కాంగ్రెస్‌కు షాక్‌

అహ్మదాబాద్‌ : రాజ్యసభ ఎన్నికల వేళ కాంగ్రెస్‌ పార్టీకి ఊహించని షాక్‌ తగిలింది. గుజరాత్‌లో నలుగురు కాంగ్రెస్‌ శాసనసభ్యులు తమ పదవులకు రాజీనామా చేశారు. ఈ మేరకు వారు తమ రాజీనామా లేఖలను ఆదివారం అసెంబ్లీ స్పీకర్‌ రాజేంద్ర త్రివేదికి సమర్పించారు. గుజరాత్‌లో నాలుగు రాజ్యసభ స్థానాలకు ఈ నెల 26న ఎన్నికలు జరగనున్నాయి. కాగా, నలుగురు రాజీనామాలకు స్పీకర్‌ ఆమోదం తెలిపారు. రాజీనామా చేసిన శాసనసభ్యుల పేర్లను సోమవారం అసెంబ్లీలో ప్రకటిస్తామని రాజేంద్రత్రివేది తెలిపారు. నలుగురు కాంగ్రెస్‌ ఎంఎల్‌ఎలు శనివారం తన కు రాజీనామాలను సమర్పించాలని, వారి పేర్లను సోమవారం ప్రకటిస్తానన్నారు. వీరి రాజీనామా తో 182 స్థానాలున్న అసెంబ్లీలో కాంగ్రెస్‌ బలం 73 నుంచి 69కి చేరింది. రాజ్యసభ ఎన్నికలకు ముందు తమ ఎంఎల్‌ఎలను కాపాడుకునేందుకు శనివారం 14 మందిని జైపూర్‌కు తరలించింది. ఇదిలా ఉండగా, కాంగ్రెస్‌ కీలకంగా భావిస్తున్న రాజ్యసభ ఎన్నికల ముందు ఎంఎల్‌ఎలు రాజీనామా చేయడం ఆ పార్టీ నేతలను తీవ్ర కలవరానికి గురిచేస్తోంది. రాజ్యసభ ఎన్నికల్లో తమ అభ్యర్థుల విజయాన్ని అడ్డుకునేందుకు అధికార బిజెపి కుట్రలు పన్నుతోందని కాంగ్రెస్‌ సభ్యులు ఆరోపిస్తున్నారు. రాష్ట్ర అసెంబ్లీలో మొత్తం 182 సభ్యులకు గాను బిజెపికి 103 మంది సభ్యుల మద్దతుంది. అయితే ఎన్నికలు జరిగే నాలుగు స్థానాలను రెండు పార్టీల సంఖ్యా బలాలను బట్టి కాంగ్రెస్‌, బిజెపి చెరి రెండు స్థానాలను గెలుచుకునే అవకాశం ఉంది. అయితే మూడో స్థానాన్ని కూడా సొంతం చేసుకునేందుకు బిజెపి పావులు కదుపుతోంది. ఈ క్రమంలోనే 111 మంది సభ్యుల మద్దతును కూడగట్టుకునే పనిలో ఆ రాష్ట్ర నాయకత్వం నిమగ్నమైంది. మరోవైపు రెండు స్థానాలను దక్కించుకోవాలంటే విపక్ష కాంగ్రెస్‌కు 74 మంది సభ్యుల మద్దతు అవసరం కానుంది. తాజాగా నలుగురు శాసనసభ్యుల రాజీనామాతో కేవలం ఒక్క స్థానాన్ని మాత్రమే గెలుచుకునే అవకాశం ఉంది. అయితే ఎన్నికలకు మరికొంత సమయం ఉన్నందును వారిని తిరిగి తమవైపుకు తిప్పుకునేందుకు కాంగ్రెస్‌ నేతలు మొదలుపెట్టారు.