పార్కులు, నాలాలు, ప్రభుత్వ స్థలాల పరిరక్షణ ఆ సంస్థదే అదనపు అధికారాలతో సిబ్బందిని కేటాయిస్తాం
త్వరలో అవసరమైన విధివిధానాలు ఖరారు ప్రభుత్వ ఆస్తుల పరిరక్షణపై సమీక్ష సమావేశంలో సిఎస్‌
ప్రజాపక్షం / హైదరాబాద్‌
హైదరాబాద్‌ ఔటర్‌ రింగ్‌ రోడ్‌ (ఓఆర్‌ఆర్‌) పరిధిలోని అన్ని చెరువులు, పార్కులు, నాలాలతో పాటు అన్ని ప్రభుత్వ స్థలాల పరిరక్షణ బాధ్యతలను పూర్తి స్థాయిలో హైడ్రాకు అప్పగించనున్నట్లు రాష్ట్ర ప్రభుత్వం ప్రకటించింది. ఇందు కోసం అవసరమైన విధివిధానాలను రూపొందిస్తున్నట్టు ప్రభుత్వ ప్రధాన కార్యదర్శి శాంతికుమారి వెల్లడించారు. చెరువుల ఆక్రమణల తొలగింపు, ప్రభుత్వ ఆస్తుల పరిరక్షణపై రాష్ట్ర హై-కోర్టు జారీచేసిన ఆదేశాలను పరిగణంలోకి తీసుకుంటూ, ప్రభుత్వ స్థలాలు, చెరువులు, ప్రభుత్వ ఆస్తుల పరిరక్షణకు హైడ్రాకు మరిన్ని అధికారాలను, సిబ్బందిని అప్పగించేందుకు చర్యలు చేపట్టాల్సిన అవసరముందన్నారు. చెరువుల ఆక్రమణల తొలగింపు, ప్రభుత్వ ఆస్తుల పరిరక్షణపై రాష్ట్ర హై-కోర్టు జారీ చేసిన ఆదేశాలను పరిగణనలోకి తీసుకుంటూ సమగ్ర కార్యాచరణ ప్రణాళిక రూపొందించడానికి ప్రభుత్వ ప్రధాన కార్యదర్శి శాంతి కుమారి గురువారం సచివాలయంలో ఉన్నత స్థాయి సమావేశాన్ని నిర్వహించారు. ఈ సమావేశానికి ఇంటలిజెన్స్‌ డిజీ శివధర్‌ రెడ్డి, శాంతి భద్రతల విభాగం అడిషనల్‌ డిజి మహేష్‌ భగవత్‌, మున్సిపల్‌ పరిపాలన శాఖ ముఖ్య కార్యదర్శి దాన కిషోర్‌, నీటిపారుదల శాఖ కార్యదర్శి రాహుల్‌ బొజ్జా, హెచ్‌ఎండిఎ కమిషనర్‌ సర్ఫరాజ్‌ అహ్మద్‌, అడిషనల్‌ అడ్వకేట్‌ జనరల్‌ రజనీకాంత్‌ రెడ్డి, ఎసిబి డైరెక్టర్‌ తరణ్‌ జోషి, హైదరాబాద్‌, రంగారెడ్డి, మేడ్చల్‌ మల్కాజిగిరి, సంగారెడ్డి జిల్లాల కలెక్టర్లు హాజరయ్యారు. ఈ సందర్బంగా సి.ఎస్‌ శాంతి కుమారి మాట్లాడుతూ, చెరువులు, కుంటలు, పార్కులు, ప్రభుత్వ స్థలాల ఆక్రమణల తొలగింపుపై ప్రస్తుతం నీటిపారుదల శాఖ, జిహెచ్‌ఎంసి, పురపాలక శాఖ, పంచాయితీరాజ్‌, వాల్టా తదితర విభాగాలు వేర్వేరుగా నోటీసులు జారీ చేస్తున్నారని, దీనివల్ల ఒక రకమైన అయోమయం ఏర్పడుతోందని అభిప్రాయపడ్డారు. దీనిని నివారించటానికి ఓఆర్‌ఆర్‌పరిధిలో అన్ని విధాలా ఆక్రమణల తొలగింపు నోటీసులను హైడ్రా ద్వారానే చేపట్టేందుకు విధివిధానాలు ఖరారు చేయాలని మున్సిపల్‌ శాఖ ముఖ్య కార్యదర్శిని సిఎస్‌ ఆదేశించారు. జిహెచ్‌ఎంసి, ల్యాండ్‌ ఏంక్రోచ్‌మెంట్‌ యాక్ట్‌, ల్యాండ్‌ గ్రాబింగ్‌ యాక్ట్‌, వాల్టా చట్టం, నీటిపారుదల శాఖ చట్టాల ద్వారా జారీచేసే అన్ని రకాల నోటీసులు, తొలగింపులన్నీ పూర్తిగా ఒకే విభాగం హైడ్రా పరిధిలోకి తీసుకురానున్నట్టు సిఎస్‌ వివరించారు. హైడ్రాకు కావాల్సిన అదనపు అధికారులు, సిబ్బందిని త్వరలోనే కేటాయించనున్నట్టు తెలిపారు. ఎఫ్‌టిఎల్‌, నాలా ఎంక్రోచ్‌మెంట్‌, ప్రభుత్వ ఖాళీ స్థలాలు, పార్కుల పరిరక్షణలను హైడ్రా పరిధిలోకి తీసుకురానున్నామని చెప్పారు. గండిపేట, హిమాయత్‌సాగర్‌ చెరువుల పరిరక్షణ కూడా జలమండలి నుండి హైడ్రా పరిధిలోకి తీసుకురానున్నామని సిఎస్‌ శాంతికుమారి వెల్లడించారు. హైడ్రా ఆధ్వర్యంలో మొత్తం 72 బృందాలు ఏర్పాటయ్యాయని, వీటిని మరింత బలోపేతం చేయాడానికి కావాల్సిన పోలీస్‌, సర్వే, నీటిపారుదల శాఖల నుండి అధికారులు, సిబ్బందిని త్వరితగతిన కేటాయించనున్నట్టు సిఎస్‌ తెలిపారు. ఈ సమావేశంలో హైదరాబాద్‌ జిల్లా కలెక్టర్‌ అనుదీప్‌, రంగారెడ్డి జిలా కలెక్టర్‌ శశాంక, మేడ్చల్‌ మల్కాజిగిరి జిల్లా కలెక్టర్‌ గౌతమ్‌ పౌత్రు, సంగారెడ్డి జిల్లా కలెక్టర్‌ వల్లూరు క్రాంతి పాల్గొన్నారు.
