కమిటీకి ప్రభుత్వం విముఖత

పారిశ్రామిక వివాదాల చట్టంలో కమిటీ ప్రస్తావన లేదన్న సర్కారు
సమ్మె వ్యవహారంలో హైకోర్టులో అఫిడవిట్‌ దాఖలు
ఉన్నత న్యాయస్థానంలో విచారణ పెండింగ్‌లో ఉన్నందున లేబర్‌ కోర్టుకు వెళ్లలేదని నివేదన
ఆర్‌టిసి విభజనకు కేంద్రం అనుమతి అవసరం: హైకోర్టు స్పష్టీకరణ
తదుపరి విచారణ 18కి విచారణ
హైదరాబాద్‌ : ఆర్‌టిసి కార్మికుల సమ్మె పరిష్కారానికి హైకోర్టు డివిజన్‌ బెంచ్‌ సూచించిన సుప్రీంకోర్టు మాజీ న్యాయమూర్తుల ఉన్నతస్థాయి కమిటీకి రాష్ట్ర ప్రభుత్వం అంగీకరించ లేదు. కార్మికులు, యాజమాన్యం మధ్య వివాదం పరిష్కారానికి ఉన్నతస్థాయి కమిటీ వేయాలని, పారిశ్రామిక వివాదాల చట్టం 1947లో లేదని, అందువల్ల ఈ కమిటీకి ప్రభుత్వం అంగీకరించడంలేదని అడ్వకేట్‌ జనరల్‌ బి.ఎస్‌.ప్రసాద్‌ ప్రధాన న్యాయమూర్తి జస్టిస్‌ రాఘవేంద్రసింగ్‌ చౌహాన్‌, జస్టిస్‌ ఎ.అభిషేక్‌రెడ్డితో కూడిన డివిజన్‌ బెంచ్‌కు బుధవారం నివేదించారు. ఈ చట్టంలోని సెక్షన్‌ 10 ప్రకారం దీనిపై లేబర్‌ కమిషనర్‌ నిర్ణయం తీసుకోవచ్చంటూ సమ్మెపై దాఖలైన వ్యాజ్యాల్లో కోర్టు విచారణ జరుపుతున్నందున ఎలాంటి నిర్ణయం తీసుకోలేదన్నారు. దీనిపై చీఫ్‌ సెక్రటరీ ఎస్‌.కె.జోషి ఇచ్చిన అఫిడవిట్‌ను కోర్టు పరిశీలనకు అందజేశారు. సమ్మె విరమింపజేయాలని, ఆర్‌టిసి రూట్ల ప్రైవేటీకరణ తగదని దాఖలైన వ్యాజ్యాలపై బుధవారం డివిజన్‌ బెంచ్‌ విచారించింది. పిటిషనర్ల తరపు న్యాయవాదుల్లో ఒకరైన ఆర్‌.భాస్కరన్‌ వాదనలు కొనసాగించాలని కోర్టు సూచించింది. శివారావు, శాంతారావు మరికొందరు వర్సెస్‌ కేంద్ర ప్రభుత్వం కేసులో సుప్రీంకోర్టు ఇచ్చిన తీర్పును ఆయన కోర్టు దృష్టికి తెచ్చారు. దీని ప్రకారం సమస్య పరిష్కారానికి ఉన్నతస్థాయి కమిటీ వేసే అధికారాలు ఈ న్యాయస్థానానికి ఉంటాయన్నారు. మహబూబాబాద్‌ జిల్లాలో బుధవారం ఒక ఆర్‌టిసి కార్మికుడు ఆత్మహత్య చేసుకున్నాడని, సమ్మె వల్ల మరణించిన కార్మికుల సంఖ్య 20కి చేరిందని తెలిపారు. సమ్మెపై ముఖాముఖి చర్చలకు కమిటీ వేయాలని కోరారు. కార్మికుల సమ్మె చట్ట విరుద్ధమని ఎజి వాదిస్తూ ఎస్మా కింద చర్యలు తీసుకోవచ్చన్నారు. ఆర్‌టిసిని ఎస్మా కిందకు చేరుస్తూ ప్రభుత్వం ఏమైనా ఉత్తర్వులు జారీ చేసిందా అని బెంచ్‌ ప్రశ్నించింది. దీనిపై జీవో ఉందని ఎజి సమాధానమిచ్చారు. ఆర్‌టిసి సేవలు ‘పబ్లిక్‌ యుటిలిటీ సర్వీసులు’ కిందకు వస్తాయంటూ వాటిని ఉల్లంఘించిన వారిపై ఎస్మా కింద చర్చలు తీసుకోవచ్చన్నారు. కార్మిక సంఘాల తరపు సీనియర్‌ న్యాయవాది డి.