సిద్ధంచేయాలని అధికారులకు ముఖ్యమంత్రి ఆదేశం
నగరంలోని ప్రధాన ప్రాంతాలను కలుపుతూ వెళ్ళేలా రైల్‌ నిర్మాణం జరగాలి
మెట్రోరైల్‌ రెండు, మూడవ దశ విస్తరణపై సిఎం సమీక్ష
రాయదుర్గం శంషాబాద్‌ ఎయిర్‌పోర్టు వరకు నిర్మించతలపెట్టిన గత ప్రభుత్వ ప్లాన్‌ను ఆపేయాలని సూచన
ప్రజాపక్షం/హైదరాబాద్‌ నగరంలోని ప్రధాన ప్రాంతాలను కలుపుతూ వెళ్లేలా మెట్రోరైలు నిర్మాణం జరుగాలని, దీనికి ప్రతిపాదనలు తయారుచేయాలని అధికారులను ముఖ్యమంత్రి ఎ.రేవంత్‌రెడ్డి ఆదేశించారు. హైదరాబాద్‌ మెట్రోరైలు రెండోదశ, మూడవ దశ విస్తరణ, నిర్మాణంపై మంగళవారం హైదరాబాద్‌లోని సచివాలయంలో సిఎం సమీక్ష జరిపారు. సమీక్షలో భాగంగా మెట్రోరైలు ఎండి ఎన్‌.వి.ఎస్‌.రెడ్డి రెండో దశ ప్రతిపాదనలపై సమగ్రంగా ప్రజంటేషన్‌
ఇచ్చారు. అత్యధిక మంది ప్రయాణీకులకు ఉపయోగపడే విధంగా మెట్రోరైలు ప్రాజెక్టును తీర్చిదిద్దాలని సూచించారు. దీనికోసం హెచ్‌ఎండిఎ కమిషనర్‌తో సమన్వయం చేసుకుంటూ కొత్త ప్రతిపాదనలు తయారుచేయాలని మెట్రోరైలు ఎండిని ఆదేశించారు. దారుల్‌ షిఫా జంక్షన్‌ నుండి షాలిబండ వరకు గల మెట్రోరైల్‌ స్ట్రెచ్‌ మార్గాన్ని రోడ్డును వెడల్పు చేయాలన్న హెచ్‌ఎంఆర్‌ఎల్‌ చేసిన ప్రతిపాదనలపై పాతబస్తీ ప్రజాప్రతినిధులతో సంప్రదించి దారుల్‌షిఫా జంక్షన్‌ నుండి ఫలక్‌నుమా జంక్షన్‌ వరకు రహాదారిని 100 ఫీట్ల వరకు విస్తరించే సాధ్యాసాధ్యాలను పరిశీలించాలని అధికారులకు సిఎం సూచించారు. దీనివల్ల పాతనగరం ఇతర ప్రాంతాలతో సమానంగా అత్యంత వేగంగా అభివృద్ధి చెందే అవకాశముందని అన్నారు. మెట్రోరైలు నిర్మాణ ప్రణాళికలో భాగంగా పాతనగరంలో వారసత్వ, మతపరమైన నిర్మాణాలు 103 ఉన్నాయని తేలిందని వీటికి నష్టం జరుగకుండా చూడాలని సూచించారు. ఈ ప్రక్రియలో అవసరమైతే తానే స్వయంగా కలుగజేసుకుంటానని, ఓల్డ్‌ సిటీ ప్రజాప్రతినిధుల సహకారం తీసుకుంటామని అన్నారు.
