అక్రమ పోతిరెడ్డి‘పాడు’ను గుర్తించడం లేదు

స్పష్టం చేసిన ఉన్నతస్థాయి సమావేశం
9న కెఆర్‌ఎంబి సమావేశాన్ని రద్దు చేసి 20వ తేదీన పూర్తిస్థాయిలో ఏర్పాటు చేయాలి
ప్రజాపక్షం / హైదరాబాద్‌ ఒక్క చుక్క కూడా నీటి కేటాయింపులు లేకుండా, పర్యావరణ అనుమతులు లేకుండా, జాతీయ గ్రీన్‌ ట్రిబ్యునల్‌లో స్టే వున్నాకూడా కృష్ణా నదిపై ఆంధ్రప్రదేశ్‌ రాష్ట్రం నిర్మిస్తున్న చట్టవ్యతిరేక అక్ర మ పోతిరెడ్డిపాడు ప్రాజెక్టును తెలంగాణ ప్రభు త్వం గుర్తించడంలేదని ముఖ్యమంత్రి కె.చంద్ర శేఖర్‌రావు అధ్యక్షతన జరిగిన ఉన్నతస్థాయి సమావేశం తీర్మానించింది. ఈ నెల 9న కృష్ణా నదీ యాజమాన్య బోర్డు (కెఆర్‌ఎంబి) నిర్వహించబో యే త్రిసభ్య సమావేశాన్ని రద్దు చేయాలని, 20వ తేదీ తర్వాత పూర్తిస్తాయి బోర్డు సమావేశా న్ని ఏర్పాటు చేయాలని, అందులో తెలంగాణ రాష్ట్ర అంశాలను కూడా ఎజెండాలో చేర్చాలని రాష్ట్ర ప్రభుత్వం డిమాండ్‌ చేసింది. పోతిరెడ్డిపాడుకు ఎట్టి పరిస్థితుల్లోనూ నీటిని అనుమతించబోమని, రాయలసీమ ఎత్తిపోతల పథకం పేరుతో ఆంధ్రప్రదేశ్‌ ప్రభుత్వం చేపడుతున్న అక్రమ ప్రాజెక్టులను వ్యతిరేకిస్తూ కెఆర్‌ఎంబి సమావేశంలో తమ వాదనలను వినిపించాలని సమావేశం తీర్మానించింది. ఇందుకు సంబంధించి తెలంగాణ ఎజెండా అంశాలను కెఆర్‌ఎంబికి వెంటనే తెలపాలని సమావేశం నిర్ణయించింది. పోతిరెడ్డిపాడు చట్టవ్యతిరేక అక్రమ ప్రాజెక్టు. దీన్ని ఎట్టి పరిస్థితుల్లోనూ అంగీకరించం. పోతిరెడ్డి పాడు కాలువకు నీటి ఎత్తిపోసే రాయల సీమ లిప్టు ఇరిగేషన్‌ స్కీం కూడా అక్రమ ప్రాజెక్టేనని సమావేశం తీర్మానించింది. కృష్ణా జలాల్లో బచావత్‌ ట్రిబ్యునల్‌ ఎన్‌ బ్లాగ్‌ అలోకేషన్స్‌ కేటాయించినా, వాటిని నిఖర జలాల కేటాయింపులున్న ప్రాజెక్టులకు మాత్రమే ఆంధ్రప్రదేశ్‌ వాడుకోవాలని సమావేశం స్పష్టం చేసింది. ఆంధ్ర ప్రదేశ్‌ ప్రభుత్వం అక్రమంగా చట్టవ్యతిరేకంగా నిర్మిస్తున్న రాయలసీమ లిఫ్టు ఇరిగేషన్‌ స్కీమ్‌, సాగునీటి ప్రాజెక్టులలో నీటి ఎత్తిపోతలు, తెలంగాణలో జల విద్యుత్‌ ఉత్పత్తి తదితర అంశాలపై ముఖ్యమంత్రి కె.