ఆర్‌టిపిసిఆర్‌ రోజుకు

ప్రజాపక్షం/హైదరాబాద్‌: వ్యాప్తంగా కరోనా వైరస్‌ కేసులు అనూహ్యంగా పెరుగుతున్న కారణంగా రాష్ట్ర ప్రభుత్వం మరింత అప్రమత్తంగా వ్యవహరించాలని కేంద్ర, రాష్ట్ర ప్రభుత్వాలు కరోనా నియంత్రణకు జారీ చేసిన మార్గదర్శకాలను కచ్చితంగా అమలు జరిగేలా చూడాలని హైకోర్టు ఆదేశించింది. గతంలో ఆదేశించిన మేరకు ఆర్‌టిపిసిఆర్‌ పరీక్షల సంఖ్యను బాగా పెంచాలని, రోజుకు లక్ష చొప్పున పరీక్షలు నిర్వహించాలని ఉత్తర్వులు జారీ చేసింది. ఆర్‌టిపిసిఆర్‌, ర్యాపిడ్‌ యాంటీజన్‌ పరీక్షలకు సంబంధించి వేర్వేరుగా నివేదిక అందజేయాలని ఉత్తర్వులు జారీ చేయాలని ప్రధాన న్యాయమూర్తి జస్టిస్‌ సతీష్‌ చంద్ర శర్మ, జస్టిస్‌ అభినంద్‌కుమార్‌ షావలిలతో కూడిన ధర్మాసనం మధ్యంతర ఉత్తర్వులు జారీచేసింది. ఎక్కడపడితే అక్కడ ప్రజలు గుమిగూడకుండా చూడాలని, భౌతికదూరం పాటించేలా జాగ్రత్తలు తీసుకోవాలని, విధిగా మాస్క్‌లు ధరించేలా చేయాలని ఆదేశించింది. తప్పనిసరిగా ప్రభుత్వాలు జారీ చేసిన మార్గదర్శకాలు అమలుకు చర్యలు తీసుకోవాలని ఆదేశించింది. నియంత్రణకు ఉత్తర్వులు కోరుతూ దాఖలైన పలు ప్రజాహిత వ్యాజ్యాలను హైకోర్టు సోమవారం మరోసారి
విచారించింది. రోజుకు తప్పనిసరిగా లక్షల కరోనా నిర్ధారణ పరీక్షలు చేయాలని గతంలో ధర్మాసనం ఆదేశించిందని, అయితే రోజుకు 50 వేలకు మించి పరీక్షలు చేయడం లేదని, ఎప్పుడైనా ఒకోసారి మాత్రమే లక్ష టెస్ట్‌లు చేస్తున్నారని పిటిషనర్‌ తరఫున సీనియర్‌ న్యాయవాది ఎల్‌.రవిచందర్‌, న్యాయవాది చిక్కుడు ప్రభాకర్‌లు వాదించారు. ఆర్‌టిపిసిఆర్‌ పరీక్షల సంఖ్యను పెంచాలని హైకోర్టు గతంలో జారీ చేసి ఆదేశాలను అమలు కావడం లేదన్నారు. కరోనా కేసుల ఆధారంగా కంటైన్‌మెంట్‌, మైక్రోకంటైన్‌మెంట్‌ జోన్లను ఏర్పాటు చేసి కరోనా వ్యాప్తి చెందకుండా చర్యలు కూడా అంతమాత్రంగానే ఉన్నాయని న్యాయవాది చిక్కుడు ప్రభాకర్‌ ఆరోపించారు. సరైన నియంత్రణ చర్యలు లేక అనేక మంది న్యాయవాదులు, న్యాయాధికారులు, కోర్టు సిబ్బంది కరోనాబారిన పడ్డారని ఆందోళన వ్యక్తం చేశారు. కరోనా నియంత్రణపై ముఖ్యమంత్రి నేతృత్వంలో మంత్రి మండలి సమావేశమై చర్చించనుందని ఎజి బీఎస్‌ ప్రసాద్‌ చెప్పారు. రోజుకు ఆర్‌టిపిసిఆర్‌, ర్యాపిడ్‌ యాంటీజన్‌ పరీక్షలను కలిపి లక్ష వరకు చేయాలని గతంలో ధర్మాసనం ఆదేశించిందన్నారు. దీనిపై హైకోర్టు స్పందిస్తూ, కరోనా కేసులు పెరుగుతున్నందున హైకోర్టు, రాష్ట్రంలోని ఇతర కోర్టుల్లో ఫిబ్రవరి 4 వరకు ఆన్‌లైన్‌ విధానంలో కేసుల విచారణ విధానాన్ని అమలు చేయాలని నిర్ణయం తీసుకున్నట్లు తెలిపారు. కరోనా నియంత్రణ చర్యలపై నివేదిక అందజేయాలని వైద్య, ఆరోగ్య శాఖను ఆదేశించింది. ఈనెల 25కి వాయిదా వేసింది.
నేటి నుంచి కోర్టు కేసులు ఆన్‌లైన్‌లో విచారణ రాష్ట్ర వ్యాప్తంగా కరోనా కేసులు పెరుగుతున్న కారణంగా హైకోర్టుతోపాటు రాష్ట్ర వ్యాప్తంగా అన్ని కోర్టుల్లో ప్రత్యక్ష విచారణను నిలిపివేస్తూ హైకోర్టు సోమవారం ఉత్తర్వులు జారీ చేసింది. ఫిబ్రవరి 4వ తేదీ వరకు ఆన్‌లైన్‌లో కేసుల విచారణ జరుగుతాయని రిజిస్ట్రార్‌ జనరల్‌ డాక్టర్‌ డి.నాగార్జున పేరిట నోటిఫికేషన్లు జారీ అయ్యాయి. మంగళవారం నుంచి ఫిబ్రవరి 4 వరకు ఆన్‌లైన్‌లో కేసులను విచారణ జరుగుతుందన్నారు. జిల్లాల్లోని కోర్టుల్లో ఉదయం 10.30 గంటల నుంచి సాయంత్రం 5 గంటల వరకు ఆన్‌లైన్‌లో కేసుల విచారణ జరుగుతాయని తెలిపారు. కరోనా నియంత్రణకు కేంద్ర, రాష్ట్ర ప్రభుత్వాల మార్గదర్శకాలను విధిగా అమలు చేయాలన్నారు. , 2016 ఏడాదికి ముందున్న కేసుల విచారణకు ప్రాధాన్యత ఇవ్వాలన్నారు.