గత ప్రభుత్వం రాయదుర్గం నుండి శంషాబాద్‌ ఏయిర్‌ పోర్టు వరకు రూ.6,250 కోట్లతో నిర్మించతలపెట్టిన 31 కిలోమీటర్ల ఏయిర్‌పోర్టు మెట్రో ప్లాన్‌ను ప్రస్తుతానికి నిలిపివేయాలని సిఎం రేవంత్‌రెడ్డి కోరారు. ఈ మార్గంలో ప్రయాణానికి ఇబ్బందులు లేకుండా వెడల్పైన అవుటర్‌ రింగ్‌ రోడ్డు ఉందని అన్నారు. దీనికి బదులుగా ఏయిర్‌ పోర్టుకు మెట్రోను ఎంజిబిఎస్‌ వయా ఓల్డ్‌ సిటీ తోపాటు ఎల్‌బినగర్‌ నుంచి కూడా కనెక్ట్‌ చేయాలని అన్నారు. అదే విధంగా నాగోల్‌ నుంచి ఎల్‌బినగర్‌ వరకు గల 5 కిలోమీటర్ల మేరకు దూరాన్ని కూడా కలుపుతూ ప్రణాళికలు తయారు చేయాలని ఆదేశించారు.
ఏయిర్‌ పోర్టు మెట్రోకు సంబంధించి మార్చిన అలైన్‌మెంట్‌ ప్రకారం వయా ఓల్డ్‌ సిటీ , ఎల్‌బి నగర్‌కు సంబంధించిన ట్రాఫిక్‌ అధ్యయనం చేయడంతోపాటు డిపిఆర్‌ త్వరగా సిద్ధం చేయాలని హెచ్‌ఎంఆర్‌ఎల్‌ ఎండిని సిఎం ఆదేశించారు. లక్ష్మిగూడ- జల్‌పల్లి మామిడిపల్లి మార్గంలో కొత్తగా మెట్రో నిర్మాణం కోసం అవకాశాలను పరిశీలించాలని సూచించారు. ఎటువంటి ఆటంకాలు లేకుండా రోడ్డు మధ్యలో 40 ఫీట్ల వెడల్పుతో నిర్మాణం చేసే ప్రణాళికను పరిశీలించాలని సూచించారు. దీనివల్ల నిర్మాణ వ్యయం తగ్గుతుందని తెలిపారు. ఇదే మార్గంలో ట్రాన్సిట్‌ ఓరియెంటెడ్‌ డెవలప్‌మెంట్‌ కోసం స్ట్రెచ్‌ వెంట అందుబాటులో ఉన్న ప్రభుత్వ భూములను గుర్తించాలని హెచ్‌ఎండిఎ కమిషనర్‌ ఎం.దానకిషోర్‌తో పాటు సిఎం కార్యాలయం ముఖ్యకార్యదర్శి వి.శేషాద్రిని సిఎం ఆదేశించారు. అలాగే ఓల్డ్‌ సిటీతో పాటు దాని చుట్టుపక్కల ప్రాంతాలను అభివృద్ధి చేయాలని అన్నారు. కొత్త అలైన్‌మెంట్‌ వల్ల తక్కువ దూరంతో అత్యధిక ప్రయాణ ప్రయోజనం జరిగేలా, నిర్మాణ వ్యయం తక్కువయ్యేలా చూడాలని సిఎం ఆదేశించారు.
ప్రస్తుత మెట్రో కారిడార్లకు సమీపంలో ఉన్న ప్రాంతాలకు మెట్రో రైలు విస్తరణ చేపట్టి నగరం నలుదిశలా అభివృద్ధి జరిగేలా ప్రణాళిక సిద్ధం చేయాలని మెట్రోరైలు ఎండిని ముఖ్యమంత్రి రేవంత్‌రెడ్డి ఆదేశించారు. వీటి ప్రణాళికలను త్వరగా సిద్ధం చేసి సెంట్రల్‌ అర్బన్‌ డెవలప్‌మెంట్‌ అండ్‌ హౌసింగ్‌ మినిస్టర్‌ హర్దిప్‌సింగ్‌ పూరికి డ్రాఫ్టు లెటర్‌ను సిద్ధం చేసి పంపించాలని మున్సిపల్‌ అడ్మినిస్ట్రేషన్‌ అండ్‌ అర్బన్‌ డెవలప్‌మెంట్‌ ముఖ్య కార్యదర్శితో పాటు మెట్రోరైల్‌ ఎండిని ముఖ్యమంత్రి ఆదేశించారు. మొత్తం 40 కిలోమేటర్ల మేరకు మూసి రివర్‌ ఫ్రంట్‌ ఈస్ట్‌ కారిడార్‌ను మెట్రో రైలు ప్రాజెక్టులో చేర్చాలని సూచించారు. తారామతి నుండి నార్సింగి వయా నాగోల్‌, వయా ఎంజిబిఎస్‌ మార్గం కూడా చేపట్టాలని కోరారు.
