మహబూబ్‌నగర్‌ నుంచి ఎంపిగా బరిలోకి దిగాలి

మాజీ సిఎం కెసిఆర్‌కు వంశీచంద్‌రెడ్డి లేఖ
ప్రజాపక్షం/హైదరాబాద్‌ కృష్ణా జలాల విషయంలో తప్పు చేయలేదని చెప్పే బిఆర్‌ఎస్‌ అధ్యక్షుడు కె.చంద్రశేఖర్‌ రావుకు ధైర్యం ఉంటే మహబూబ్‌నగర్‌ నుంచి ఎంపిగా పోటీ చేయాలని ఎఐసిసి కార్యదర్శి వంశీచంద్‌ రెడ్డి సవాల్‌ విసిరారు. ఈ మేరకు కెసిఆర్‌కు వంశీచంద్‌ రెడ్డి బహిరంగ లేఖరాశారు. గాంధీ భవన్‌లో గురువారం మీడియా తో ఆయన మాట్లాడుతూ తెలంగాణ ప్రయోజనాలను కాపాడే రక్షకులు ఎవరో ప్రజలే ఓటు ద్వారా నిర్ణయిస్తారన్నారు. మహబూబ్‌నగర్‌ ఓటర్లను తీర్పును రెఫరెండంగా భావిద్దామని సవాల్‌ విసిరారు. దమ్ముంటే సవాల్‌కి కెసిఆర్‌ సిద్ధపడాలన్నారు. కృష్ణా జలాల్లో తెలంగాణకు చేసిన ద్రోహం పై, పాలమూరుకు చేసిన అన్యాయంపైన కెసిఆర్‌ బహిరంగ చర్చకు సిద్ధపడాలన్నారు. కెసిఆర్‌ దుర్మార్గాలను, నీటి వాటాల్లో తెలంగాణకు చేసిన అన్యాయాలను ఆధారాలతో నిరూపించేందుకు కాంగ్రెస్‌ పార్టీగా తాము సిద్ధమని స్పష్టం చేశారు. తెలంగాణకు తీరని ద్రోహం చేసి, పాలమూరును బీడు పెట్టిన నీచరిత్ర ఎవరిదో తెలంగాణలో ప్రతి ఒక్కరికీ తెలుసు అన్నారు. ఉమ్మడి మహబూబ్‌ నగర్‌ జిల్లా ప్రజల కన్నీటి గాథలు చెబుతూ పోతే చాంతాడంత ఉంటుందన్నారు. రాజకీయంగా పునర్జన్మ ఇచ్చిన ఇక్కడి ప్రజలను కెసిఆర్‌ మోసం చేశారని విమర్శించారు. రాష్ట్ర ప్రజలను వంచించి కల్వకుంట్ల కుటుంబం బాగుపడిందన్నారు. కృష్ణా జలాల్లో తెలంగాణకు కేటాయించిన నీటిని కెసిఆర్‌ ప్రభుత్వం వాడుకోలేదన్నారు. ఆయన అసమర్థ నాయకత్వంతో కృష్ణా జలాల్లో నీటి వాటాలో రాష్ట్రానికి అన్యాయం జరిగిందన్నారు. గత ప్రభుత్వం పాలమూరు, మేడిగడ్డను బొందపెట్టిందని ఆగ్రహం వ్యక్తం చేశారు. మరోసారి మోసం చేయడానికే ఆ పార్టీ నాయకులు మేడిగడ్డ పర్యటనకు బయల్దేరారని అన్నారు. శుక్రవారం పాలమూరులో గత ప్రభుత్వ బండారం బయటపెడతామన్నారు.
చేతగానితనంతో కృష్ణా జలాల్లో హక్కులు వదిలేశారు..
కృష్ణా జలాల విషయంలో కెసిఆర్‌ తెలంగాణకు చేసిన శాశ్వత అన్యాయాన్ని ఆధారాలతో బయటపెట్టేందుకే ఈ లేఖ రాస్తున్నా అని వంశీచంద్‌ రెడ్డి అన్నారు. కృష్ణా జలాలపై హక్కులను చేతగానితనంతో వదులుకొని, తెలంగాణకు తీరని ద్రోహం చేసిన చరిత్ర కెసిఆర్‌కే దక్కిందన్నారు. కృష్ణా జలాల్లో తెలంగాణ వాటాగా న్యాయంగా రావాల్సింది 575 టిఎంసిలు అయితే, కెసిఆర్‌ 299 టిఎంసిలకే కేంద్రం వద్ద అంగీకరించారని అన్నారు. కృష్ణా జలాల్లో తెలంగాణ వాటాను తగ్గించుకుంటూ 2016, జూన్‌ 21 అపెక్స్‌ కౌన్సిల్‌ సమావేశంలో కెసిఆర్‌ సంతకం పెట్టారన్నారు. తెలంగాణ ప్రయోజనాలకు మరణ శాసనం రాశారని మండిపడ్డారు. న్యాయబద్ధమైన వాటాను వదులుకొని, కృష్ణా పరివాహక ప్రాంతంలో కొత్త ప్రాజెక్టులు కట్టకుండా, పెండింగ్‌ పనులు పూర్తి చేయకుండా తెలంగాణను బీడు చేసిన చరిత్ర కెసిఆర్‌దే అన్నారు. కమిషన్‌ల కోసం కాళేశ్వరం పేరుతో నకిలీ కట్టడాలు చూపించి, కెసిఆర్‌ వేల కోట్లు లూటీ చేశారన్నారు. మేడిగడ్డ సందర్శన పేరుతో బిఆర్‌ఎస్‌ చేసే సర్కస్‌ ఫీట్‌లను తెలంగాణ సమాజం అసహ్యించుకుంటోందన్నారు.
