రాష్ట్రానికి రావాల్సిన నిధులు ఇంకా పెండింగ్‌లోనే
తెలంగాణ నిధులు ఎపి ఖాతాల్లో వేశారు
కేంద్ర ఆర్థిక మంత్రి నిర్మలా సీతారామన్‌తో భట్టి విక్రమార్క
ప్రజాపక్షం / హైదరాబాద్‌
రాష్ట్ర విభజన చట్టంలో పేర్కొన్న మేరకు ఆంధ్రప్రదేశ్‌ నుంచి తెలంగాణకు రావాల్సిన నిధులు ఇంకా పెండింగ్‌లోనే ఉన్నాయని, వాటిని తమకు వెంటనే విడుదల చేయాలని కేంద్ర ఆర్థిక శాఖ మంత్రి నిర్మలా సీతారామన్‌ను డిప్యూటి సిఎం మల్లు భట్టి విక్రమార్క కోరారు. ఢిల్లీలో కేంద్ర మంత్రిని శనివారం కలిసిన అనంతరం ఆయన మీడియాతో మాట్లాడారు. రాష్ట్ర ఆర్థిక పరిస్థితులను నిర్మలా సీతారామన్‌కు వివరించి తమకు సహాయం అందించాలని కోరామన్నారు. కేంద్ర ప్రాయోజిత పథకాల నిధుల విడుదలతో పాటు విభజన చట్టం ప్రకారం రావాల్సిన నిధుల గురించి గుర్తు చేశారు. గత ప్రభుత్వం బడ్జెటేతర రుణాలు చేసిందని, అవి రాష్ట్ర ఖజనాపై తీవ్ర రుణ భారాన్ని మోపుతున్నాయని , వీటిని రీ షెడ్యూల్‌ చేసి కొంత ఉపశమనం కలిగించాలని కోరినట్లు తెలిపారు. రూ. 31,795 కోట్ల మేర అధిక వడ్డీకి గత ప్రభుత్వం రుణాలు చేసిందని, వడ్డీ రేట్లు తగ్గించాలని కూడా కోరానన్నారు. జీతా ల కంటే ఎక్కువ మొత్తం అప్పులపై వడ్డీకే కట్టాల్సి వస్తోందని చెప్పామన్నారు. వీటితో పాటు 2014 లో ఏపి , తెలంగాణ రెండు రాష్ఠ్రాల కు చెందిన కేంద్ర ప్రభుత్వ పథకాలకు సంబంధించిన నిధులు ఏపి ఖాతాలోనే వేశారని, అందులోని తెలంగాణ వాటా నిధులు తిరిగి వెనక్కి ఇవ్వాలని కోరామని తెలిపారు. 2019- నుంచి ఇప్పటి వరకు వెనుకబడిన జిల్లాల అభివృద్ధికి సంబంధించి కేంద్రం నిధులు రాష్ట్రాలని అందలేదని వాటిని కూడా విడుదల చేయాలని కోరినట్లు చెప్పారు. ఇలా మొత్తం తెలంగాణ ప్రభుత్వం 8 అంశాలపై కేంద్ర మంత్రిని కోరగా వాటిపై ఆమె సానుకూలంగా స్పందించారన్నారు. వీటి పరిష్కారం కోసం త్వరలోనే కేంద్ర రాష్ట్ర ఆధికారులతో ఒక సమావేశం ఏర్పాటు చేస్తామని నిర్మలా సీతారామన్‌ తెలిపారని వెల్లడించారు.
చెరువుల కబ్జాతోనే రోడ్లపైకి వర్షపు నీళ్లు
ఎన్‌ కన్వెన్షన్‌ కూల్చివేతపై భట్టి విక్రమార్క
హైదరాబాద్‌ లో అక్రమ నిర్మాణాల కూల్చి వేతలపై డిప్యూటి సిఎం భట్టి విక్రమార్క కీలక వ్యాఖ్యలు చేశారు. చెరువుల కబ్జాతోనే హైదరాబాద్‌ నగర రోడ్లపైకి వర్షపు నీరు వచ్చి చేరుతోందన్నారు. హైదరాబాద్‌ నగరం అంటేనే లేక్స్‌, రాక్స్‌ (సరస్సులు, రాళ్లు)కు నెలవు అన్నారు. వీటిని కాపాడు కోవాలంటూ పర్యావరణ వేత్తలు పెద్ద ఎత్తున ఆందోళనలు కూడా చేశారని గుర్తు చేశారు. చెరువులను ఆక్రమించి నిర్మాణాలు చేయడం వల్ల ఇబ్బందులు కలుగు తున్నాయని చెప్పారు. చెరువులు ఏవీ ఆక్రమణకు గురి కాకుండా పరిరక్షించడం కోసం ఏర్పాటు చేసిందే హైడ్రా అని ఆయన వివరించారు. హైడ్రాను ప్రజలందరూ ఆహ్వానిస్తున్నారని భట్టి విక్రమార్క చెప్పారు. ప్రతి పనికి నోటీసులు ఇచ్చి ఆపై చర్యలు తీసుకుంటున్నామని వెల్లడించారు. బఫర్‌ జోన్‌ లో కాదు, నేరుగా చెరువు లోనే నిర్మాణాలు చేపట్టారని, వాటిని కూల్చేస్తున్నారని భట్టి విక్రమార్క స్పష్టత ఇచ్చారు. శాటిలైట్‌ ఫోటోల ద్వారా విభజనకు ముందు, విభజన తర్వాత ఈ 10 ఏళ్లలో చెరువులు ఎంత మేర ఆక్రమణకు గురయ్యాయి తెలుసుకుంటున్నామన్నారు. రిమోట్‌ సెన్సింగ్‌ శాటిలైట్‌ ఫోటోలను తీసి, అంతకుముందు ఎన్ని చెరువులు ఉండేవి, ఇప్పుడు ఎన్ని ఉన్నాయి అన్నది ప్రజల ముందు పెడతామన్నారు. చట్ట ప్రకారం, చట్టానికి లోబడి మాత్రమే చర్యలు చేపడుతున్నామని డిప్యూటి సిఎం భట్టి విక్రమార్క తేల్చి చెప్పారు. అన్నీ లెక్కలతో సహా ప్రజల ముందు పెడతామన్నారు. ప్రజల ఆస్తులను కాపాడడం ప్రభుత్వ బాధ్యత అని భట్టి విక్రమార్క అన్నారు.
