పరిశీలిస్తున్న సుప్రీంకోర్టు
న్యూఢిల్లీ: దేశంలో సంచలనం సృష్టించిన హైదరాబాద్‌ దిశ హత్య కేసు నిందితుల ఎన్‌కౌంటర్‌ ఘటనపై బుధవారం సుప్రీంకోర్టు విచారణ చేపట్టింది. ఎన్‌కౌంటర్‌పై సుప్రీంకోర్టు మాజీ న్యాయమూర్తితో దర్యాప్తు జరిపే అంశాన్ని పరిశీలిస్తున్నామని సుప్రీంకోర్టు ప్రధాన న్యాయమూర్తి జస్టిస్‌ ఎస్‌ఎ బాబ్డే స్పష్టంచేశారు. ‘విచారణ జరిపేందుకు మేము సుప్రీంకోర్టు మాజీ న్యాయమూర్తిని నియమించాలని ప్రతిపాదిస్తున్నాం’ అని ప్రధాన న్యాయమూర్తి ఎస్‌ఎ బాబ్డే, న్యాయమూర్తులు ఎస్‌ఎ నజీర్‌, సంజీవ్‌ ఖనాలతో కూడిన ధర్మాసనం స్పష్టంచేసింది. తెలంగాణ ప్రభు త్వం తరఫున సీనియర్‌ న్యాయవాది ముకుల్‌ రోహత్గి, న్యాయవాది కృష్ణ కుమార్‌ సింగ్‌ హాజరయ్యారు. వారు కోర్టు ముందు వాదిస్తూ ఎన్‌కౌంటర్ల దర్యాప్తు విషయంలో తాము సుప్రీంకోర్టు ఆదేశాలను పాటించామని, కేసును ఇప్పటికే రాష్ట్ర సిఐడికి అప్పగించామని చెప్పారు. ఎన్‌కౌంటర్‌ విచారణకు నియమించే సుప్రీంకోర్టు మాజీ న్యాయమూర్తి ఢిల్లీలోనే ఉండి కేసును దర్యాప్తు చేసేలా చూస్తామని ప్రధాన న్యాయమూర్తి బాబ్డే తెలిపారు. ఈ మేరకు మాజీ జస్టిస్‌ పి.వి.రెడ్డిని సంప్రదించామని.. కానీ, అందుకు ఆయన నిరాకరించారని చెప్పారు. దర్యాప్తుపై సలహాలు, సూచనలతో రావాలని తెలంగాణ ప్రభుత్వాన్ని ఆదేశించారు. తెలంగాణ హైకోర్టులో కేసు కొనసాగుతున్న విషయాన్ని విచారణ సందర్భంగా జస్టిస్‌ బాబ్డే ప్రస్తావించారు. అనంతరం తదుపరి విచారణ గురువారంకు వాయిదా వేశారు. తెలంగాణ ప్రభుత్వం తరపున న్యాయవాది ముకుల్‌ రోహత్గి వాదిస్తూ.. తమ వాదనలు విన్న తర్వాత ముందుకు వెళ్లాలని ధర్మాసనాన్ని కోరా రు. ప్రత్యేక దర్యాప్తు బృందం (సిట్‌)తో దర్యాప్తు చేయించాలంటూ సుప్రీంకోర్టులో ప్రజాహిత వ్యాజ్యం (పిల్‌) దాఖలైన విషయం తెలిసిందే. ఎన్‌కౌంటర్‌లో పాల్గొన్న పోలీసులపై స్వతంత్ర దర్యాప్తు జరిగేలా చూడాలని కోరుతూ దాఖలు చేసిన వ్యాజ్యాన్ని సత్వర విచారణకు తీసుకోవాలన్న న్యాయవాది జిఎస్‌ మణి, న్యాయవాది ప్రదీప్‌ కుమార్‌ యాదవ్‌ వినతిని సుప్రీంకోర్టు ప్రధాన న్యాయమూర్తి జస్టిస్‌ ఎస్‌ఎ బాబ్డే నేతృత్వంలోని ధర్మాసనం పరిశీలించింది. మరో న్యాయవాది ఎంఎల్‌ శర్మ ఎన్‌కౌంటర్‌లో సంబంధిత పోలీసు అధికారులపై సతంత్ర దర్యాప్తు చేపట్టాలని పిల్‌ దాఖలు చేశారు. సిట్‌ దర్యాప్తును సుప్రీంకోర్టు మాజీ న్యాయమూర్తులు పర్యవేక్షించాలని ఆయన విజ్ఞప్తి చేశారు. సుప్రీంకోర్టు ఇచ్చిన మార్గదర్శకాలను ఉల్లంఘిస్తూ ఈ కేసులో నిందితులను ఉద్దేశపూర్వకంగానే ఎన్‌కౌంటర్‌ చేశారని పిటిషనర్లు సుప్రీంకోర్టులో పిటిషన్లు దాఖలు చేశారు. దీనిపై జస్టిస్‌ బాబ్డే స్పందిస్తూ.. హైదరాబాద్‌ ఎన్‌కౌంటర్‌పై పూర్తి అవగాహనతో ఉన్నామని చెప్పారు. ఈ ఘటనపై జరుగుతున్న అంశాలను ఎప్పటికప్పుడు పరిశీలిస్తున్నామని వ్యాఖ్యానించారు. ఎన్‌కౌంటర్‌ ఘటనపై సుప్రీంకోర్టు విశ్రాంత న్యాయమూర్తితో దర్యాప్తు చేసేందుకు ప్రయత్నాలు చేస్తున్నట్టు తెలిపారు.మాజీ న్యాయమూర్తితో దర్యాప్తు జరిపే అంశం పై మీరేమనుకుంటున్నారో సలహాలు, సూచనలతో రావాలని తెలంగాణ రాష్ట్ర ప్రభుత్వ తరఫు న్యాయవాదికి జస్టిస్‌ బాబ్డే ఆదేశించారు.
ఎన్‌కౌంటర్‌పై మాజీ న్యాయమూర్తితో విచారణ?
RELATED ARTICLES