పదేళ్లలో నిర్లక్ష్యానికి గురైన పాలమూరు ప్రాజెక్టులు..
కృష్ణా పరీవాహక ప్రాంతంలో ప్రాజెక్టులు కట్టి ఉంటే, కృష్ణా జలాల్లో న్యాయమైన వాటా తెలంగాణకు దక్కే అవకాశం ఉండేదన్నారు. ఎస్‌ఎల్‌బిసి, ఆర్‌డిఎస్‌ విస్తరణ, మహబూబ్‌ నగర్‌లోని 10 టిఎంసిల ఎత్తిపోతల పథకాలు, పాలమూరు లిఫ్ట్‌ ఇరిగేషన్‌ స్కీం, బీమా లిఫ్ట్‌లను ఎందుకు నిర్లక్ష్యం చేశారో కెసిఆర్‌ తెలంగాణకు సమాధానం చెప్పాలన్నారు. నీటి హక్కు, వినియోగ సామర్థ్యం, ప్రజా అవసరాలను వివరిస్తేనే నదీ జలాల్లో రాష్ట్రానికి వాటాలు దక్కుతాయన్న ఇంగితం కూడా కెసిఆర్‌కు లేదన్నారు. కృష్ణా జలాల్లో తెలంగాణ వాటా వదులుకొని, ఏపి జలదోపిడికి కెసిఆర్‌ కాపలా కాశారని విమర్శించారు. ఆగస్టు 2020లో ఏపి సంగమేశ్వర టెండర్ల ప్రక్రియ పూర్తి చేసేందుకు కెసిఆర్‌ ఉద్దేశ పూర్వకంగా సహకరించారని ఆరోపించారు. కేంద్రానికి లేఖ రాసి అపెక్స్‌ కౌన్సిల్‌ సమావేశాన్ని వాయిదా వేయించారన్నారు. పదేండ్ల కాలంలో కృష్ణా జలాల కోసం ఏపి 8 ప్రాజెక్టులు, స్కీమ్‌లు పెడితే, కెసిఆర్‌ చేసింది మాత్రం గుండుసున్న అన్నారు. కృష్ణా ప్రాజెక్టుల నిర్వహణను కెఆర్‌ఎంబికి అప్పగిస్తూ ఒకటి కాదు రెండుసార్లు కెసిఆర్‌ ప్రభుత్వం అంగీకారం తెలిపిందన్నారు. 2022 మే 27న, మళ్లీ 2023 మే 19న కెఆర్‌ఎంబి ప్రాజెక్టుల అప్పగింతకు కెసిఆర్‌ అంగీకారం తెలిపిన మాట వందకు వందశాతం నిజమని, అందుకు ఆధారాలు ఉన్నాయన్నారు.
సంగం బండ రిజర్వాయర్‌ను పట్టించుకొని కెసిఆర్‌..
సంగం బండ రిజర్వాయర్‌లో బండ పగలగొడితే 20 వేల ఎకరాలకు నీరు అందుతుందని మొత్తుకున్నా కెసిఆర్‌ పట్టించుకోలేదన్నారు. సంగం బండ బాధితులకు న్యాయం చేస్తూ, ఆగమేఘాల మీద నిధుల విడుదల చేసిన సిఎం రేవంత్‌ రెడ్డికి వంశీచంద్‌ రెడ్డి ధన్యవాదాలు తెలిపారు. పాలమూరుకు కెసిఆర్‌ పదేండ్లలో చేయలేనిది కాంగ్రెస్‌ ప్రభుత్వం మూడు నెలల్లోనే చేస్తోందన్నారు. కొడంగల్‌ – నారాయణ పేట ఎత్తిపోతల పనులు ప్రారంభించి, పాలమూరు రంగారెడ్డి పూర్తి చేస్తామనే భరోసా ఇచ్చి పాలమూరు కన్నీరు తుడుస్తున్నది రేవంత్‌ రెడ్డి ప్రభుత్వమే అన్నారు.