చంద్రశేఖర్‌రావు అధ్యక్షతన ఉన్నతస్థాయి సమీక్షా సమావేశం శనివారం ప్రగతిభవన్‌లో జరిగింది. ఈ సమావేశంలో ప్రభుత్వ ప్రధాన కార్యదర్శి సోమేశ్‌ కుమార్‌, నీటిపారుదల శాఖ స్పెషల్‌ చీఫ్‌ సెక్రటరీ రజత్‌ కుమార్‌, సిఎం సెక్రటరీ స్మితా సభర్వాల్‌, ఈఎన్‌సి మురళీధర్‌రావు, సిఎం ఓఎస్‌డి శ్రీధర్‌రావు దేశ్‌ పాండే, ట్రాన్స్‌కో, జెన్‌కో సిఎండి డి.ప్రభాకర్‌రావు, జెన్కో డైరక్టర్‌ (హైడల్‌) వెంకటరాజం, అడ్వకేట్‌ జనరల్‌ ప్రసాద్‌, అధనపు అడ్వకేట్‌ జనరల్‌ రామచంద్రరావు, సాగునీటిశాఖ ఉన్నతాధికారులు పాల్గొన్నారు. సమావేశం నిర్ణయాలు, తీర్మానాలను ముఖ్యమంత్రి కార్యాలయం ఒక ప్రకటనలో తెలియజేసింది. ఆంధ్రా, – తెలంగాణ నడుమ ఇప్పటిదాకా తాత్కాలికంగా 66:34 నిష్పత్తిలో కొనసాగుతూ వస్తున్న కృష్ణా జలాల వినియోగాన్ని సమావేశం తిరస్కరించింది. ఈ సంవత్సరం నుంచి 50:50 నిష్పత్తిలో మాత్రమే నీటి పంపకాలు జరగాలని, కృష్ణా జలాల్లో మొత్తం 811 టీఎంసీల నికర జలాల కేటాయింపుల్లో ఆంధ్ర తెలంగాణ చెరి సగం అనగా, 405.5 టీఎంసీల నీటిని ట్రిబ్యునల్‌ కేటాయింపులు జరిపేదాకా వినియోగించుకోవాలని సమావేశం తీర్మానించింది. రాష్ట్ర క్యాబినెట్‌ నిర్ణయం మేరకు జూరాల, శ్రీశైలం, నాగార్జున సాగర్‌, పులిచింతల ప్రాజెక్టుల నుంచి నీటి లభ్యత ఉన్నంతకాలం పూర్తి స్థాయిలో విద్యుత్‌ ఉత్పత్తిని కొనసాగించాలని తీర్మానించింది. విద్యుత్‌ ఉత్పత్తిని ఆపమని చెప్పే హక్కు కెఆర్‌ఎంబి లేదు. జల విద్యుత్‌ కు సంబంధించి ఇరు రాష్ట్రాల నడుమ ఎటువంటి ఒప్పందాల నిబంధనలు లేవు. ఈ నేపథ్యంలో తెలంగాణ విద్యుత్‌ ఉత్పత్తి అంశంలో కెఆర్‌ఎంబికి జోక్యం చేసుకునే ప్రశ్నే ఉత్పన్నం కాదని తెలిపింది.
