌ రెడ్డి అన్నారు. తెలంగాణ ప్రజలు కోరుకున్నది స్వేచ్ఛ, ఆత్మ గౌరవం అని వ్యాఖ్యానించారు. మత విద్వేషాలతో రాజకీయాలు చేసే బీజేపీకి భరతమాత గురించి మాట్లాడే అర్హత ఉందా? అని ప్రశ్నించారు. ఉద్యమకారులకు భూమి ఇవ్వడం అంటే వాళ్ళని గుర్తించి గౌరవం ఇవ్వడమే అన్నారు. బండి సంజయ్‌, రాజ్‌ గోపాల్‌ రెడ్డి, విశ్వేశ్వర్‌ రెడ్డి లేవనెత్తిన అంశాలపై కిషన్‌ రెడ్డి స్పందించాలి అని రేవంత్‌ రెడ్డి డిమాండ్‌ చేశారు.