వచ్చే యాసంగిలో తెలంగాణ రాష్ర్టంలో కేంద్రం ఎంత వరి ధాన్యం కొంటుందో ముందుగానే నిర్ధారించాలి. ఎఫ్‌సిఐ ఏడాదికి సరిపడా ధాన్యం సేకరించే లక్ష్యాలను ఒకేసారి నిర్ధారించడం లేదు. 2021 వానాకాలం సీజన్‌లో 55.75 లక్షల మెట్రిక్‌ టన్నుల వరిధాన్యం దిగుబడి అయితే, కేవలం 32.66 లక్షల మెట్రిక్‌ టన్నులను మాత్రమే ఎఫ్‌సిఐ సేకరించింది. కష్టజీవి అయిన తెలంగాణ రైతు, రాష్ర్ట ప్రభుత్వ ప్రోత్సాహకాలను అందిపుచ్చుకుం టూ గుణాత్మకంగా దిగుబడిని సాధిస్తున్నాడు. తద్వారా దేశ ప్రగతికి దోహదం చేస్తున్నాడు. దేశ ప్రజలకు ఆహార భద్రతను కల్పించే తప్పనిసరి బాధ్యతలను నెరవేర్చాల్సిన భారత ఆహార సంస్థ (ఎఫ్‌సిఐ) అసంబద్ధ విధానాల ను అవలంబిస్తోంది. రైతులను, రాష్ర్ట ప్రభు త్వాలను అయోమయానికి గురి చేస్తున్నది.
వానాకాలంలో పండిన 90 వరిని కొనాలి
ప్రధాని నరేంద్రమోడీకి సిఎం కెసిఆర్‌ లేఖ
ధాన్యం సేకరణ నిబంధన మార్చాలని వినతి
ప్రజాపక్షం / హైదరాబాద్‌ పంజాబ్‌ రాష్ర్టంలో మాదిరిగా తెలంగాణలో కూడా ప్రస్తుత (2021 సంవత్సరం) వానాకాలంలో పండిన పంటలో 90 శాతం వరి ధాన్యాన్ని సేకరించాలని, ఇందుకు 40 లక్షల మెట్రిక్‌ టన్నుల ధాన్యం సేకరిస్తామనే నిబంధనను మార్చి, మరింత పెంచాలని ప్ర ధానికి రాష్ట్ర ముఖ్యమంత్రి కల్వకుంట్ల చంద్రశేఖర్‌రావు విజ్ఞప్తి చేశారు. వచ్చే యాసంగిలో తెలంగాణ రాష్ర్టంలో కేంద్రం ఎంత వరిధాన్యం కొంటుందో ముందుగానే నిర్ధారించాలన్నారు. గత సీజన్‌ 2020 ఎండాకాలంలో సేకరించకుండా మిగిలిన 5 లక్షల మెట్రిక్‌ టన్నుల వరి ధాన్యాన్ని తక్షణమే సేకరించాలని కోరారు. ఈ మేరకు భారత ఆహార సంస్థ (ఎఫ్‌సిఐ)కి భారత ప్రభుత్వం ఆదేశాలు ఇవ్వాలని విజ్ఞప్తి చేస్తూ ప్రధాన మంత్రి నరేంద్ర మోడీకి సిఎం కెసిఆర్‌ బుధవారం లేఖ రాశారు.