పులిచింతలలో విద్యుత్‌ ఉత్పత్తిని చేస్తూ, తెలంగాణ ప్రభుత్వం కృష్ణా జలాలను వృథాగా సముద్రంలోకి విడుదల చేస్తున్నదనే ఎపి ప్రభుత్వ దుష్ప్రచారాన్ని సమావేశం తిప్పికొట్టింది. పులిచింతల నుంచి విడుదలైన నీటిని ప్రకాశం బ్యారేజీ నుంచి తమ కృష్ణా జిల్లా అవసరాలను తీర్చుకోవాలని ఆంధ్రప్రదేశ్‌ కు సూచించింది. తద్వారా పట్టిసీమ నుంచి గోదావరి నీటిని ఎత్తిపోసేందుకు వినియోగించే విద్యుత్‌ ఖర్చులను తగ్గించుకోవాలని సమావేశం ఆ్ంరధ్రపదేశ్‌ ప్రభుత్వానికి సలహా ఇచ్చింది. సాగునీటిని ఎత్తిపోయడమేగాకుండా, హైదరాబాద్‌ తాగునీటి అవసరాలకు, మిషన్‌ భగీరథ ద్వారా తాగునీటి అవసరాలకు రాష్ట్రానికి విద్యుత్‌ అవసరం ఎంతగానో ఉన్నదని, ఈ నేపథ్యంలో ప్రతీ అవకాశాన్ని వినియోగించుకొని చట్టబద్దంగా తెలంగాణ ప్రభుత్వం జల విద్యుత్‌ ఉత్పత్తి చేస్తుందని సమావేశం స్పష్టం చేసింది. థర్మల్‌ విద్యుత్‌ ఉత్పాదన ద్వారా వాతావరణ కాలుష్యం విపరీతంగా పెరిగిపోతున్నదని, ఈ నేపథ్యంలో 51శాతం ‘ క్లీన్‌ ఎనర్జీని’ ఉత్పత్తి చేస్తూ పర్యావరణ పరిరక్షణకు పాటుపడాలని కేంద్రం ఇటీవల రాష్ట్రాలకు విడుదల చేసిన మార్గదర్శకాలను, జల విద్యుత్‌ ఉత్పాదన ద్వారా తెలంగాణ రాష్ట్రం అమలు పరుస్తున్నదని, ఇక ముందు కూడా కొనసాగించాలని సమావేశం తీర్మానించింది. విద్యుత్‌ ఉత్పత్తికి మాత్రమే ప్రత్యేకమైన శ్రీశైలం ప్రాజెక్టు ద్వారా తెలంగాణకు హక్కుగా కేటాయించిన నీటిని వాడుకుంటుంటే, విద్యుత్‌ ఉత్పత్తి ఆపాలని ఆంధ్రా ప్రభుత్వం కెఆర్‌ఎంబీకి ఫిర్యాదులు చేయడం హాస్యాస్పదం అని సమావేశం అభిప్రాయ పడింది. పర్యావరణ అనుమతులు లేకుండా రాయలసీమ లిప్టు ఇరిగేషన్‌ పనులు చేపట్టవద్దని గ్రీన్‌ ట్రిబునల్‌ స్టే ఇచ్చినా., స్టేని ఉల్లంఘించినందుకు ఆంధ్రప్రదేశ్‌ ప్రభుత్వ ప్రధాన కార్యదర్శిని జైల్లో వేస్తామని ఎన్జీటీ ప్రకటించిందని, అయినా మొండిగా సర్వేల ముసుగున పోతిరెడ్డి పాడు వద్ద పెద్ద ఎత్తున నిర్మాణ సామాగ్రిని డంప్‌ చేసి, నిర్మాణాలు చేపట్టడం అన్యాయమని సమావేశం అభిప్రాయ పడింది. జూరాల కుడి, ఎడమ కాల్వల ద్వారా నీటిని వదిలి, చెరువులను, కుంటలను నింపాలని సమావేశం నిర్ణయించింది. ఇటీవలే నిర్మాణం పూర్తి చేసుకున్న సమ్మక్క బ్యారేజీ సహా సీతమ్మసాగర్‌ ప్రాజెక్టులను ఇరిగేషన్‌ అండ్‌ హైడ్రో ఎలక్ట్రికల్‌ ప్రాజెక్టులుగా పిలువాలని సమావేశం తీర్మానించింది. ‘శ్రీశైలం డ్యామ్‌ మీద తెలంగాణ భూభాగంలోకి గుర్తింపు కార్డులున్న విద్యుత్‌ ఉద్యోగులను తప్ప, వేరెవరినీ అనుమతించవద్దని, శ్రీశైలం సహా కృష్టా ప్రాజెక్టుల వద్ద పూర్తిస్థాయి రక్షణ చర్యలు తీసుకోవాలని నిర్ణయించింది. కృష్ణా జలాల్లో తెలంగాణ హక్కులను కాపాడుకోవడానికి, తెలంగాణ రాష్ట్ర రైతాంగ ప్రయోజనాలను కాపాడుకోవడానికి రాజీలేని పోరాటం ఎంతవరకైనా కొనసాగించాలని సమావేశం నిర్ణయించింది. సమావేశంలో సిఎం కెసిఆర్‌ మాట్లాడుతూ దశాబ్దాల సమైక్య పాలనలో తెలంగాణ వ్యవసాయాన్ని నిర్లక్ష్యం చేసిన వలస పాలకులు ఎత్తిపోతల పథకాలకు ప్రాధాన్యత ఇవ్వలేదన్నారు. ఈ నేపథ్యంలో రానున్న కాలంలో కృష్ణా, గోదావరి నదులపై మరిన్ని ప్రాజెక్టులను నిర్మించనున్నట్లు తెలిపారు. రెండు పంటలకూ నీరందాలంటే జల విద్యుత్‌ ఉత్పత్తి ప్రాజెక్టుల ద్వారా కేటాయించబడిన నీటిని, విద్యుత్‌ ఉత్పత్తి కోసం వినియోగించుకుంటామన్నారు. పలు ట్రిబ్యునల్స్‌ ద్వారా రాజ్యాంగబద్దంగా తెలంగాణకు కేటాయించబడిన నదీ జలాలను సాగునీటికోసం వాడుకోవడంతోపాటు, సాగునీటిని ఎత్తిపోసుకోవాల్సిన అనివార్యతను అధిగమించడానికి కావాల్సిన జల విద్యుత్‌ ఉత్పత్తి కోసం కూడా తప్పకుండా కేటాయించబడిన నీటిని వినియోగించుకుంటామన్నారు. ఇదే విషయాన్ని రాష్ట్ర కేబినెట్‌ తీర్మానించిందని, దీనికి వ్యతిరేకంగా ఎవరి అభిప్రాయాలనూ తెలంగాణ ప్రభుత్వం పట్టించుకోదన్నారు.
దశాబ్దాలపాటు తెలంగాణ సాగునీటికి గోస పడ్డదనీ, స్వయంపాలనలోనూ అటువంటి పరిస్థితిని ఎట్టి పరిస్థితిలో రానివ్వబోమన్నారు. బచావత్‌ ట్రిబ్యునల్‌ ఏర్పాటై 17 ఏండ్లు కావస్తున్నా, తెలంగాణకు కృష్ణా జలాల్లో నీటివాటాను నిర్ధారించకపోవడంపై సిఎం కెసిఆర్‌ ఆగ్రహం వ్యక్తం చేశారు. తెలంగాణ నీటి వాటా కోసం అవసరమైతే కేంద్రంతో పోరాడుతామని ముఖ్యమంత్రి స్పష్టం చేశారు. తెలంగాణ వ్యవసాయం కోసం, రైతుల సంక్షేమం కోసం ఎవరితోనైనా, ఎంతవరకైనా పోరాడుతామన్నారు. నదీ జలాల మీద తన పొరుగు రాష్ట్రాలకు కేటాయించబడిన వాటాలను హక్కుగా వినియోగించుకోవడానికి తెలంగాణ రాష్ట్రం సంపూర్ణంగా సహకరిస్తుందని, అయితే కేటాయింపులు లేని నికర జలాలను దౌర్జన్యంగా వాడుకుంటామంటే తెలంగాణ ప్రజలు చూస్తూ ఊరుకోబోరని సిఎం కెసిఆర్‌ పునరుద్ఘాటించారు.
