డబ్బు కాదు.. ప్రజల ప్రాణాలు ముఖ్యం
ముఖ్యమంత్రి కె. చంద్రశేఖర్‌రావు ప్రకటన
ప్రజాపక్షం / హైదరాబాద్‌ వయసుతో సంబంధం లేకుం డా, రాష్ర్టంలో వున్న ప్రతివారికీ వాక్సినేషన్‌ ఇవ్వాలని ముఖ్యమంత్రి కె. చంద్రశేఖర్‌ రావు నిర్ణయించారు. అందరికీ వాక్సినేషన్‌ ఇవ్వడానికి సుమారు రూ. 2500 కోట్లకు పైగా ఖర్చు అవుతుందని తెలిపారు. సొంతంగా రాష్ర్ట జనాభా, ఇతర రాష్ట్రా ల నుండి ఇక్కడికి వచ్చి అనేక సెక్టార్లలో పనిచేస్తున్న జనాభాను కలుపుకుని, తెలంగాణ రాష్ర్టంలో సుమారు నాలుగు కోట్లమంది దాకా ప్రజలు వున్నారని, వీరిలో ఇప్పటికే 35 లక్షల మందికి పైగా వ్యక్తులకు వాక్సినేషన్‌ (టీకా) ఇచ్చినట్లు చెప్పారు. మిగతా ప్రజల ప్రాణాల కంటే డబ్బు ముఖ్యం కాదనీ, అందరికీ వాక్సినేషన్‌ ఇవ్వడం జరుగుతుందని సిఎం కెసిఆర్‌ అన్నారు. దీనికి సంబంధించిన ఆదేశాలను ముఖ్యమంత్రి రాష్ర్ట ప్రభుత్వ ప్రధాన కార్యదర్శికి, వైద్యశాఖ అధికారులకు శనివారం జారీ చేసినట్లు ముఖ్యమంత్రి కార్యాలయం ఒక పత్రికా ప్రకటనలో తెలిపింది. మొత్తం రాష్ర్టంలో వున్న అందరికీ వాక్సినేషన్‌ ఇవ్వడానికి చర్యలు తీసుకోవాలని సిఎం కెసిఆర్‌ ఆదేశించారు. ఇప్పటికే భారత్‌ బయోటెక్‌ వాక్సినేషన్‌ తయారీ చేస్తున్నదని, రెడ్డీ ల్యాబ్స్‌తో సహా మరికొన్ని సంస్థలు వాక్సినేషన్‌ తయారీకి ముం దుకు వచ్చాయని, కాబట్టి వాక్సినేషన్‌ విషయంలో ఎలాంటి ఇబ్బంది వుండబోదని ముఖ్యమంత్రి స్పష్టం చేశారు. రెండు-మూడు రోజుల్లో తనకు అవసరమైన వైద్య పరీక్షలు జరిగి, పూర్తి స్వస్థత చేకూరిన తరువాత సంబంధిత అధికారులతో ఉన్నత స్థాయి సమీక్షా సమావేశం నిర్వహించి వ్యాక్సినేషన్‌ కార్యక్రమాన్ని స్వయంగా పర్యవేక్షిస్తానని ముఖ్యమంత్రి అన్నారు. వాక్సినేషన్‌ కార్యక్రమం పటిష్టంగా, విజయవంతంగా అమలు చేయడానికి జిల్లాలవారీగా ఇన్‌చార్జ్‌లను నియమించడం కూడా జరుగుతుందని సిఎం కెసిఆర్‌ చెప్పారు. వాక్సినేషన్‌ కార్యక్రమంతో పాటు, రెమ్‌డిసివిర్‌ తదితర కరోనా సంబంధిత మందులకు, ఆక్సిజన్‌కు ఎలాంటి కొరత రాకుండా చర్యలు తీసుకుంటామని ముఖ్యమంత్రి తెలిపారు. ప్రజలు ఏ విధమైన భయభ్రాంతులకు గురికావద్దని, కరోనా సోకినవారికి పడకల విషయంలోనూ, మందుల విషయంలోనూ ప్రభుత్వం చేయాల్సినదంతా చేస్తుందని, ప్రజలను కొవిడ్‌ బారి నుండి కాపాడడానికి అన్ని రకాల చర్యలు తీసుకుంటుందని, పెద్ద ఎత్తున శానిటేషన్‌ చేపట్టుతుందని ముఖ్యమంత్రి భరోసా ఇచ్చారు. ప్రజలు అధైర్య పడవద్దని, ఏ మాత్రం నిర్లక్ష్యంగా వుండవద్దని సిఎం కోరారు. పెద్ద ఎత్తున గుంపు-గుంపులుగా కూడవద్దని, ఊరేగింపులలో పాల్గొనవద్దని, అత్యవసరమైతేనే తప్ప బయట తిరగవద్దని, స్వయం క్రమశిక్షణ పాటించాలని ముఖ్యమంత్రి ప్రజలకు విజ్ఞప్తి చేశారు. ప్రజల క్షేమమే లక్ష్యంగా పనిచేస్తున్న ప్రభుత్వం కరోనా మహమ్మారి విషయంలో చేయాల్సినదంతా పటిష్టంగా చేస్తుందని కెసిఆర్‌ మరోమారు చెప్పారు.
