జాతీయ, అంతర్జాతీయ క్రీడల నిర్వహణకు అవకాశం ఇవ్వండి
తెలంగాణలో స్పోర్ట్‌ యూనివర్సిటీకి ఆర్థిక సహాయం అందజేయండి
కేంద్ర క్రీడా శాఖ మంత్రి మాండవీయకు ముఖ్యమంత్రి రేవంత్‌ రెడ్డి వినతి
ప్రజాపక్షం/హైదరాబాద్‌
జాతీయ.. అంతర్జాతీయ క్రీడల నిర్వహణకు తెలంగాణకు అవకాశం ఇవ్వాలని కేంద్ర క్రీడలు, యువజన వ్యవహారాల శాఖ మంత్రి మన్‌సుఖ్‌ ఎల్‌ మాండవీయకు ముఖ్యమంత్రి ఎ.రేవంత్‌రెడ్డి విజ్ఞప్తి చేశారు. ఢిల్లీలో కేంద్ర మంత్రి మాండవీయను శుక్రవారం ముఖ్యమంత్రి రేవంత్‌ రెడ్డి, ఉప ముఖ్యమంత్రి భట్టి విక్రమార్క, రాష్ట్ర పర్యాటక, ఎక్సైజ్‌ శాఖ మంత్రి జూపల్లి కృష్ణారావు కలిశారు. జాతీయ, అంతర్జాతీయ క్రీడల నిర్వహణకు అవసరమైన అన్ని మౌలిక వసతులు తెలంగాణలో ఉన్నాయని, భవిష్యత్తులో నిర్వహించనున్న ఒలింపిక్స్‌తో పాటు ఇతర అంతర్జాతీయ, జాతీయ క్రీడలు నిర్వహించే అవకాశాన్ని తమ రాష్ట్రానికి ఇవ్వాలని ఈ సందర్భంగా కేంద్ర మంత్రికి సిఎం రేవంత్‌రెడ్డి విజ్ఞప్తి చేశారు. క్రీడలకు సంబంధించి తమకున్న లక్ష్యాలను, ఆకాంక్షలు, తెలంగాణకు ఉన్న ఘనతను కేంద్ర మంత్రికి సిఎం వివరించారు. ఒలింపిక్స్‌తో పాటు పలు అంతర్జాతీయ క్రీడల్లో తెలంగాణ క్రీడాకారులు పతకాలు సాధించిన విషయాన్ని ఈ సందర్భంగా సిఎం రేవంత్‌రెడ్డి కేంద్ర మంత్రి మాండవీయకు గుర్తు చేశారు. అంతర్జాతీయ వేదికలపై క్రీడాకారులు రాణించడానికి అవసరమైన అన్ని వసతుల కల్పనకు తమ ప్రభుత్వం అత్యంత ప్రాధాన్యతను ఇస్తోందని కేంద్ర మంత్రికి వివరించారు.హైదరాబాద్‌లోని గచ్చిబౌలి స్పోర్ట్‌కాంప్లెక్స్‌, సరూర్‌ నగర్‌ స్టేడియం, ఎల్బీ స్టేడియం, కేవీబీఆర్‌ ఇండోర్‌ స్టేడియం, ఓయూ క్యాంపస్‌, జింఖానా గ్రౌండ్‌, హుస్సేన్‌ సాగర్‌ తదితరాల్లో అంతర్జాతీయ ప్రమాణాలతో కూడిన ఈత కొలనులు, మల్టీపర్పస్‌ ఇండోర్‌ స్టేడియంలు, సింథటిక్‌ అథ్లెటిక్‌ ట్రాక్స్‌, షూటింగ్‌ రేంజ్‌, ఫుట్‌బాల్‌ గ్రౌండ్స్‌, స్కేటింగ్‌ ట్రాక్స్‌, వాటర్‌ స్పోర్ట్‌ తదితర క్రీడలకు అవసరమైన అన్ని వసతులు ఉన్నాయని తెలిపారు. రాష్ట్ర రాజధాని హైదరాబాద్‌ లో వివిధ కేటగిరిల ఫైవ్‌ స్టార్‌ హోటళ్లు ఉన్నాయని, విమాన, రైలు సర్వీసులతో అనుసంధానమై ఉందని సిఎం వివరించారు. 2002లో నేషనల్‌ గేమ్స్‌, 2003లో ఆఫ్రో-ఏషియన్‌ గేమ్స్‌, 2007లో ప్రపంచ మిలటరీ గేమ్స్‌ హైదరాబాద్లో నిర్వహించిన విషయాన్ని సైతం కేంద్ర మంత్రి మాండవీయకు ముఖ్యమంత్రి గుర్తు చేశారు. వీటన్నింటని పరిగణనలోకి తీసుకొని భవిష్యత్లో ఒలింపిక్స్‌, ఆసియన్‌ గేమ్స్‌, కామన్వెల్త్‌ గేమ్స్‌తో పాటు 2025, జనవరిలో నిర్వహించే ఖేలో ఇండియా యూత్‌ గేమ్స్‌ కు హైదరాబాదుకు అవకాశం ఇవ్వాలని కేంద్ర మంత్రి మాండవీయకు ముఖ్యమంత్రి రేవంత్‌ రెడ్డి విజ్ఞప్తి చేశారు. అదేవిధంగా తెలంగాణ యువతలోని క్రీడా నైపుణ్యాలను వెలికితీసేందుకు స్పోర్ట్‌ యూనివర్సిటీ ఏర్పాటు చేస్తున్నామని, ఈ విశ్వవిద్యాలయంలో అన్ని రకాల క్రీడలకు సంబంధించిన శిక్షణ, పరిశోధనలకు ప్రాధాన్యం ఇవ్వనున్నట్లు కేంద్ర మంత్రి దృష్టికి ముఖ్యమంత్రి తీసుకెళ్లారు. ఈ నేపథ్యంలో స్పోరట్స్‌ యూనివర్సిటీకి అవసరమైన ఆర్థిక సహాయం అందజేయాలని కేంద్ర మంత్రి మాండవీయకు ముఖ్యమంత్రి రేవంత్‌ రెడ్డి విజ్ఞప్తి చేశారు. అదేవిధంగా రాష్ట్రంలో క్రీడా మౌలిక వసతుల అభివృద్ధికి ఖేలో ఇండియా పథకం కింద నిధులు విడుదలను పెంచాలని సిఎంకోరారు. హైదరాబాద్‌ గచ్చిబౌలిలోని జీఎంసీ బాలయోగి స్టేడియం, సెంట్రల్‌ యూనివర్సిటీలోని షూటింగ్‌ రేంజ్‌, ఎల్‌ బీ స్టేడియం, హకీంపేటలోని స్పోర్ట్‌ స్కూల్‌, సరూర్‌ నగర్‌ ఇండోర్‌ స్టేడియంలలో మౌలిక వసతుల అభివృద్ధికి తాము ఇప్పటికే పంపించిన డీపీఆర్లను ఆమోదించాలని కేంద్ర మంత్రికి ముఖ్యమంత్రి విజ్ఞప్తి చేశారు.