ఎయిర్‌పోర్ట్‌ నుండి కందుకూరుకు మెట్రో
వేగంగా అభివద్ధి చెందుతున్న హైదరాబాద్‌ నగర అవసరాలను తీర్చడానికి సమగ్ర మాస్టర్‌ ప్లాన్‌ సిద్ధం చేయాలని, ఓఆర్‌ఆర్‌ చుట్టు చిన్నాభిన్నమైన ప్రాంతాలను గ్రోత్‌ హబ్‌గా మార్చడానికి ప్రణాళికలు సిద్ధం చేయాలని ఆదేశించారు. శ్రీశైలం హైవేపై ఏయిర్‌పోర్టు ప్రాంతం నుండి కందుకూరు వరకు మెట్రోరైలు కనెక్టివిటీని కూడా ప్లాన్‌ చేయాలని సూచించారు. ఇక్కడ ఫార్మాసిటీ కోసం భూములను ఈ ప్రాంతంలో సేకరించడం జరిగిందని అన్నారు. అందువల్లే మెట్రో కనెక్టివిటి అవసరమని అన్నారు. జెబిఎస్‌ మెట్రో స్టేషన్‌ నుంచి శామీర్‌పేట్‌ వరకు, కండ్లకోయ, మేడ్చల్‌ వరకు మెట్రోరైల్‌ మూడవ దశ విస్తరణ జరుగాలని ఆకాంక్షించారు. ఈ సమావేశంలో ప్రభుత్వ ప్రధాన కార్యదర్శి ఎ.శాంతికుమారి, ఐజి ఇంటలీజెన్స్‌ శివధర్‌రెడ్డి, సిఎంఓ కార్యదర్శి షానవాజ్‌ ఖాసీం, సిఎం ఓఎస్‌డి అజిత్‌రెడ్డి తదితరులు పాల్గొన్నారు.
గమనికః కిందది బాక్స్‌గా మధ్యలో వాడుకోగలరు
1 . మియాపూర్‌- చందానగర్‌ పటాన్‌చెరు (14 కిలోమీటర్లు)
2. ఎంజిబిఎస్‌ -ఫలక్‌ నుమా -చాంద్రాయణగుట్ట- మైలాదేవర్‌ పల్లి రోడ్డు- ఏయిర్‌పోర్టు(23 కిలోమీటర్లు)
3. నాగోల్‌- ఎల్‌బి నగర్‌ ఓవైసీ హాస్పటల్‌ -చాంద్రాయణగుట్ట -మైలాదేవర్‌ పల్లి- ఆరాంఘర్‌- న్యూ హైకోర్టు ప్రతిపాదిత ప్రాంతం రాజేంద్రనగర్‌ (19 కిలోమీటర్లు)
4. కారిడార్‌ 3లో భాగంగా రాయదుర్గం నుండి ఫైనాన్షియల్‌ డిస్ట్రిక్ట్‌ వరకు (విప్రో జంక్షన్‌ నుండి/అమెరికన్‌ కాన్సూలేట్‌) వయా బయోడైవర్సిటీ జంక్షన్‌, ట్రిపుల్‌ ఐటి జంక్షన్‌, ఐఎస్‌బి రోడ్డు (12 కిలోమీటర్లు)
5. ఎల్‌బి నగర్‌ -వనస్థలిపురం- హయత్‌ నగర్‌(8 కిలోమీటర్లు)