ప్రకాష్‌రెడ్డి వాదనలు వినిపిస్తూ ఆర్‌టిసి కార్మికుల సమ్మె ఎస్మా కిందకు రాదనగా ఆ చట్టంలోని పలు సెక్షన్లను ఎజి వివరించారు. ఎపి పునర్విభజన చట్టం 2014లోని సెక్షన్‌ కింద, ఆర్‌టిసి యాక్టు 1950 కింద టిఎస్‌ఆర్‌టిసిని ఏర్పాటు చేశామన్నారు. ఎపి పునర్విభజన చట్టాన్ని పార్లమెంటు ఆమోదించినందుకు ఇదే సుప్రీం యాక్టు అవుతుందన్నారు. ఈ వాదనలను డివిజన్‌ బెంచ్‌ తొలుత తోసిపుచ్చింది. ఆర్‌టిసికి ప్రత్యేక చట్టం ఉంది. ఉమ్మడి రాష్ట్రంలో ఏర్పాటు చేసిన ఎపిఎస్‌ఆర్‌టిసిలో కేంద్ర ప్రభుత్వానికి 33శాతం వాటా ఉందని, టీఎస్‌ ఆర్‌టిసి కేంద్రం గుర్తించడంలేదని గతంలో అసిస్టెంట్‌ సొలిసిటర్‌ జనరల్‌ చెప్పారంది. ఆర్‌టిసిని విభజించాలంటే ఆర్‌టిసి చట్టంలోని సెక్షన్‌ 47 కింద కేంద్రం నుంచి అనుమతి పొందాలని లెొ లిపింది. ఏపీ పునర్విభజన చట్టాన్ని పార్లమెంటు ఉభయ సభలు ఆమోదించాయని, ఈ చట్టం ప్రకారమే ఉమ్మడి రాష్ట్రంలోని సంస్థలను రెండు రాష్ట్రాల మధ్య విభజన చేయవచ్చని ఏజీ పునరుద్ఘాటించారు. సాంకేతికంగా వేరుపడనప్పటికీ చట్ట ప్రకారం రెండు రాష్ట్రాల మధ్య బస్సుల పంపకం జరిగిందంటూ టీఎస్‌ ఆర్టీసి ఏర్పాటుకు కేంద్రం అనుమతి అవసరం లేదన్నారు.ఏజీ వాదనలతో డివిజన్‌ బెంచ్‌ తన అభిప్రాయాన్ని మార్చుకుంది. ఆర్‌టిసి తరపున ఏజీ జె.రామచంద్రరావు వాదిస్తూ 1994లో సిండికేట్‌ బ్యాంక్‌ వర్సెస్‌ అదర్స్‌ కేసులో సుప్రీంకోర్టు తీర్పును పేర్కొన్నారు. ఆర్‌టిసి కార్మికుల సమ్మె చట్ట వ్యతిరేకమా కాదా అని తేల్చే అధికారం లేదని, అది తేల్చాల్సింది కార్మిక న్యాయస్థానమేనని అన్నారు. ఈ సమస్యను కార్మిక న్యాయస్థానానికి పంపితే నిర్ణీత కాలంలో సమస్యకు పరిష్కారం చూపగలదా అని ఏజీని బెంచ్‌ ప్రశ్నించింది. ఇది ముఖ్యమైన సమస్య అయినందున ఆ కోర్టు ఎక్కువ సమయం తీసుకోదన్నారు. దీనిపై వివరణ తీసుకుని తర్వాతి విచారణకు చెప్పాలని ఏజీకి సూచించింది. ఈలోగా కోర్టు సమయం ముగియడంతో వీటిపై విచారణను బెంచ్‌ గురువారానికి వాయిదా వేసింది. అయితే తన సోదరుని కుమార్తె వివాహం ఉన్నందుకున గురువాంనాటి విచారణకు తాను హాజరు కాలేనని, విచారణను ఈనెల 18కి వాయిదా వేయాలని కార్మిక సంఘాల తరపు న్యాయవాది ప్రకాష్‌రెడ్డి కోరగా అందుకు డివిజన్‌ బెంచ్‌ అంగీకరించింది. ఆర్‌టిసి రూట్ల ప్రైవేటీకరణ వ్యాజ్యాలపై గురువారం విచారణ చేపడతామంది.