కేంద్రప్రభుత్వంపై సిపిఐ జాతీయ కార్యదర్శి నారాయణ ధ్వజం
మాజీ సిఎం కెసిఆర్‌కు ‘డాటర్‌ స్ట్రోక్‌’ అని ఎద్దేవా
పార్టీ రెండు రోజుల రాష్ట్ర సమితి సమావేశాలు ప్రారంభం
ప్రజాపక్షం/హైదరాబాద్‌ వచ్చే లోక్‌సభ ఎన్నికలను దృష్టిలో పెట్టుకుని ‘అయోధ్య’ రామాలయ అంశాన్ని ప్రధాని మోడీ ఆయుధంగా ఉపయోగించుకుంటున్నారని సిపిఐ జాతీయ కార్యదర్శి డాక్టర్‌ కె.నారాయణ విమర్శించారు. సెంటిమెంట్‌ వాతావరణాన్ని సృష్టించి, రామాలయం ప్రారంభోత్సవాన్ని ఓట్లు దండుకునే కార్యక్రమంగా మారుస్తున్నారని ఆగ్రహం వ్యక్తం చేశారు. లోక్‌సభ ఎన్నికల నేపథ్యంలో దేశ వ్యాప్తంగా మార్పు లు చోటు చేసుకోనున్నాయన్నారు. సిపిఐ శ్రేణు లు ఎన్నికలకు సమాయత్తం కావాలని పిలుపునిచ్చారు. అందరికీ సన్‌ స్ట్రోక్‌ వస్తే, మాజీ సిఎం కెసిఆర్‌కు ‘డాటర్‌ స్ట్రోక్‌’ వచ్చిందని, కుమార్తె కోసం ఆయన బిజెపితో రాజీపడ్డారని విమర్శించారు. హైదరాబాద్‌ మగ్ధూంభవన్‌లో రెండు రోజుల పాటు జరిగే సిపిఐ రాష్ట్ర సమితి సమావేశాలు బుధవారం ప్రారంభమయ్యాయి. సిపిఐ రాష్ట్ర కార్యవర్గ సభ్యులు ఎస్‌.కె.సాబీర్‌పాషా అధ్యక్షతన ప్రారంభమైన సమావేశంలో నారాయణతో పాటు సిపిఐ జాతీయ కార్యదర్శి సయ్యద్‌ అజీజ్‌పాషా, రాష్ట్ర కార్యదర్శి కూనంనేని సాంబశివరావు, జాతీయ కార్యవర్గ సభ్యులు చాడ వెంకట్‌రెడ్డి హాజరయ్యారు. సిపిఐ రాష్ట్ర కార్యదర్శివర్గ సభ్యులు ఎం. బాలనర్సింహ సంతాప తీర్మానాన్ని ప్రవేశపెట్టగా సమావేశం ఆమోదించి అమరులకు నివాళులు అర్పించింది. అనంతరం నారాయణ జాతీయ రాజకీయాలపై నివేదిక ఇచ్చారు. కేంద్రంలోని బిజెపి ప్రభు త్వం ప్రమాదకారిగా మారిందని, సంస్థాగత వ్యవస్థలను నియంత్రిస్తోందని విమర్శించారు. దేశ వ్యాప్తం గా కేంద్రంలోని బిజెపి పాలన పట్ల అన్ని వర్గాలూ వ్యతిరేకంగా ఉన్నాయని, ‘ఇండియా’ కూటమికి అనుకూల వాతావరణం ఉన్నదని, ఈ విషయాన్ని బిజెపి, ఆర్‌ఎస్‌ఎస్‌ మేథావులు కూడా గుర్తించారని తెలిపారు. అందుకే ‘ఇండియా’ అనే పదం వినిపించకుండా ఉండేలా రాజ్యాంగంలోని ‘ఇండియా’ పదానికి బదులుగా ‘భారత్‌’ పేరును చేర్చారని, అలాగే హైస్కూల్‌ సిలబస్‌ను కూడా మారుస్తున్నారని, ఇండియా అని ఉన్న పదాల వద్ద భారత్‌గా మారుస్తున్నారని వివరించారు. ఎన్నికల కమిషన్‌పై రాజకీయ ఓత్తిడి మరింత పెరిగిందని విమర్శించారు. అద్వానీ గ్రాఫ్‌ పెరుగుతుందనే ఉద్దేశంతోనే ఆయనను అయోధ్య ప్రారంభోత్సవానికి రానివ్వడం లేదన్నారు. ఉద్దేశపూర్వకంగా, నాటకీయ పరిణామాలతోనే పార్లమెంట్‌ దాడి జరిగిందని విమర్శించారు. దేశానికి గుండెకాయ లాంటి పార్లమెంట్‌పైనే