బేసిన్‌ అవసరాలు పూర్తిగా తీరిన తర్వాతనే, ఇంకా సర్‌ ప్లస్‌ వాటర్‌ వుంటే, అవుటాఫ్‌ బేసిన్‌ అవసరాల మీద దృష్టి పెట్టాలనేది సహజ న్యాయమన్నారు. దీన్ని ఆంధ్రప్రదేశ్‌ ప్రభుత్వం విస్మరించడం సరికాదన్నారు. తెలంగాణ చేపట్టిన లిఫ్టు ఇరిగేషన్‌ ప్రాజెక్టుల నేపథ్యంలో జల విద్యుత్‌ ఉత్పత్తి అవసరం పెరిగిందన్నారు. జల విద్యుత్‌తో లిఫ్టులను నడిపి తద్వారా తెలంగాణ సాగునీటిని ఎత్తిపోసుకుంటుందని సిఎం స్పష్టం చేశారు. సాగు నీటితోపాటు, సాగునీటిని ఎత్తిపోసుకునేందుకు జలవిద్యుత్‌ ఉత్పత్తిని కూడా తెలంగాణకు కేటాయించిన నీటి ద్వారానే జరుపుకుంటుందని, ఇందులో ఎవరూ అభ్యంతరం తెలపడానికి వీల్లేదని ముఖ్యమంత్రి స్పష్టం చేశారు. ఇదే విషయాన్ని ట్రిబ్యునళ్ల ముందు, కెఆర్‌ఎంబి వంటి బోర్డుల ముందు, న్యాయస్థానాల్లోనూ ప్రజాక్షేత్రంలోనూ తెలంగాణ ప్రభుత్వం తన వాణిని వినిపిస్తుందన్నారు.
“ తెలంగాణలో ఆంధ్రా మాదిరిగా కాలు అడ్డం పెట్టుకుని నీళ్లు పారించుకునే పరిస్థితి లేదు. నీటిని లిఫ్టుల ద్వారా ఎత్తి పోసుకోవాలె. తెలంగాణలో 30 లక్షలకు పైగా బోరు మోటార్లున్నాయి. తెలంగాణ మొత్తం విద్యుత్తులో 40శాతం విద్యుత్తు సాగునీటి అవసరాలకే వినియోగించబడుతున్నది. తెలంగాణకున్న భూపరిస్థితుల దృష్ట్యా సాగునీరే కాదు, విద్యుత్‌ ఉత్పత్తి కోసం కూడా నీరు అవసరం..’ అని ముఖ్యమంత్రి వివరించారు. “ఉమ్మడి రాష్ట్రంలో వైఎస్సార్‌ ముఖ్యమంత్రిగా ఉన్నపుడు పోతిరెడ్డిపాడుకు వరద జలాలను మాత్రమే వాడుకుంటామని అసెంబ్లీలో, అసెంబ్లీ బయట అనేకసార్లు ప్రకటించారు. బ్రిజేష్‌ కుమార్‌ ట్రిబ్యునల్‌ కు కూడా నాడు అదే విషయం చెప్పారు. నేడు మాట మార్చి పోతిరెడ్డిపాడు పేరుతో తెలంగాణ నీటి హక్కులను కాలరాస్తామంటే తెలంగాణ ప్రజలు సహించరు” అని సిఎం కెసిఆర్‌ స్పష్టం చేశారు. కాళేశ్వరం ప్రాజెక్టు నిర్మాణం సందర్భంగా తెలంగాణ ప్రభుత్వం ఎంతో సంయమనంతో పొరుగు రాష్ట్రమైన మహారాష్ట్రతో చర్చలు జరిపి, వారికి ఇబ్బంది లేని విధంగా, సహకరిస్తూ నిర్మాణం చేసిందని, ఇదే పరిస్థితిని ఆంధ్రప్రదేశ్‌ విషయంలో కూడా అవలంభించేందుకు తమ స్నేహ హస్తం సాచినామని సిఎం గుర్తుచేశారు. అయినా ఎపి ప్రభుత్వం పెడచెవిన పెట్టడం పట్ల సిఎం కెసిఆర్‌ ఆవేదన వ్యక్తం చేశారని ముఖ్యమంత్రి కార్యాలయం తెలియజేసింది.