అర్హులైన పేదలందరికీ ఇళ్లు లేదా ఇళ్ల స్థలాలు

కోటి కుటుంబాలకు లబ్ధి :
దారిద్య్ర రేఖకు దిగువన ఉన్నవారికి ఇళ్ల పట్టాలు మంజూరు చేసేందుకు చర్యలు తీసుకోవాలని అధికారులకు ఆదేశం
ప్రజాపక్షం / హైదరాబాద్‌ రాష్ర్టంలోని అర్హులైన పేదలందరికీ ఇళ్లు లేదా ఇళ్ల స్థలాలు ఇవ్వడానికి ప్రభుత్వం కట్టుబడి ఉందని, దీనివల్ల కోటి కుటుంబాలకు లబ్ధి చేకూరుతుందని మున్సిపల్‌ శాఖ మంత్రి కెటి.రామారావు అన్నారు. దారిద్య్ర రేఖకు దిగువన ఉన్నవారికి ఇళ్ల పట్టాలు మంజూరు చేసేందుకు చర్యలు తీసుకోవాలని అధికారులను ఆదేశించారు. ఇళ్ల స్థలాలపై ఏర్పాటైన క్యాబినెట్‌ సబ్‌ కమిటీ బిఆర్‌కె భవన్‌లో మంత్రి కెటి.రామారావు అధ్యక్షతన సోమవారం సమావేశమైంది. రాష్ర్టంలోని అర్హులై న లబ్ధిదారులందరికీ ఇళ్ల స్థలాలు కేటాయింపు, జిఒ 58,59, సాదాబైనామా, నోటరీ పత్రాలు, ఎండోమెంట్‌, వక్ఫ్‌ భూములు తదితరాల అమలుకు సంబంధించిన అంశాలపై సమావేశంలో చర్చించారు. రాష్ర్ట ఆర్థిక శాఖ మంత్రి హరీశ్‌ రా వు, పశుసంవర్ధక శాఖ మంత్రి తలసాని శ్రీనివాస్‌ యాదవ్‌, పంచాయతీరాజ్‌ శాఖ మంత్రి ఎర్రబెల్లి దయాకర్‌ రావు, విద్యాశాఖ మంత్రి సబితా ఇం ద్రారెడ్డి, కార్మికశాఖ మంత్రి సిహెచ్‌ మల్లారెడ్డి, రవాణాశాఖ మంత్రి పువ్వాడ అజయ్‌ కుమార్‌, ఎక్సైజ్‌ మంత్రి శ్రీనివాస్‌ గౌడ్‌, ప్రభుత్వ ప్రధాన కార్యదర్శి శాంతికుమారి, ఇరిగేషన్‌ శాఖ ప్రత్యేక ప్రధాన కార్యదర్శి రజత్‌ కుమార్‌, ఆర్థిక శాఖ ప్రత్యేక ప్రధాన కార్యదర్శి కె. రామకృష్ణారావు, మున్సిపల్‌ శాఖ ప్రత్యేక ప్రధాన కార్యదర్శి అర్వింద్‌ కుమార్‌ హాజరయ్యారు. మంత్రి కెటిఆర్‌ సమావేశంలో మాట్లాడుతూ 2014 సంవత్సరంలో 1.25 లక్షల మంది లబ్ధిదారులకు పట్టాలు పంపిణీ చేశామని తెలిపారు. జిఒ 58 కింద 20,685 ఇళ్లకు సంబంధించి వెరిఫికేషన్‌ ప్రక్రియ పూర్తయిందని, ఇంటి స్థలాల పట్టాల జారీని వేగవంతం చేయాలని సబ్‌ కమిటీ అధికారులను ఆదేశించింది. నోటరీ చేయబడిన పత్రాల గురించి ప్రస్తావిస్తూ, పట్టణ ప్రాంతాల్లో ఎక్కువగా ఉన్న కేసుల ప్రక్రియను, సమయానుకూల కార్యాచరణ ప్రణాళికను ఖరారు చేయాలని క్యాబినెట్‌ సబ్‌ కమిటీ అధికారులను ఆదేశించింది.“పేదలకు అనుకూలమైన” విధానాన్ని తీసుకోవాలని , అర్హత ఉన్న అన్ని కేసులను త్వరగా పూర్తి చేయాలని కమిటీ సూచించింది.