మిర్చి అమ్మకాల్లో రైతులకు ఇబ్బందులు రానివ్వొద్దు

ధర విషయంలోనూ పకడ్బందీ చర్యలు చేపట్టాలి
వ్యవసాయ శాఖామంత్రి తుమ్మల
ప్రజాపక్షం / హైదరాబాద్‌ మార్కెట్లకు పోటెత్తుతున్న మిర్చి పంట అమ్మకాల్లో రైతులకు ఎటువంటి ఇబ్బందులు, ధర విషయంలో తేడా రాకుండా పకడ్బందీ చర్యలు చేపట్టాలని మార్కెటింగ్‌ శాఖకు వ్యవసాయ శాఖ మంత్రి తుమ్మల నాగేశ్వర రావు ఆదేశాలు ఇచ్చారు. రాష్ర్ట స్థాయిలో , జోనల్‌ స్థాయిలో పనిచేసే సంబంధిత అధికారులను అమ్మకాలు ఎక్కువగా జరిగే మార్కెట్లకు పర్యవేక్షకులుగా నియమించి ఎప్పటికప్పుడు నివేదికలు తెప్పించుకొనే ఏర్పాట్లు చేయాలని ఒక ప్రకటనలో సూచించారు. ఈ సీజన్‌ లో రాష్ర్టంలో 3 .91 లక్షల ఎకరాలలో మిర్చి సాగుచేయగా, ఇప్పటికే 94395.08 మెట్రిక్‌ టన్నుల మిర్చి మార్కెట్‌ కు వచ్చిందన్నారు. రానున్న రోజుల్లో 3,37,014 మెట్రిక్‌ టన్నులు వచ్చే అవకాశం ఉన్నదన్నారు. మార్కెటింగ్‌ శాఖ జిల్లా అధికారులు , మార్కెట్‌ కమిటీ కార్యదర్శులు ఎటువంటి నిర్లక్ష్యానికి తావివ్వకుండా, అమ్మకాలు సజావుగా సాగేంధుకు అన్నీ చర్యలు చేపట్టాలని, కఠినచర్యలు తీసుకొంటామని మంత్రి తుమ్మల హెచ్చరించారు. రైతులు పంట వేసిన రోజు నుండి ఆ ఉత్పత్తులను మార్కెటింగ్‌ చేసుకొనేంతవరకు రాష్ర్ట ప్రభుత్వం ప్రతి విషయంలో రైతులకు అండగా ఉంటుందని తెలిపారు. కేవలం ఒకటి లేదా రెండు పంటల కొనుగోళ్లు చేసి మిగతా పంటలకు గిట్టు బాటు ధర అందించే విషయంలో గత ప్రభుత్వ నిర్లక్ష్యధోరణి కారణంగా రాష్ర్టంలో 75 శాతం సాగు విస్తీర్ణం రెండు, మూడు పంటల కిందకు వచ్చిందన్నారు. ఈ పరిస్థితిని నివారించి అన్నీ పంటలకు గిట్టు బాటు ధర వచ్చే విధంగా అవసరమయ్యే చర్యలు చేపట్టాలని నిర్ణయించినట్లు పేర్కొన్నారు. ఈ క్రమంలో పసుపు బోర్డు ఏర్పాటు, సిఐఐ సెంటర్ల కొనసాగింపుకు విజ్ఞప్తి చేసిన విషయం విదితమే.
వేరే శెనగ కొనుగోలులో జాగ్రత్త
వేరుశెనగ అమ్మకాల్లో రైతులకు ఎక్కడైనా ఇబ్బందులు తలెత్తితే సత్వరం పరిష్కరించి అమ్మకాలు సజావుగా సాగేటటట్లు చూడాలని అధికారులను మ్రంతి తుమ్మల నాగేశ్వరరావు ఆదేశించారు. రాష్ర్టంలో యాసంగి లో దాదాపు 2 లక్షల ఎకరాలలో వేరుశెనగ సాగు కాగా 1.92 లక్షల మెట్రిక్‌ టన్నులు దిగుబడి రాగలదని అంచనా వేసినట్లు తెలిపారు. ఇప్పటికే 93 వేల మెట్రిక్‌ టన్నులు అమ్మకానికి రాగా , స్వంత అవసరాలకు పోను ఇంకా మార్కెట్లకు 46 వేల టన్నుల వేరుశెనగ వచ్చే అవకాశం ఉందని పేర్కొన్నారు. వ్యవసాయ, ఉద్యాన శాఖల నుంచి కూడా అధికారులను సంబంధిత జిల్లా అధికారులు తో మిర్చి , వేరుశెనగ అధికంగా పండించే జిల్లాలను సందర్శించి, రైతులందరికీ మార్కెట్లకు ఉత్పత్తులను తీసుకొచ్చే విషయములో అవగాహన కల్పించాలని ఆదేశించారు.