అయోమయానికి గురి చేస్తున్న ఎఫ్‌సిఐ
ఎఫ్‌సిఐ అసంబద్ధ విధానాలను అవలంబి స్తూ, అటు రైతులను… ఇటు రాష్ర్ట ప్రభుత్వాలను అయోమయానికి గురి చేస్తున్నదని కెసిఆర్‌ పేర్కొన్నారు. ఎఫ్‌సిఐ ఏడాదికి సరిపడా ధాన్యంసేకరించే లక్ష్యాలను ఒకేసారి నిర్ధారించడం లేదని, ప్రతి ఏటా ధాన్యం దిగుబడి పెరుగుతున్నదని తెలిసినా ధాన్యాన్ని వేగవంతంగా సేకరించడం లేదని అసంతృప్తి వ్యక్తం చేశారు. ఈ అయోమయ విధానాల కారణంగా సరైన పంటల విధానాన్ని రైతులకు వివరించేందుకు రాష్ట్రాలకు ప్రతిబంధకంగా మారిందని ప్రధానికి రాసిన లేఖలో తెలియజేశారు. 2021 వానాకాలం సీజన్‌లో తెలంగాణలో 55.75 లక్షల మెట్రిక్‌ టన్నుల వరిధాన్యం దిగుబడి అయిందని, కానీ అందులో కేవలం 32.66 లక్షల మెట్రిక్‌ టన్నులను మాత్రమే ఎఫ్‌సిఐ సేకరించిందని, ఇది పండిన పంటలో కేవలం 59 శాతం మాత్రమేనని కెసిఆర్‌ పేర్కొన్నారు. 2019 వానాకాలంలో సేకరించిన ధాన్యం కంటే 78 శాతం తక్కువ అని అన్నారు. ధాన్యం సేకరణలో ఇటువంటి విపరీత తేడాలుంటే రాష్ర్టంలో హేతుబద్ధమైన పంట విధానాలను అమలు చేయడానికి ఇబ్బందిగా మారుతుందన్నారు. అయోమయ పరిస్థితులను తొలగించి ధాన్యం సేకరణలో నిర్ధిష్టమైన లక్ష్యాన్ని నిర్ధారించడం కోసం కేంద్ర ఆహార పౌర సరఫరాల శాఖమంత్రి పియూష్‌ గోయెల్‌ను సెప్టెంబర్‌ 25, 26 తేదీలలో తానే స్వయంగా వెళ్ళి కలిసినట్లు ప్రధానికి రాసిన లేఖలో కెసిఆర్‌ వెల్లడించారు. వార్షిక ధాన్య సేకరణ లక్ష్యాన్ని తక్షణమే నిర్ధారించాలని విజ్జప్తి చేసి 50 రోజులు దాటిపోయినా కేంద్రమంత్రి నుండి ఎటువంటి సమాచారం లేదని, ఇంతవరకు ఎలాంటి విధాన నిర్ణయాన్ని తీసుకోలేదన్నారు. తెలంగాణ రాష్ర్ట ఏర్పాటుకు ముందు, ఎక్కడ చూసినా తెలంగాణలో కరువు కాటకమే తాండవించేదని, నేడు రాష్ర్టంలో గణనీయంగా పెరిగిన సాగునీటి లభ్యత ద్వారా, తెలంగాణ తన అవసరాలను దాటుకుని ఆహార ధాన్యం దిగుబడిలో మిగులు రాష్ర్టంగా నిలిచిందని తెలిపారు. తెలంగాణ రైతు నేడు దేశానికే అన్నపూర్ణగా ఎదిగాడన్నారు. వినూత్న విధానాలతో తెలంగాణ ప్రభుత్వం అమలు పరుస్తున్న వరుస పథకాల మూలంగానే వ్యవసాయ రంగం దృఢంగా తయారై ఇంతటి అభివృద్ధి సాధ్యమైందని కెసిఆర్‌ తెలిపారు. 24 గంటలపాటు నాణ్యమైన విద్యుత్తును పూర్తి ఉచితంగా అందిస్తూ, ఏడాదికి ఎకరానికి రూ.10 వేలు పంటపెట్టుబడి ప్రోత్సాహకాన్ని తెలంగాణ రైతుకు రాష్ర్ట ప్రభుత్వం అందిస్తున్నదన్నారు. కష్టజీవి అయిన తెలంగాణ రైతు, రాష్ర్ట ప్రభుత్వం అందిస్తున్న ప్రోత్సాహకాలను అందిపుచ్చుకుంటూ గుణాత్మకంగా దిగుబడిని సాధిస్తున్నాడని, తద్వారా దేశ ప్రగతికి దోహదం చేస్తున్నాడని లేఖలో వివరించారు. సురక్షిత నిల్వలను కొనసాగిస్తూ, ప్రజా పంపిణీ వ్యవస్థ ద్వారా బియ్యం, గోధుమలు వంటి ఆహార ధాన్యాలను పంపిణీ చేస్తూ, దేశ ప్రజలకు ఆహార భద్రతను కల్పించే తప్పనిసరి బాధ్యతలను నెరవేర్చాల్సిన భారత ఆహార సంస్థ (ఎఫ్‌సిఐ) అసంబద్ధ విధానాలను అవలంబిస్తూ, అటు రైతులను…ఇటు రాష్ర్ట ప్రభుత్వాలను అయోమయానికి గురి చేస్తున్నదని కెసిఆర్‌ ఆవేదన వ్యక్తం చేశారు.