దాడి జరిగితే ఇక దేశ పరిస్థితి ఏమిటని కేంద్రంలోని బిజెపి ప్రభుత్వాన్ని నారాయణ నిలదీశారు. ఒక వేళ నిజమైన బాంబు తీసుకొచ్చి, ప్రధాని మీద వేస్తే పరిస్థితి ఏమిటని ప్రశ్నించారు. దీనిపైన ప్రధాని ఒక ప్రకటన కూడా చేయలేకపోయారని విమర్శించారు. వైఎస్‌ షర్మిల ఎపిలోని కాంగ్రెస్‌ పార్టీకి నాయకత్వం వహించే అవకాశాలు ఉన్నాయని, అదే జరిగితే వైసిపి నుండి కొందరు కాంగ్రెస్‌ పార్టీలో చేరే అవకాశాలు ఉంటాయని నారాయణ తెలిపారు. ఎపి సిఎం జగన్‌, టిడిపి అధినేత చంద్రబాబు, జనసేన అధ్యక్షుడు పవన్‌ కల్యాన్‌ ముగ్గురూ భయబ్రాంతులకు గురై మోడీతోనే కలిసేందుకు ప్రయత్నిస్తున్నారని చెప్పారు. బిజెపి కన్ను తెరిస్తే ఎక్కడ జైలులో ఉండాల్సి వస్తుందోనని అక్కడ సిఎం జగన్‌, ప్రతిపక్షనేత చంద్రబాబు భయపడుతున్నారని విమర్శించారు. ఎపిలో కూడా సిఎం జగన్‌ పట్ల వ్యతిరేకత ఉన్నదన్నారు.
ఫిబ్రవరిలో హైదరాబాద్‌లో సిపిఐ జాతీయ సమితి సమావేశాలు
సిపిఐ జాతీయ సమితి సమావేశాలు హైదరాబాద్‌లో ఫిబ్రవరి 2,3 తేదీలలో జరగనున్నట్టు నారాయణ తెలిపారు. రాష్ట్రంలోని కొత్తగూడెం ఎంఎల్‌ఎ స్థానాన్ని సిపిఐ గెలుచుకోవడం పట్ల వివిధ రాష్ట్రా ల నుండి తనకు ఫోన్లు చేసి అభినంధిస్తున్నారని, వారు ఎంతో సంతోషపడుతున్నారన్నారు. ప్రజా సమస్యల ప్రస్తావన అంశంలో శాసనసభలో కమ్యూనిస్టు సభ్యుల గొంతు మిగతా సభ్యుల కంటే ఎంత భిన్నంగా ఉంటుందో ఇప్పటికే ప్రజలకు అర్థమైందన్నారు. తెలంగాణ రాష్ట్రంలో ఇక్కడి కాంగ్రెస్‌ తరహా ఐక్యంగా ముందుకెళ్తే రాజస్తాన్‌, చత్తీస్‌గఢ్‌లలో కూడా కాంగ్రెస్‌ అధికారంలోకి వచ్చేదని గుర్తు చేశారు. ప్రజలు కాంగ్రెస్‌ను ఓడించలేదని, ఆ రాష్ట్రాలలో కాంగ్రెస్‌ పార్టీ నేతల అహంభావంతోనే కాంగ్రెస్‌ ఓడిపోయి బిజెపి గెలిచిందని తెలిపారు.
మోడీకి ఇవిఎంపైనే నమ్మకం: అజీజ్‌ పాషా
సిపిఐ జాతీయ కార్యదర్శి సయ్యద్‌ అజీజ్‌పాషా మాట్లాడుతూ ప్రధాని మోడీకి ప్రజల కంటే ఇవిఎం యంత్రాలపైనే నమ్మకం ఎక్కువగా ఉన్నదని, అందుకే మరోసారి తామే అధికారంలోకి వస్తామని ధీమాగా ఉన్నారన్నారు. పారదర్శకంగా వ్యవహారించాల్సిన ఎన్నికల సంఘం కేంద్రంలోని బిజెపి ప్రభుత్వానికి తొత్తుగా మారిందని విమర్శించారు. కేంద్ర ప్రభుత్వం ఇటీవల ప్రవేశపెట్టిన మూడు చట్టాలు అధ్వాన్నంగా మారాయని దుయ్యబట్టారు. లాటిన్‌ అమెరికాలో కూడా లెఫ్ట్‌ సభ్యులే గెలుస్తున్నారన్నారు. కాగా సిపిఐ రాష్ట్ర కార్యదర్శి కూనంనేని సాంబశివరావు ఈ సమావేశంలో కార్యదర్శి నివేదికను ప్రవేశపెట్టారు.
ఎన్నికల కమిషన్‌పై రాజకీయ ఒత్తిడి
RELATED ARTICLES
